WHO ເຕືອນ ເອີຣົບ ອາດມີຜູ້ເສຍຊີວິດຈາກໂຄວິດເພີ່ມຂຶ້ນອີກ 7 ແສນຄົນ

296

ສຳ​ນັກ​ຂ່າວ​ຕ່າງ​ປະ​ເທດ​ລາຍ​ງານ​ວ່າ ອົງ​ການ​ອະ​ນາ​ໄມ​ໂລກ (WHO) ອອກ​ມາ​ເຕືອນ​ວ່າ ທະ​ວີບ​ເອີ​ຣົບ​ອາດ​ມີ​ຜູ້​ເສຍ​ຊີ​ວິດ​ຈາກ​ພະ​ຍາດ​ໂຄວິດ-19 ເພີ່ມ​ຂຶ້ນ​ເຖິງ 7 ແສນ​ຄົນໃນ​ເດືອນ​ມີ​ນາ 2022 ເນື່ອງ​ຈາກ ຂະ​ນະ​ນີ້​ພົບ​ຜູ້​ຕິດ​ເຊື້ອ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ຈົນ​ເຮັດ​ໃຫ້​ບາງ​ປະ​ເທດ ຕ້ອງ​ອອກ​ມາດ​ຕະ​ການ​ລັອກ​ດາວ​ອີກ​ຄັ້ງ.

ອົງ​ການ​ອະ​ນາ​ໄມ​ໂລກ​ຍັງ​ຄາດ​ການ​ວ່າ ​ພະ​ແນກຜູ້​ປ່ວຍ​ໜັກ​ໃນ 49 ປະ​ເທດ ຈາກ 53 ປະ​ເທດ​ຂອງ​ທະ​ວີບ​ເອີ​ຣົບ ສ່ຽງ​ຕໍ່​ການ​ປະ​ເຊີນ​ຜູ້​ປ່ວຍ​ໜັກລົ້ນ​ຕຽງແຕ່​ນີ້​ຈົນ​ເຖິງວັນ​ທີ 1 ມີ​ນາ 2022.

ອົງ​ການ​ອະ​ນາ​ໄມ​ໂລກ​ຍັງ​ລາຍ​ງານ​ໂດຍ​ອ້າງ​ຂໍ້​ມູນ​ຈາກ​ສະ​ຖາ​ບັນ​ປະ​ເມີນ​ຜົນ​ສຸ​ຂະ​ພາບ​ຂອງ​ມະ​ຫາ​ວິ​ທະ​ຍາ​ໄລ​ວໍ​ຊີງ​ຕັນ​ລະ​ບຸ​ວ່າ: ພະ​ຍາດ​ໂຄວິດ-19 ເປັນ​ສາ​ເຫດຫຼັກ​ທີ່​ເຮັດ​ໃຫ້​ເກີດ​ການ​ເສຍ​ຊີ​ວິດ​ທົ່ວ​ທະ​ວີບ​ເອີ​ຣົບ ແລະ ພູ​ມີ​ພາກ​ອາ​ຊີ​ກາງ ໂດຍຍອດ​ຜູ້​ເສຍ​ຊີ​ວິດ​ທີ່​ເພີ່ມ​ຂຶ້ນ​ມີ​ສາ​ເຫດ​ຈາກ​ການ​ລະ​ບາດ​ຂອງ​ເຊື້ອ​ເດວ​ຕ້າ, ການ​ສັກ​ວັກ​ຊີນ​ບໍ່​ຄອບ​ຄຸມ ແລະ ການ​ຜ່ອນ​ຜັນ​ມາດ​ຕະ​ການ​ຄວບ​ຄຸມ.

["]

ທັງ​ນີ້ WHO ລະ​ບຸ​ວ່າ: ທະ​ວີບ​ເອີ​ຣົບ​ມີ​ຍອດ​ຜູ້​ເສຍ​ຊີ​ວິດ​ທີ່​ເຊື່ອມ​ໂຍງ​ກັບ​ໂຄວິດ-19 ໃນ​ອາ​ທິດ​ຜ່ານ​ມາ ເກືອບ 4.200 ຄົນ ເພີ່ມ​ຂຶ້ນ 2 ເທົ່າ​ ເມື່ອ​ທຽບ​ກັບ​ທ້າຍ​ເດືອນ​ກັນ​ຍາ​ຜ່ານ​ມາ​ທີ່​ມີ​ພຽງ 2.100 ຄົນ ແລະ ມີຫຼັກ​ຖານ​ເພີ່ມ​ຂຶ້ນ ກ່ຽວ​ກັບ​ວັກ​ຊີນ​ປ້ອງ​ກັນ​ໂຄວິດ-19 ທີ່​ມີ​ປະ​ສິດ​ທິ​ພາບຫຼຸດ​ລົງ​ໃນ​ການ​ປ້ອງ​ກັນການ​ຕິດ​ເຊື້ອ ແລະ ​ປ້ອງ​ກັນອາ​ການ​ປ່ວຍຮຸນ​ແຮງ​ລົງເລັກ​ໜ້ອຍ.