ສຳນັກຂ່າວຕ່າງປະເທດລາຍງານໃນວັນທີ 21 ພະຈິກ 2021 ວ່າ ຫວຽດນາມໄດ້ເປີດເກາະ “ຟູກວກ” (Phu Quoc) ເພື່ອຕ້ອນຮັບນັກທ່ອງທ່ຽວຈາກຕ່າງປະເທດ ເປັນຄັ້ງທຳອິດໃນຮອບເກືອບ 2 ປີ ໂດຍຖ້ຽວບິນເຊົ່າເໝົາລຳຂອງສາຍການບິນ Veitjet ໄດ້ນຳນັກທ່ອງທ່ຽວຊາວ ສ ເກົາຫຼີຈຳນວນ 200 ຄົນ ລົງຈອດທີ່ສະໜາມບິນນານາຊາດຟູກວກ ເມື່ອວັນເສົາຜ່ານມາ.
ລາຍງານລະບຸວ່າ ນັກທ່ອງທ່ຽວຕ່າງປະເທດທີ່ຕ້ອງການເດີນທາງມາທ່ອງທ່ຽວຍັງເກາະແຫ່ງນີ້ ຕ້ອງສັກວັກຊີນປ້ອງກັນໂຄວິດ-19 ຄົບໂດສ, ພ້ອມມີໃບຢັ້ງຢືນການກວດໂຄວິດ-19 ບໍ່ເກີນ 72 ຊົ່ວໂມງ ເຊິ່ງຫາກຄົບຕາມເງື່ອນໄຂດັ່ງກ່າວກໍບໍ່ຈຳເປັນຕ້ອງກັກຕົວແຕ່ຢ່າງໃດ.
ທັງນີ້ ເກາະຟູກວກ ເປັນເກາະຂະໜາດໃຫຍ່ ແລະ ເປັນແຫຼ່ງທ່ອງທ່ຽວຕາກອາກາດທີ່ມີຊື່ສຽງຂອງຫວຽດນາມ ໄດ້ປິດໃຫ້ບໍລິການນັກທ່ອງທ່ຽວຕ່າງປະເທດມາແຕ່ເດືອນມີນາ 2020 ເປັນຕົ້ນມາ ເນື່ອງຈາກມາດຕະການປິດເມືອງຂອງລັດຖະບານເພື່ອຄວບຄຸມການແຜ່ລະບາດຂອງພະຍາດໂຄວິດ-19. ໂດຍເບື້ອງຕົ້ນຈະເປີດຮັບນັກທ່ອງທ່ຽວໃນເດືອນຕຸລາ ແຕ່ເນື່ອງຈາກ ອັດຕາການສັກວັກຊີນໃຫ້ປະຊາຊົນຊາວເກາະຟູກວກຍັງຕ່ຳ ຈຶ່ງເລື່ອນມາເປັນເດືອນພະຈິກ.
ກະຊວງສາທາລະນະສຸກຫວຽດນາມ ຢືນຢັນວ່າ ປັດຈຸບັນ ເຈົ້າໜ້າທີ່ບໍລິການ ແລະ ປະຊາຊົນກຸ່ມເປົ້າໝາຍທີ່ອາໄສຢູ່ເກາະແຫ່ງນີ້ ໄດ້ຮັບວັກຊີນຄົບໂດສແລ້ວ 99% ຂອງຈຳນວນປະຊາກອນທັງໝົດ.
ທັງນີ້ ນັບແຕ່ເກີດການລະບາດຂອງພະຍາດໂຄວິດ-19 ໄດ້ເຮັດໃຫ້ນັກທ່ອງທ່ຽວເດີນທາງເຂົ້າຫວຽດນາມຫຼຸດລົງເປັນຈຳນວນຫຼວງຫຼາຍ ຈາກ 18 ລ້ານຄົນໃນປີ 2019 ເຫຼືອພຽງ 3,8 ລ້ານເທື່ອຄົນໃນປີ 2020.
