ສຳນັກຂ່າວຣອຍເຕີ ລາຍງານໃນວັນທີ 18 ພະຈິກຜ່ານມາວ່າ ເຈົ້າໜ້າທີ່ລະດັບສູງຈາກຈີນ, ຍີ່ປຸ່ນ, ສ ເກົາຫຼີ ແລະ ອິນເດຍ ອອກມາຢືນຢັນກົງກັນວ່າ ໄດ້ຮັບການຕິດຕໍ່ຈາກສະຫະລັດອາເມຣິກາ ໃຫ້ປ່ອຍນ້ຳມັນດິບໃນຄັງສຳຮອງເຊີງຍຸດທະສາດ (SPR) ເພື່ອເພີ່ມປະລິມານນ້ຳມັນດິບໃນຕະຫຼາດໂລກ ດຶງລາຄານ້ຳມັນຫຼຸດລົງ ຫຼັງຈາກທີ່ປັບຂຶ້ນສູ່ລະດັບສູງສຸດເມື່ອເດືອນຕຸລາຜ່ານມາ.
ຄວາມເຄື່ອນໄຫວດັ່ງກ່າວ ສົ່ງຜົນໃຫ້ລາຄານ້ຳມັນດິບໃນຕະຫຼາດໂລກຫຼຸດລົງທັນທີ ໂດຍວັນທີ 17 ພະຈິກຜ່ານມາ ລາຄານ້ຳມັນດິບເບຣນຫຼຸດລົງ 4% ຢູທີ່ 80,28 ໂດລາຕໍ່ບາເຣລ ແລະ ຍັງມີທ່າອ່ຽງຫຼຸດລົງຢ່າງຕໍ່ເນື່ອງ, ສ່ວນນ້ຳມັນດິບ WTI ຫຼຸດລົງ 3% ປິດທີ່ 78,36 ໂດລາຕໍ່ບາເຣລ ໃນວັນທີ 17 ພະຈິກຜ່ານມາ.
ທັງນີ້ ເຈົ້າໜ້າທີ່ຂອງສະຫະລັດອາເມຣິກາໄດ້ປຶກສາຫາລືເຖິງຄວາມເປັນໄປໄດ້ໃນການປ່ອຍນ້ຳມັນຈາກຄັງ SPR ມາໄລຍະໜຶ່ງແລ້ວ ໂດຍຢ່າງໜ້ອຍມີ 4 ປະເທດ ເຊິ່ງເປັນປະເທດທີ່ບໍລິໂພກນ້ຳມັນລາຍໃຫຍ່ຂອງອາຊີ ກຳລັງພິຈາລະນາ ເພື່ອດຳເນີນການຕາມຄວາມຮຽກຮ້ອງຂອງສະຫະລັດອາເມຣິກາທີ່ຈະເລີ່ມປ່ອຍນ້ຳມັນອອກສູ່ຕະຫຼາດໃນອາທິດຈະເຖິງນີ້.
ລາຍງານລະບຸວ່າ ເຈົ້າໜ້າທີ່ຈາກສຳນັກງານຄັງສຳຮອງນ້ຳມັນແຫ່ງລັດຈີນ ຍອມຮັບວ່າ ຈີນກຳລັງພິຈາລະນາເລື່ອງດັ່ງກ່າວ, ໃນຂະນະທີ່ກະຊວງອຸດສາຫະກຳຂອງຍີ່ປຸ່ນຢືນຢັນວ່າ ໄດ້ຮັບຄຳຮ້ອງຂໍຈາກສະຫະລັດ ແຕ່ຕາມກົດໝາຍຂອງຍີ່ປຸ່ນແລ້ວ ນ້ຳມັນໃນຄັງສຳຮອງບໍ່ສາມາດນຳມາໃຊ້ ເພື່ອກົດດັນໃຫ້ລາຄານ້ຳມັນໃນຕະຫຼາດຫຼຸດລົງໄດ້, ສ່ວນ ສ ເກົາຫຼີ ກຳລັງພິຈາລະນາຄຳຮ້ອງຂໍດັ່ງກ່າວ ພ້ອມລະບຸວ່າການປ່ອຍນ້ຳມັນຈາກຄັງສຳຮອງ ບໍ່ໄດ້ຕ້ອງການໃຫ້ລາຄາຫຼຸດລົງ ແຕ່ເປັນການປັບອຸປະທານໃນຕະຫຼາດໃຫ້ມີຄວາມສົມດູນກັນ.