ກົມໃຫຍ່ຕຳຫຼວດ ກະຊວງ ປກສ ແຕ່ງຕັ້ງຕຳຫຼວດຫຼາຍຄົນໃຫ້ຮັບຕຳແໜ່ງໃໝ່

772

ກົມໃຫຍ່ຕຳຫຼວດ ກະຊວງ ປກສ ໄດ້ຈັດພິທີປະກາດການຍົກຍ້າຍ, ແຕ່ງຕັ້ງ, ສັບຊ້ອນໜ້າທີ່ໃຫ້ນາຍຕຳຫຼວດກົມໃຫຍ່ຕຳຫຼວດ ໃນວັນທີ 17 ພະຈິກ 2021 ໂດຍມີ ພົຕ ຄຳກິ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕຳຫຼວດ ພ້ອມດ້ວຍຄະນະພັກກົມ, ຫ້ອງ, ສູນ ອ້ອມຂ້າງ ແລະ ພະນັກງານນັກຮົບທີ່ຂື້ນກັບກົມໃຫຍ່ຕຳຫຼວດເຂົ້າຮ່ວມ.

ທ່ານ ພັອ ບຸນຫຼວງ ວິໄລສຸກ ຄະນະພັກກົມໃຫຍ່ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງເລກທີ 2086/ປກສ ວ່າດ້ວຍການແຕ່ງຕັ້ງນາຍຕຳ ຫຼວດທີ່ຂຶ້ນກັບກົມໃຫຍ່ຕຳຫຼວດ, ເຊຶ່ງໄດ້ແຕ່ງຕັ້ງ ພັທ ລຳພອນ ສີດາດວງເລີດ ເປັນຮອງຫ້ອງການກົມໃຫຍ່, ພັທ ອຸໄທ ມະຫາວົງ ເປັນຮອງຫ້ອງ ການເມືອງ, ພັທ ໃບພອນ ພິມພິສານ ເປັນຮອງຫ້ອງພະລາ, ພັທ ສັນຕິພາບ ພີມມະສອນ ເປັນຮອງກົມຕຳຫຼວດສືບສວນ-ສອບສວນ, ພັທ ແກ້ວວິໄລ ມີໄຊພອນ ເປັນຮອງ ກົມຕຳຫຼວດສະກັດກັ້ນ ແລະ ຕ້ານຢາເສບຕິດ, ພັທ ໄຕຄຳ ເທບພາສີ ເປັນຮອງ ກົມນິຕິວິທະຍາ, ພັທ ວຽງໂຂງ ບານຈັນທະວົງ ເປັນຮອງກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ແລະ ພັທ ວິພາກອນ ສິງຈັນທາ ເປັນຮອງສູນຄວບຄຸມລະບົບວົງຈອນປິດ.

["]

ນອກນັ້ນ, ຍັງໄດ້ ແຕ່ງນາຍຕຳຫຼວດທີ່ຂຶ້ນກັບກົມໃຫຍ່ຕຳຫຼວດ ຂຶ້ນເປັນຫົວໜ້າພະແນກ ແລະ ຮອງພະແນກ ຢູ່ບັນດາກົມ, ຫ້ອງ ທີ່ຂື້ນກັບກົມໃຫຍ່ ຕໍາຫຼວດ 25 ສະຫາຍ, ສ່ວນຫົວໜ້າ ແລະ ຮອງທີ່ມີຢູ່ແລ້ວຮັກສາໄວ້ຄືເກົ່າ. ຍົກຍ້າຍ ພັທ ໃບພອນ ພິມພິສານ ຈາກກົມຕຳຫຼວດສະກັດກັ້ນ ແລະ ຕ້ານຢາເສບຕິດ ໄປຮັບໜ້າທີ່ໃໝ່ຢູ່ຫ້ອງພະລາທິການ ກົມໃຫຍ່ຕຳຫຼວດ ແລະ ສັບ ຊ້ອນນາຍຕຳຫຼວດທີ່ສຳເລັດການສຶກສາ, ເຂົ້າໃສ່ບັນດາກົມ, ຫ້ອງ, ສູນທີ່ຂຶ້ນກັບກົມໃຫຍ່ຕໍາຫຼວດ ຈໍານວນ 5 ສະຫາຍ.

ພົຕ ຄຳກິ່ງ ຜຸ່ຍຫຼ້າມະນິວົງ ໄດ້ສະແດງຄວາມຍ້ອງຍໍຊົມເຊີຍຕໍ່ກັບຜູ້ທີ່ໄດ້ຮັບການແຕ່ງຕັ້ງ,ຍົກຍ້າຍ ແລະ ຊັບຊ້ອນໜ້າທີ່ໃໝ່ໃນຄັ້ງນີ້. ພ້ອມທັງເນັ້ນໃຫ້ສືບຕໍ່ຊີ້ນຳ-ນຳພາເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານນັກຮົບເປັນປົກກະຕິຍົກສູງຄວາມຮັບຜິດຊອບຕໍ່ໜ້າທີການເມືອງທີ່ໄດ້ຮັບມອບໝາຍ, ເປັນແບບຢ່າງໃນການຈັດຕັ້ງປະຕິບັດແນວທາງຂອງພັກ, ເພີ່ມທະວີຄວາມສະມັກຄີພາຍໃນກົມກອງໃຫ້ແໜ້ນແຟ້ນ, ເຮັດສຳເລັດໜ້າທີ່ ທີ່ໄດ້ມອບໝາຍໃຫ້.