ສຳນັກຂ່າວຕ່າງປະເທດລາຍງານວ່າ ທ່ານ ດຣ. ທີໂດຣສ ອັກຮານອມ ກິບຣີເຢຊູສ ຜູ້ອຳນວຍການໃຫຍ່ອົງການອະນາໄມໂລກ (WHO) ສະແດງຄວາມກັງວົນເຖິງຄວາມແຕກໂຕນໃນການກະຈາຍວັກແຊັງປ້ອງກັນໂຄວິດ-19 ພ້ອມລະບຸວ່າ ໃນຂະນະທີ່ ປະເທດກຳຮັ່ງມີກຳລັງເລັ່ງສັກເຂັມກະຕຸ້ນ (ເຂັມບູສເຕີ) ແຕ່ຊາວອາຟຣິກກາຊ້ຳພັດມີຜູ້ໄດ້ສັກວັກຊີນຄົບໂດສ ກວມພຽງ 6% ຂອງຈຳນວນປະຊາກອນເທົ່ານັ້ນ.
ຜູ້ອຳນວຍການ WHO ລະບຸວ່າ: ໃນແຕ່ລະວັນ ມີຜູ້ສັກວັກແຊັງເຂັມ ບູສເຕີທົ່ວໂລກ ຫຼາຍກວ່າ ວັກຊີນເຂັມທຳອິດທີ່ສັກໃຫ້ແກ່ປະຊາຊົນໃນປະເທດທີ່ມີລາຍຮັບຕ່ຳເຖິງ 6 ເທົ່າ, ທັງນີ້ WHO ລາຍງານວ່າ ທົ່ວທະວີບອາຟຣິກກາມີປະຊາຊົນໄດ້ສັກວັກແຊັງຄົບ 2 ເຂັມພຽງ 6% ຂອງປະຊາກອນເທົ່ານັ້ນ. ພ້ອມທັງຮຽກຮ້ອງໃຫ້ບັນດາປະເທດຮັ່ງມີບໍລິຈາກວັກແຊັງສ່ວນເກີນ ເພື່ອສັກໃຫ້ກຸ່ມເປົ້າໝາຍໃນປະເທດທຸກຍາກ.
ເວັບໄຊ Our World in Data ໄດ້ລາຍງານວ່າ: ໃນທະວີບອາຟຣິກກາມີພຽງ ໂມຣ໊ອກໂກ, ຕູນີເຊຍ ແລະ ມໍຣິສເຊຍ ເທົ່ານັ້ນ ທີ່ສັກວັກແຊັງໃຫ້ແກ່ປະຊາຊົນໄດ້ເກີນ 35% ຂອງຈຳນວນປະຊາກອນ, ສ່ວນທີ່ເຫຼືອຍັງບໍ່ເຖິງ 10% ຂອງຈຳນວນປະຊາກອນ.
