ສຳນັກຂ່າວກຽວໂດລາຍງານໃນວັນທີ 12 ພະຈິກ 2021 ວ່າ: ລັດຖະບານຍີ່ປຸ່ນໄດ້ຕັດສິນໃຈຊື້ຢາ ໂມລນູພີຣາເວຍ ເຊິ່ງເປັນຢາປິ່ນປົວພະຍາດໂຄວິດ-19 ກັບບໍລິສັດເມີກ ແອນ ໂຄ ເພື່ອຮອງຮັບການປິ່ນປົວປະຊາຊົນຜູ້ຕິດເຊື້ອປະມານ 1,6 ລ້ານຊຸດ ຫາກເກີດການລະບາດຮອບໃໝ່ໃນປະເທດ.
ລາຍງານລະບຸວ່າ ມາດຕະການຮັບມືກັບການແຜ່ລະບາດຂອງພະຍາດໂຄວິດ-19 ເຊິ່ງໜ່ວຍປະຕິບັດການພິເສດຂອງຍີ່ປຸ່ນໄດ້ເພີ່ມຂີດຄວາມສາມາດໃນການຮອງຮັບຜູ້ປ່ວຍໂຄວິດ ຂອງໂຮງໝໍຂຶ້ນອີກ 30% ເມື່ອທຽບກັບການລະບາດລະດັບສູງສຸດໃນຮອບທີ 5 ເມື່ອລະດູຮ້ອນຜ່ານມາ.
ທ່ານ ຟູມີໂອະ ຄີຊີດະ ນາຍົກລັດຖະມົນຕີຍີ່ປຸ່ນ ກ່າວວ່າ: ດ້ວຍການຈັດການລະບົບສາທາລະນະສຸກ ເຊິ່ງອີງຕາມສົມມຸດນິຖານທີ່ເກີດການລະບາດຮຸນແຮງທີ່ສຸດ ແລະ ກະກຽມແຜນປິ່ນປົວໄວ້ ເຖິງວ່າ ຈະເກີດການລະບາດທີ່ຮຸນແຮງ ກໍຈະເຮັດໃຫ້ພວກເຮົາສາມາດດຳເນີນກິດຈະກຳດ້ານເສດຖະກິດ ແລະ ສັງຄົມຕໍ່ໄປໄດ້.