ສຳນັກຂ່າວຊິນຮວາ ລາຍງານວ່າ: ອົງການບໍລິຫານຄອງຊູເອຊ (SCA) ຂອງເອຢິບ ປະກາດຈະເພີ່ມຄ່າທຳນຽມສຳລັບເຮືອບັນທຸກສິນຄ້າທີ່ຜ່ານຄອງຊູເອຊ 6% ໃນປີ 2022.
ທ່ານ ໂອຊາມາ ເຣບີ ປະທານອົງການບໍລິຫານຄອງຊູເອຊ ກ່າວວ່າ: ການປັບຂຶ້ນຄ່າທຳນຽມ ຜ່ານຄອງຊູເອຊຈະມີ ຜົນບັງຄັບໃຊ້ ຕັ້ງແຕ່ເດືອນ ກຸມພາ 2022 ເປັນຕົ້ນໄປ ໂດຍຈະບໍ່ລວມກຸ່ມເຮືອທ່ອງທ່ຽວ ແລະ ເຮືອຂົນສົ່ງແກັສທຳມະຊາດ ປະເພດແຫຼວ (LNG) ເພື່ອແນໃສ່ ໃຫ້ມີ ຄວາມສົມດຸນ ແລະ ໝັ້ນຄົງ ເພື່ອສ້າງຜົນປະໂຫຍດ ໃຫ້ແກ່ ອົງການ ແລະ ກຸ່ມລູກຄ້າ.
ຜູ້ບໍລິຫານຄອງຊູເອຊ ກ່າວອີກວ່າ: ການດຳເນີນການ ດັ່ງກ່າວ ໄດ້ຜ່ານການສຶກສາ ແລະ ປະເມີນຢ່າງລະອຽດແລ້ວ ໂດຍອ້າງເຖິງ ການຄາດຄະເນຂອງ ກອງທຶນການເງິນສາກົນ (IMF) ເຊິ່ງຄາດວ່າ ເສດຖະກິດໂລກ ຈະເຕີບໂຕ 5,9% ໃນປີ 2021 ແລະ 4,9% ໃນປີ 2022. ນອກຈາກນັ້ນ, ອົງການການຄ້າໂລກ (WTO) ຍັງຄາດວ່າ ປະລິມານ ການຄ້າໂລກ ຈະຂະຫຍາຍຕົວຢ່າງຕໍ່ເນື່ອງ ແລະ ຄວາມຕ້ອງການ ການຂົນສົ່ງ ທາງທະເລ ຈະເພີ່ມຂຶ້ນ 6,7% ໃນປີ 2021 ແລະ 4,7% ໃນປີ 2022.