ອຸດສາຫະກຳຢາໂລກ ຍັງແຂ່ງຂັນກັນຢ່າງຕໍ່ເນື່ອງ ທ່າມກາງຄວາມພະຍາຍາມຂອງໂລກ ເພື່ອຢຸດຢັ້ງການແຜ່ລະບາດຂອງພະຍາດໂຄວິດ-19 ຫຼ້າສຸດເມື່ອທ້າຍອາທິດຜ່ານ ບໍລິສັດ ຟາຍເຊີ ອິ້ງ ຜູ້ຜະລິດຢາລາຍໃຫຍ່ຂອງສະຫະລັດ ໄດ້ເປີດຕົວຢາເມັດຕ້ານໂຄວິດ-19 ຊື່ “ແພັກໂລວິດ” (PAXLOVID) ພ້ອມເປີດເຜີຍຂໍ້ມູນຜົນການທົດລອງໄລຍະທີ 3 ເຊິ່ງເປັນໄລຍະສຸດທ້າຍວ່າ ມີປະສິດທິພາບເຖິງ 89% ໂດຍຜູ້ບໍລິຫານຂອງຟາຍເຊີ ລະບຸວ່າ ຂ່າວດີຄັ້ງນີ້ ເປັນຕົວປ່ຽນເກມຢ່າງແທ້ຈິງ ໃນຄວາມພະຍາຍາມຢຸດການແຜ່ລະບາດຂອງພະຍາດໂຄວິດ-19.
ຄວາມເຄື່ອນໄຫວຫຼ້າສຸດຂອງຟາຍເຊີ ຈຶ່ງເປັນການສົ່ງສັນຍານທ້າທາຍເຖິງຢາເມັດ ໂມລນູພີຣາເວຍ (MOLNUPIRAVIR) ທີ່ຮ່ວມກັນພັດທະນາໂດຍ ບໍລິສັດເມີກ ແອນ ໂຄ ແລະ ບໍລິສັດ ຣິດແບັກ ໄບໂອເທຣາພິວຕິກ ເຊິ່ງໄດ້ຮັບການອະນຸມັດນຳໃຊ້ປິ່ນປົວຜູ້ຕິດເຊື້ອໃນສະຫະຣາຊະອານາຈັກແລ້ວ, ຂະນະທີ່ອີກຫຼາຍປະເທດ ກໍກຳລັງພິຈາລະນານຳໃຊ້ແບບສຸກເສີນ.
ທັງນີ້ ຜົນການທົດລອງໄລຍະທີ 3 ຢາເມັດຂອງຟາຍເຊີລະບຸວ່າ ສາມາດຫຼຸດອັດຕາການເຂົ້າໂຮງໝໍ ຫຼື ຫຼຸດອັດຕາການເສຍຊີວິດລົງເຖິງ 90%, ຂະນະທີ່ຢາ ໂມລນູພີຣາເວຍ ຂອງບໍລິສັດເມີກ ສາມາດຫຼຸດອັດຕາການເຂົ້າໂຮງໝໍ ຫຼື ເສຍຊີວິດ 50% ໂດຍຂໍ້ມູນຈາກທັງ 2 ບໍລິສັດລະບຸວ່າ ຢາເມັດຕ້ານໂຄວິດ-19 PAXLOVID ແລະ MOLNUPIRAVIR ຄວນໃຫ້ຜູ້ປ່ວຍໂຄວິດ-19 ຮັບປະທານວັນລະ 2 ຄັ້ງ ຕິດຕໍ່ກັນເປັນເວລາ 5 ວັນ.
ບໍລິສັດຟາຍເຊີ ເປີດເຜີຍວ່າ ຈະຜະລິດຢາ ແພັກໂລວິດ ໃຫ້ໄດ້ 180.000 ແຜງພາຍໃນທ້າຍປີນີ້ ແລະ ເພີ່ມຂຶ້ນເປັນ 20 ລ້ານແຜງ ໃນປີ 2022, ຂະນະທີ່ບໍລິສັດເມີກ ລະບຸວ່າ ຈະຜະລິດຢາ ໂມລນູພີຣາເວຍ ໃຫ້ໄດ້ 10 ລ້ານຄອສ (ຊຸດ) ພາຍໃນປີນີ້ ແລະ ເພີ່ມເປັນ 20 ລ້ານຊຸດໃນປີ 2022.
ແນວໃດກໍຕາມ ຜູ້ຊ່ຽວຊານລະບຸວ່າ ຂະນະນີ້ ຍັງບໍ່ສາມາດນຳຢາທັງ 2 ຊະນິດນີ້ ມາປຽບທຽບກັນໄດ້ ຈົນກວ່າຈະຮູ້ຂໍ້ມູນຄວາມສ່ຽງຕໍ່ຜູ້ປ່ວຍທີ່ຊັດເຈນກວ່ານີ້.