ລັດຖະມົນຕີ ກະຊວງອຸດສາຫະກໍາ ແລະ ການຄ້າ ຕ້ອນຮັບຄະນະຜູ້ແທນຍີ່ປຸ່ນ

446

ທ່ານ ຄໍາແພງ ໄຊສົມແພງລັດຖະມົນຕີ ກະຊວງອຸດສາຫະກໍາ ແລະ ການຄ້າ (ອຄ) ໄດ້ຕ້ອນຮັບທ່ານ ຄາຊຶອິຈິ ອິວະຄະມິ ຫົວໜ້າອົງການ JETRO ເຂົ້າຢ້ຽມຄໍານັບອຳລາ ແລະ ໄດ້ຕ້ອນຮັບທ່ານ ຢາຊູຊ ຄິຄຸຈິ ຫົວໜ້າອົງການ JETRO ຜູ້ໃໝ່ ປະຈໍາ ສປປ ລາວໃນວັນທີ 9 ພະຈິກ ທີ່ ກະຊວງ ອຄ.


ທ່ານ ຄໍາແພງ ໄຊສົມແພງ ໄດ້ສະແດງຄວາມຕ້ອນຮັບ, ຊົມເຊີຍ ຕໍ່ທ່ານຄາຊຶອິຈິ ອິວະຄະມິ ຫົວໜ້າອົງການ JETRO ທີ່ໄດ້ມາປະຕິບັດໜ້າທີ່ຢູ່ ສປປ ລາວຈົນສໍາເລັດ ຊຶ່ງເປັນການປະກອບສ່ວນ ຮັດແໜ້ນສາຍພົວພັນມິດຕະພາບແລະການຮ່ວມມື ລະຫວ່າງ ສອງປະເທດ ລາວ-ຍີ່ປຸ່ນ ທີ່ເຄີຍມີມາແລ້ວນັ້ນໃຫ້ນັບມື້ຂະຫຍາຍສູ່ລວງເລິກ ແລະ ພ້ອມທັງຕີລາຄາສູງຕໍ່ການຮ່ວມມືທີ່ ອົງການ JETRO ໄດ້ໃຫ້ການສະໜັບສະໜູນ ແລະ ຊ່ວຍເຫຼືອບັນດາພະນັກງານລາວ, ກໍຄື ບັນດານັກທຸລະກິດຂະໜາດນ້ອຍ,ຂະໜາດກາງຂອງລາວ ມາໂດຍຕະຫຼອດ.


ໃນໂອກາດນີ້ ທ່ານ ຄໍາແພງ ໄຊສົມແພງ ກໍໄດ້ຂອບໃຈຕໍ່ທ່ານ ຄາຊຶອິຈິ ອິວະຄະມິ ກໍຄື ອົງການ JETRO ທີ່ໄດ້ໃຫ້ການຊ່ວຍເຫຼືອສະໜັບສະໜູນ ກະຊວງ ອຄ ກໍຄືບັນດານັກທຸລະກິດໃນລາວ, ຂໍອວຍພອນໃຫ້ທ່ານຄາຊຶອິຈິ ອິວະຄະມິ, ຈົ່ງເດີນທາງກັບປະເທດດ້ວຍຄວາມສະຫວັດດີພາບ.