ໝູທອດນ້ຳປາ ສູດກອບ ຫອມ ແຊບ ກິນໄດ້ແບບເພີນໆ

435

ສະບາຍດີແຟນຂ່າວເສດຖະກິດ-ການຄ້າ ມື້ນີ້ຜູ້ຂຽນຈະມານຳສະເໜີ ສູດອາຫານທີ່ສາມາດເຮັດກິນເອງໄດ້ ແລະ ຍັງສາມາດນຳໄປຕໍ່ຍອດເຮັດຂາຍກໍດີ ວັດຖຸດິບກໍຫາໄດ້ງ່າຍ ຂັ້ນຕອນບໍ່ຫຍຸ້ງຍາກ ແລະ ທີ່ສຳຄັນກອບແຊບຖືກປາກທຸກຄົນແນ່ນອນ ກັບເມນູ “ໝູທອດນ້ຳປາ” ທີ່ສຳຄັນເຮົາມີເຕັກນິກການໃນການບໍ່ເຮັດໃຫ້ນ້ຳມັນແຕກ ແລະ ບໍ່ເຮັດໃຫ້ໝູຕິດໝໍ້ກະທະໃນເວລາຈືນພ້ອມ.

ສ່ວນປະກອບ

["]

ໝູສາມຊັ້ນ 500 ກຣາມ

ນ້ຳປາ 3-4 ບ່ວງແກງ

ພິກໄທບົດ ເລັກໜ້ອຍ

ຜົງປຸງລົດ ເລັກໜ້ອຍ

ແປ້ງທອດກອບ 5-7 ບ່ວງແກງ

ໄຂ່ໄກ່ 1 ໜ່ວຍ

ນ້ຳເຢັນ

ນ້ຳມັນສຳລັບຈືນ

ນ້ຳສົ້ມສາຍຊູ ½ ບ່ວງແກງ

ເກືອ ເລັກໜ້ອຍ

ຂັ້ນຕອນໃນການເຮັດໝູທອດນ້ຳປາ

1 ຂັ້ນຕອນທຳອິດໃຊ້ສ້ອມຈິ້ມໝູສາມຊັ້ນໃຫ້ທົ່ວ ແລ້ວນຳໄປໝັກກັບນ້ຳປາ, ພິກໄທບົດ ແລະ ຜົງປຸງລົດ ໃສ່ແປ້ງທອດກອບ ແລະ ໄຂ່ລົງໄປ ເອື້ອບໃຫ້ເຂົ້າກັນດີ ໃນລະວ່າງທີ່ຄົນໃຫ້ເຕີມນ້ຳລົງໄປເອື້ອບໄປນຳ ຈາກນັ້ນປະໄວ້ 30 ນາທີ.

2 ກຽມໝໍ້ກະທະຈືນໝູ ໂດຍໃສ່ນ້ຳມັນລົໄປໃນໝໍ້ ກະໃຫ້ຖ້ວມຈອນໝູຂອງເຮົາ ໃສ່ນ້ຳສົ້ມສາຍຊູ ແລະ ເກືອເລັກໜ້ອຍລົງໃນນ້ຳມັນ (ເພື່ອປ້ອງກັນບໍ່ໃຫ້ນ້ຳມັນແຕກ ແລະ ບໍ່ໃຫ້ໝູຕິດໝໍ້ໃນຂະນະຈືນ).

3 ໃສ່ໄຟແຮງ ພໍນ້ຳມັນຮ້ອນກໍນຳເອົາໝູທີ່ເອື້ອບໄວ້ນັ້ນລົງໄປຈືນຈົນໃຫ້ໝູປ່ຽນເປັນສີເຫຼືອງອົມນ້ຳຕານໜ້ອຍໜື່ງ ກໍສາມາດຕັກຂຶ້ນມາພັກສະເດັດນ້ຳມັນໄດ້ເລີຍ.

4 ຈາກນັ້ນກໍນຳເອົາໝູທອດນ້ຳປາ ມາສັບໃຫ້ເປັນຕ່ອນພໍດີຄຳ ຈັດໃສ່ຈານພ້ອມເສີບ ກິບກັບເຂົ້າໜຽວຮ້ອນໆ ຫຼື ຕຳໝາກຫຸ່ງແຊບໆ ເຂົ້າກັນສຸດໆ.