ເປີດຕະຫຼາດຊຸມຊົນພູຜາສຸກ ບ້ານຄຳທອງ ເມືອງ ແລະ ແຂວງສາລະວັນ

556

ໃນວັນທີ 5 ພະຈິກນີ້ ທີ່ບ້ານຄຳທອງ ເມືອງສາລະວັນ ກໍໄດ້ມີພິທີມອບ-ຮັບ ແລະ ເປີດນຳໃຊ້ຢ່າງເປັນທາງການ ໂດຍການເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ມີບັນດາທ່ານການນຳຂັ້ນແຂວງ, ການນຳຂັ້ນເມືອງ, ພະແນກການ, ຫ້ອງການອ້ອມຂ້າງເມືອງ, ຜູ້ປະກອບການ, ນັກທຸລະກິດ ຕະຫຼອດຮອດອົງການປົກຄອງບ້ານ, ປະຊາຊົນ ເຂົ້າຮ່ວມ.


ທ່ານ ຄຳຜ່ານ ສີລາວີ ຫົວໜ້າພະແນກອຸດສາຫະກຳ ແລະ ການຄ້າແຂວງ ໄດ້ລາຍງານວ່າ: ໂຄງການກໍ່ສ້າງຕະຫຼາດຊຸມຊົນພູຜາສຸກ ບ້ານຄຳທອງ ເປັນການສືບຕໍ່ປະຕິບັດແຜນພັດທະນາເສດຖະ ກິດ-ສັງຄົມ 5 ປີ, ຄັ້ງທີ VIII ຂອງອົງຄະນະພັກແຂວງ, ເປັນໂຄງການບຸລິມະສິດທີ່ກຳນົດໄວ້ໃນກິດຈະກຳການພັດທະນາແຫຼ່ງທ່ອງທ່ຽວອຸທິຍານທິຍານພູຜາສຸກ ແລະ ເປັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ, ຄັ້ງທີ IX ຂອງອົງຄະນະພັກແຂວງ. ໂຄງການດັ່ງກ່າວໄດ້ເລີ່ມລົງມືກໍ່ສ້າງນັບແຕ່ວັນທີ 2 ສິງຫາ ແລະ ສຳເລັດວັນທີ 4 ພະຈິກ 2021 ໂດຍມີບັນດາໜ້າວຽກທີ່ລົງມືປະຕິບັດ 7 ໜ້າວຽກ ຄື : ກໍ່ສ້າງອາຄານຕະຫຼາດ 1 ຫຼັງ, ຫ້ອງນໍ້າ 1 ຫຼັງ, ມີ 4 ຫ້ອງ ພ້ອມດ້ວຍຖັງເກັບນ້ຳ, ລະບົບໂທລະໂຄ່ງ, ຫ້ອງການບ້ານ ແລະ ຫ້ອງການຈັດສັນຕະຫຼາດ ມີມູນຄ່າການກໍ່ສ້າງທັງໝົດ 340 ລ້ານກວ່າກີບ ໂດຍໄດ້ຮັບທຶນໃນການກໍ່ສ້າງຈາກການປຸກລະດົມ ແລະ ການປະກອບສ່ວນຈາກພາກລັດ, ເອກະຊົນ ແລະ ນັກທຸລະກິດ, ຜູ້ປະກອບຕ່າງໆ.


ໂອກາດດຽວກັນນີ້, ທ່ານ ສົມໃຈ ອຸ່ນຈິດ ໄດ້ໂອ້ລົມ ໂດຍໄດ້ເນັ້ນໃຫ້ເອົາໃຈໃສ່ໃນການຄຸ້ມຄອງ, ປົກປັກຮັກສາ ແລະ ນຳໃຊ້ຕະຫຼາດດັ່ງກ່າວໃຫ້ເປັນປະໂຫຍດ, ໃຫ້ມີຄວາມຍືນຍົງ, ນຳໃຊ້ຢ່າງຍາວນານ ແລະ ເປັນຊັບສິນສ່ວນລວມຂອງທຸກໆຄົນ ແນໃສ່ເຮັດໃຫ້ຂະບວນການຊື້-ຂາຍ ມີຄວາມຟົດຟື້ນ ແລະ ຫຼາຍຂຶ້ນເລື້ອຍໆ. ຈາກນັ້ນ, ທ່ານຮອງເຈົ້າແຂວງ ກໍໄດ້ມອບໃບຍ້ອງຍໍໃຫ້ແກ່ບັນດາພະແນກການ ແລະ ຫົວໜ່ວຍທຸລະກິດຕ່າງໆ ທີ່ປະກອບສ່ວນທຶນຮອນຊ່ວຍເຫຼືອເຂົ້າໃນການກໍ່ສ້າງ, ມີທັງໝົດ 30 ກວ່າກົມກອງ, 59 ທ່ານ. ຈາກນັ້ນ, ກໍໄດ້ມີພິທີຕັດແຖບຜ້າ, ເປີດປ້າຍ ໃຊ້ຢ່າງເປັນທາງການ ແລະ ພ້ອມກັນປ່ອຍສັດກັບຄືນສູ່ທຳມະຊາດຕື່ມອີກ.

ພາບ-ຂ່າວ: ສິດຕາ ເພັດວົງສາ

["]