ສຳນັກຂ່າວຕ່າງປະເທດລາຍງານເມື່ອວັນທີ 4 ພະຈິກ 2021 ວ່າ ມີ 190 ກວ່າປະເທດ ແລະ ອົງການຈັດຕັ້ງສາກົນໄດ້ຮ່ວມກັນໃຫ້ຄຳໝັ້ນສັນຍາຕໍ່ກອງປະຊຸມລັດພາຄີອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບດິນຟ້າອາກາດ ຕາມກອບຂອງອະນຸສັນຍາສະຫະປະຊາຊາດ ວ່າດ້ວຍການປ່ຽນແປງສະພາບດິນຟ້າອາກາດ (UNFCCC) ຄັ້ງທີ 26 ຫຼື COP 26 ວ່າ ຈະຢຸຕິການໃຊ້ພະລັງງານໄຟຟ້າຈາກຖ່ານຫີນ ແລະ ຢຸດຕິການສ້າງໂຮງໄຟຟ້າຈາກຖ່ານຫີແຫ່ງໃໝ່.
ທັງນີ້ ກຸ່ມປະເທດທີ່ມີເສດຖະກິດຂະໜາດໃຫຍ່ໃຫ້ຄຳໝັ້ນສັນຍາວ່າ ຈະຢຸດຕິການນຳໃຊ້ພະລັງງານຈາກຖ່ານຫີນພາຍໃນປີ 2030, ສ່ວນກຸ່ມປະເທດທີ່ມີລາຍຮັບປານກາງ ແລະ ປະເທດທຸກຍາກ ໃຫ້ຄຳໝັ້ນສັນຍາວ່າ ຈະຢຸດຕິການນຳໃຊ້ພະລັງງານຈາກຖ່ານຫີນໃນປີ 2040 ແຕ່ວ່າ ຈີນ ກັບ ອິນເດຍ ເຊິ່ງເປັນປະເທດທີ່ນຳໃຊ້ພະລັງງານຈາກຖ່ານຫີນເປັນອັນດັບຕົ້ນໆຂອງໂລກ ບໍ່ໄດ້ຮ່ວມລົງນາມໃນຄັ້ງນີ້.
ເຖິງແມ່ນວ່າ ນານາປະເທດຈະມີຄວາມພະຍາມຍາມໃນການຫຼຸດຜ່ອນການນຳໃຊ້ພະລັງງານຈາກຖ່ານຫີນຢ່າງຕໍ່ເນື່ອງ ແຕ່ສະຖິຕິໃນປີ 2019 ຊີ້ໃຫ້ເຫັນວ່າ 37% ຂອງກະແສໄຟຟ້າທີ່ໃຊ້ກັນທົ່ວໂລກ ມາຈາກພະລັງງານຖ່ານຫີນ. ຂະນະທີ່ລັດຖະມົນຕີກະຊວງການເງິນຂອງອິນໂດເນເຊຍ ກ່າວວ່າ ອິນໂດເນເຊຍ ເປັນປະເທດທີ່ປ່ອຍອາຍກາກບອນເປັນອັນດັບ 8 ຂອງໂລກ ແລະ ເປັນຜູ້ຜະລິດຖ່ານຫີນລາຍໃຫຍ່ທີ່ສຸດຂອງໂລກ ໄດ້ມີຄວາມພະຍາຍາມຫຼຸດຜ່ອນການນຳໃຊ້ຖ່ານຫີນລົງ ແລະ ຄາດວ່າ ຈະຢຸດຕິການນຳໃຊ້ຢ່າງສິ້ນເຊີງໃນປີ 2040 ຫາກໄດ້ຮັບການສະໜັບສະໜູນດ້ານການເງິນຈາກອົງການສິ່ງແວດລ້ອມໂລກ.