ອັດຕະປືເດັດຂາດ ຫ້າມຂາຍຊີ້ນໝູເກີນ 45.000 ກີບຕໍ່ໂລ ລະເມີດໃໝ 1.500.000 ກີບ

874

ບັນຫາສິນຄ້າແພງ ແລະ ໂກງຕາຊີງ ແມ່ນຕ້ອງໄດ້ແກ້ໄຂຢ່າງຮີບດ່ວນ ເນື່ອງຈາກເປັນການເອົາລັດເອົາປຽບຜູ້ຊື້ ຍິ່ງຢູ່ໃນສະພາບເສດຖະກິດເປັນແບບນີ້ ທຸກຄົນຍິ່ງຕ້ອງເຫັນອົກເຫັນໃຈຊ່ວຍເຫຼືອກັນບໍ່ແມ່ນການເອົາປຽບ.

ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ວັນທີ 3 ພະຈິກ 2021 ນີ້, ທ່ານ ພູໄຊ ວໍລະລາດ ຮອງຫົວໜ້າພະແນກອຸດສະຫະກຳ ແລະ ການຄ້າແຂວງອັດຕະປື ສົມທົບກັບຫ້ອງການອຸດສະຫະກຳ ແລະ ການຄ້າເມືອງສາມັກຄີໄຊ ລົງຕິດຕາມ, ກວດກາ ແລະ ປັບລາຄາສິນຄ້າຕາມທ້ອງຕະຫລາດ ເມືອງສາມັກຄີໄຊ ໂດຍສະເພາະ ຊີ້ນໝູ ແມ່ນຫ້າມຂາຍເກີນລາຄາ 45.000 ກີບ.

["]

ການລົງຕິດຕາມ, ກວດກາໃນຄັ້ງນີ້, ກໍເພື່ອລົງຊີ້ນໍາ ແລະ ປັບລາຄາສິນຄ້າເປັນ ຕົ້ນ ສິນຄ້າປະເພດຊີ້ນໝູ, ກວດກາມາດຕະຖານຊິງຊັ່ງ (ກິໂລ) ພ້ອມໄດ້ກໍານົດລາຄາຊີ້ນໝູ ມີດັ່ງນີ້: ຊີ້ນສັນ (ປະເພດ1) ໃຫ້ຂາຍໃນລາຄາ 45.000 ກີບ/ກິໂລ, ຊີ້ນກ້ອນຂາ(ປະເພດ1) ໃຫ້ຂາຍໃນລາຄາ 45.000 ກີບ/ກິໂລ, ຊີ້ນໝູສາມຊັ້ນ, ດູກຂ້າງ ແລະ ເຄື່ອງໃນ (ຫົວໃຈ,ຕັບ) ໃຫ້ຂາຍໃນລາຄາ 40.000 ກີບ/ກິໂລ, ຂາທັງສີ່ຂາ ໃຫ້ຂາຍໃນລາຄາ 35.000 ກີບ/ກິໂລ, ຫົວໝູໃຫ້ຂາຍໃນລາຄາ 35.000 ກີບ/ກິໂລ, ໄສ້ອ່ອນ+ໄສ້ແກ່ໃຫ້ຂາຍໃນລາຄາ 20.000 ກີບ/ກິໂລ, ກະດູກໂຄ່ຍ 30.000 ກີບ/ກິໂລ, ນໍ້າມັນ+ຊີ້ນມຸ່ນ 20.000 ກີບ/ກິໂລ.

ພ້ອມທັງ ຫ້າມເດັດຂາດ ບໍ່ໃຫ້ຜູ້ປະກອບການລັກໂລບການຊັ່ງຜອງ ຫລື ນໍາໃຊ້ການຊັ່ງຜອງຂອງຊິງຊັ່ງທີ່ດັດແປງ ໂດຍບໍ່ຖືກຕ້ອງຕາມມາດຕະຖານ ເຕັກນິກຢ່າງເດັດຂາດ, ຫາກຜູ້ໃດລະເມີດ, ສວຍໂອກາດຂຶ້ນລາຄາສິ້ນຄ້າ(ຊີ້ນໝູ) ເກີນທີ່ກຳນົດແມ່ນຈະໄດ້ປັບ.ໝ 1.500.000 ກີບ/ຄັ້ງ, ສວຍໂອກາດປອມແປງຕາຊິງ ຫລື ດັດແປງການວັດແທກທີ່ບໍ່ໄດ້ມາດຕະຖານຈະຖືກປັບໃໝ 100.000-3.000.000 ກີບ/ຄັ້ງ, ບໍ່ຕິດປ້າຍລາຄາເປັນສະກຸນເງິນກີບ ຈະມີໂທດປັບໃໝແຕ່ 500.000-1.000.000 ກີບ/ຄັ້ງ, ຖ້າຜູ້ປະກອບການຫາກມີການລະເມີດເປັນອາຈີນ ແມ່ນຈະຖືກດຳເນີນຄະດີຕາມກົດໝາຍມາດຕາ 147 ແລະ 150 ຂອງກົດໝາຍອາຍາ ແລະ ຈະໃຫ້ຢຸດການດຳເນີນກິດຈະການທັນທີ.

ຈາກ: ປະເທດລາວ