ກາສີ ລົງສັກວັກຊີນຮອດເຮືອນສຳລັບຜູ້ບໍມີເງື່ອນໄຂ ເດີນທາງມາເອງ

463

ໂຄວິດ-19 ລາມໄປບໍ່ມີຢຸດ ກຸ່ມເປົ້າໝາຍໃນການສັກວັກຊິນ ແມ່ນລັດຖະບານໄດ້ໃຫ້ຄວາມສຳຄັນເປັນຢ່າງຍິ່ງ ທັງນີ້ກໍ່ເພື່ອຫຼຸດຜ່ອນຄວາມຮ້າຍແຮງ ຂອງເຊື້ອພະຍາດໂຄວິດ19 ທັງເຮັດໃຫ້ອັດຕາການສັກວັກຊິນໄດ້ຕາມແຜນທີ່ໄດ້ວາງໄວ້ ພາຍໃນປີ 2021 ນີ້.

ໃນລະຫວ່າງວັນທີ 28 ຕຸລາ ຫາວັນທີ 09 ພະຈິກ 2021ນີ້ , ທີມງານແພດ-ຫມໍ ຫ້ອງການສາທາລະນະສຸກເມືອງກາສີ ແຂວງວຽງຈັນ ແມ່ນຈະໄດ້ລົງເຄື່ອນໄຫວສັກວັກຊີນປ້ອງກັນພະຍາດໂຄວິດ-19 ໃຫ້ບັນດາພໍ່ແມ່ປະຊາຊົນກຸ່ມເປົ້າຫມາຍຢູ່ບັນດາບ້ານໃນທົ່ວເມືອງກາສີ

["]

ເຊີ່ງນຳທີມລົງສັກຢາໃນຄັ້ງນີ້ໂດຍແມ່ນ ທ່ານ ດຣ ພູທອນ ຈັນທະມຸງຄຸນ ຫົວຫນ້າຫນ່ວຍງານສົ່ງເສີມສຸຂະພາບ ໂຮງຫມໍເມືອງກາສີ ທັງເປັນຜູ້ຊີ້ນຳວຽກງານສັກຢາກັນພະຍາດຢູ່ເມືອງກາສີ. ສຳລັບຢາວັກຊີນທີ່ເມືອງໄດ້ຮັບໃນຄັ້ງນີ້ແມ່ນມີຈຳນວນ 2.000 ໂດສ໌ (ປະເພດຊີໂນຟາມ)

ສ່ວນວ່າເປົ້າຫມາຍຜູ້ທີ່ຈະໄດ້ຮັບວັກຊີນແມ່ນ ຜູ້ທີ່ມີອາຍຸແຕ່ 17 ປີຂື້ນໄປ, ແມ່ຍິງຖືພາ 12 ອາທິດຂື້ນໄປ, ແມ່ລູກອ່ອນໃຫ້ນົມລູກ, ຜູ້ອາຍຸສູງເກີນ 60 ປີຂື້ນໄປ ແລະ ຜູ້ທີ່ມີພະຍາດປະຈຳໂຕທີ່ບໍ່ຮຸນແຮງ. ໃນໄລຍະຜ່ານມາເມືອງກາສີສາມາດສັກວັກຊີ້ນໄດ້ແລ້ວ 48% ຂອງປະຊາກອນທົ່ວເມືອງ.

ເຊິ່ງໃນວັນທີ 31 ຕຸລາ ທີ່ຜ່ານມານີ້ ທາງສູນຂ່າວສານການແພດສຸຂະສຶກສາ ກໍ່ໄດ້ລາຍງານຈຳນວນ ທີ່ໄດ້ຮັບວັກຊິນທົ່ວປະເທດຄື: ຮັບວັກຊິນເຂັມທີ 1 ໄປແລ້ວແມ່ນ 3.311.915 ອັດຕາປົກຄຸມຢູ່ທີ່ 45,14%, ຮັບວັກຊິນຄົບ ແມ່ນ 2.843.816 ອັດຕາປົກຄຸມແມ່ນ 38,76% ຕາມການລາຍງານແມ່ນມີພຽງ 2 ແຂວງເທົ່ານັ້ນ ທີ່ມີອັດຕາປົກຄຸມ 50% ຂຶ້ນໄປ ນັ້ນໄດ້ແກ່ ນະຄອນຫຼວງວຽງຈັນ ແລະ ແຂວງ ບໍ່ແກ້ວ.( ຈາກ: ສູນຂ່າວສານການແພດສຸຂະສຶກສາ 31 ຕຸລາ 2021 )