ແມນເຊັສເຕີ ຢູໄນເຕັດ ພາຍໃຕ້ການນໍາທີມຂອງ ໂອເລ ກຸນນາ ໂຊລຊາ ຄືນຟອມ ເອົາຊະນະ ທ໊ອດແນມ ຮ໊ອດສະເປີ 3-0 ໃນການແຂ່ງຂັນພຣີເມຍລີກ ອັງກິດ ເມື່ອວັນທີິ 30 ຕຸລາ 2021 ເຊິ່ງເປັນການເກັບໄຊຊະນະນັດທໍາອິດໃນຮອບ 5 ນັດ ພ້ອມເກັບເພີ່ມເປັນ 17 ຄະແນນເລື່ອນຂຶ້ນໄປຢູ່ອັນດັບທີ 5 ຂອງຕາຕະລາງຄະແນນລວມ.
ນັດດັ່ງກ່າວ ຄຣິສເຕຍໂນ ໂຣນັລໂດ ກອງໜ້າຂອງ ແມນເຊັສເຕີ ຢູໄນເຕັດ ສ້າງຜົນງານຢ່າງໂດດເດັ່ນທັງຍິງທັງສົ່ງໃຫ້ຍິງ ໂດຍຍິງປະຕູໃຫ້ທີມຂຶ້ນນໍາ 1-0 ນາທີໆ 39 ກ່ອນທີ່ຈະສົ່ງບານໃຫ້ກັບ ເອດິນສັນ ຄາວານີ ຍິງປະຕູໃຫ້ ແມນຢູ ໜີຫ່າງເປັນ 2-0 ນາທີໆ 64 ແລະ ສຸດທ້າຍ ມາຄາສ ແຣຊຟອດ ມາຍິງປະຕູຕ໊ອກຊໍ້າໄຊຊະນະໃຫ້ກັບ ແມນເຊັສເຕີ ຢູໄນເຕັດ ເອົາຊະນະ ສະເປີ ໄປຂາດລອຍ 3-0.
ນອກນັ້ນ, ໄຊຊະນະນັດນີ້ຍັງເປັນໄຊຊະນະນັດທໍາອິດໃນຮອບ 5 ນັດໃນພຣີເມຍລີກ ອັງກິດ ຫຼັງກ່ອນໜ້ານີ້ຊະນະ ເວັສແຮມ ຢູໄນເຕັດ 2-1, ແຕ່ອີກ 4 ນັດຖັດມາບໍ່ສາມາດເກັບໄຊຊະໄດ້ເລີຍ ໄດ້ແກ່ເສຍໃຫກັບ ເອັສຕັນ ວິລລາ 0-1, ສະເໝີ ເອັຟເວີຕັນ 1-1, ເສຍໃຫ້ກັບ ເລັສເຕີ ຊິຕີ້ 2-4 ແລະ ເສຍຫ້ກັບ ລິເວີພູລ 0-5.
ຮູບຈາກ: AP