ແຂວງບໍ່ແກ້ວ ກຽມໂຮງໝໍສະໜາມ ຮອງຮັບກໍລະນີຄົນຕິດເຊື້ອໂຄວິດ-19 ເພີ່ມຂຶ້ນ

630

ສະພາບການລະບາດພະຍາດໂຄວິດ-19 ຢູ່ແຂວງ ບໍ່ແກ້ວ ໃນວັນທີ 29 ຕຸລາ 2021 ອີງຕາມແຫຼ່ງຂໍ້ມູນ ພະແນກສາທາລະນະສຸກແຂວງ, ຫ້ອງວິເຄາະໂຮງໝໍແຂວງ ໄດ້ກວດຕົວຢ່າງໃໝ່ ຈໍານວນ 472 ຕົວຢ່າງ, ພົບກໍລະນີຜູ້ຕິດເຊື້ອບວກໃໝ່ໃນຊຸມຊົນ 52 ຄົນ: ໃນນັ້ນ ແມ່ນເມືອງ ຫ້ວຍຊາຍ 52 ຄົນ ບ້ານປ່າອ້ອຍ 38 ຄົນ, ບ້ານນໍ້າງາວ 4 ຄົນ, ບ້ານໜອງຄຳ 3 ຄົນ, ບ້ານຫ້ວຍຊາຍເໜືອ 2 ຄົນ, ບ້ານອຸດົມ 2 ຄົນ, ບ້ານປາກງາວ 1 ຄົນ, ບ້ານໂພນໄຊ 1 ຄົນ, ບ້ານຫ້ວຍຊາຍໃຕ້ 1 ຄົນ. ທົ່ວແຂວງບໍ່ແກ້ວ ມີຜູ້ຕິດເຊື້ອສະສົມທັງໝົດຈໍານວນ 1,783 ຄົນ, ປິ່ນປົວຫາຍດີ 1,417 ຄົນ, ພວມປິ່ນປົວ 365 ຄົນ , ປົວດີໃໝ່ 10 ຄົນ, ເສຍຊີວິດສະສົມ 01 ຄົນ.

ປະຈຸບັນແມ່ນປິ່ນປົວຢູ່ 7 ແຫ່ງຄື: ໂຮງໝໍແຂວງ, ສູນປີ່ນປົວທະຫານແຂວງ, ສູນປີ່ນປົວມົກກະຈອກ, ໂຮງໝໍເມືອງຕົ້ນເຜີ້ງ, ໂຮງໝໍສະໜາມເມືອງປາກທາ, ໂຮງໝໍເມືອງຜາອຸດົມ ແລະ ໂຮງໝໍສະໜາມເຂດເສດຖະກິດພິເສດແຂວງບໍ່ແກ້ວ. ຕໍ່ກັບສະພາບການດັ່ງກາວ ຄະນະສະເພາກິດແຂວງບໍ່ແກ້ວ ຈິ່່ງໄດ້ສືບຕໍ່ຂະຫຍາຍ ໂຮງໝໍສະໜາມເພິ້້ມ ຢູ່ເມືອງຫ້ວຍຊາຍ ໂດຍສືບຕໍ່ກຳນົດເອົາສະໂມສອນໃຫຍ່ຂອງແຂວງ ບໍ່ແກ້ວ ເປັນໂຮງໝໍສະໜາມຄັ້ງທີ II.

["]

ຈິ່ງໄດ້ພ້ອມກັນອອກແຮງງານລວມ ໂດຍການອານາໄມ, ປັດກວາດ, ຈັດຕຽງນອນ ໃຫ້ເປັນລະບຽບ ໂດຍນໍາໃຊ້ກຳລັງແຮງານຂອງຊາວໜຸ່ມຕະລຸ່ມບ່ອນ, ນຳໂດຍ ທ່ານ ນາງ ດວງຕາ ໄຊຍະຫົງ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງບໍ່ແກ້ວ ເພື່ອກຽມຄວາມພ້ອມຮອບດ້ານໃນການຂະຫຍາຍສະຖານທີ່ປິ່ນປົວໃນໂຮງໝໍພາກສະໜາມ ເພື່ອຮອງຮັບຜູ້ຕິດເຊື້ອໂຄວິດ-19 ທີ່ອາດເພີ່ມຂຶ້ນເປັນຈໍານວນຫລາຍ ໃນກໍລະນີ ທີ່ຜູ້ຕິດເຊື້ອລົ້ນໂຮງໝໍ, ສະນັ້ນ ແຂວງບໍ່ແກ້ວໄດ້ສືບຕໍ່ກຳນົດເອົາ ສະໂມສອນໃຫຍ່ຂອງແຂວງ ເປັນໂຮງໝໍພາກສະໜາມ ເພື່ອກຽມເປັນໂຮງໝໍພາກສະໜາມຂັ້ນແຂວງ ແລະ ເປັນບ່ອນກັກກັນຜູ້ຕິດເຊື້ອໃນເມື່ອໂຮງໝໍບໍ່ພຽງພໍ ຫຼຸດຜ່ອນຄວາມແອອັດ.


ປະຈຸບັນການລະບາດນັບມື້ຮ້າຍແຮງ, ຜູ້ຕິດເຊື້ອນັບມື້ເພີ່ມຂຶ້ນ ຜູ້ຂຽນຂ່າວຂໍຮຽກ ຮ້ອງທຸກພາກສ່ວນຈົ່ງມີສະຕິ ແລະ ພ້ອມກັນປະຕິບັດມາດຕະການ ຕ້ານ ແລະ ປ້ອງກັນທີ່ຄະນະສະເພາະວາງອອກຢ່າງເຂັ້ມງວດ ໂດຍສະເພາະການປະຕິບັດຄຳສັ່ງ ເລກທີ 15/ນຍ,ຄຳສັ່ງ ຂອງຄະນະສະເພາະກິດ ເພື່ອປ້ອງກັນ,ຄວບຄຸມ ແລະ ແກ້ໄຂການລະບາດພະຍາດໂຄວິດ -19 ແຂວງບໍ່ແກ້ວ ເລກທີ 201 /ສພຂ,ບກ, ລົງວັນທີ 25 ຕຸລາ 2021, ຄຳແນະນຳຂອງຂະແໜງການກ່ຽວຂ້ອງ ຄຽງຄູ່ກັບການສືບຕໍ່ປະຕິບັດມາດຕະການປ້ອງກັນ ການຕິດເຊື້ອຢ່າງຖືກວິທີ ໂດຍການໃສ່ຜ້າອັດປາກ-ດັງ ເມື່ອອອກຈາກເຮືອນ, ລ້າງມືດ້ວຍສະບູ, ນໍ້າສະອາດ ຫລື ເຈວລ້າງມືຂ້າເຊື້ອເລື້ອຍໆ, ຮັກສາໄລຍະຫ່າງຢ່າງໜ້ອຍ 2 ແມັດຂຶ້ນໄປ ແລະ ຫລີກລ່ຽງການໄປສະຖານທີ່ແອອັດ.


ພາບ-ຂ່າວ: ຄຳພັນ ແກ້ວມະນີ