ອິນໂດເນເຊຍປະກາດ ພ້ອມເປັນສູນກາງການຜະລິດ ແລະ ສົ່ງອອກລົດໄຟຟ້າແຫ່ງອາຊຽນ ໂດຍຕັ້ງເປົ້າຜະລິດລົດໃຫຍ່-ລົດບັສໃຫ້ໄດ້ 1.000 ຄັນໃນປີໜ້າ, ຫຼັງຈາກທີ່ຈັບມືກັບບໍລິສັດຮຸນໄດສ້າງຕັ້ງໂຮງງານຜະລິດໃກ້ກັບນະຄອນຫຼວງຈາກາຕາ, ຂະນະທີ່ໂຮງງານຜະລິດແບັດເຕີຣີ (ໝໍ້ໄຟລົດ) ຈະເລີ່ມການຜະລິດໃນປີໜ້າເຊັ່ນດຽວກັນ.
ລັດຖະມົນຕີກະຊວງອຸດສາຫະກຳອິນໂດເນເຊຍເປີດເຜີຍວ່າ ອິນໂດເນເຊຍພ້ອມແລ້ວທີ່ຈະກ້າວຂຶ້ນເປັນສູນກາງແຫ່ງການຜະລິດ ແລະ ສົ່ງອອກລົດໄຟຟ້າໃນພູມີພາກອາຊີຕາເວັນອອກສຽງໃຕ້ ໂດຍໄລຍະທຳອິດຕັ້ງເປົ້າຜະລິດລົດໃຫຍ່ ແລະ ລົດບັສປະຈຳທາງໃຫ້ໄດ້ 1.000 ຄັນໃນປີ 2022.
ສຳນັກຂ່າວຊິນຮວາລາຍງານວ່າ ຂະບວນການຜະລິດລົດໄຟຟ້າຈະເລີ່ມຂຶ້ນໃນເດືອນມີນາ 2022 ພາຍໃຕ້ການດຳເນີນງານຂອງບໍລິສັດ ພີທີ ຮຸນໄດ ແມນູແຟັກເຈີຣິງ ອິນໂດເນເຊຍ (HMMI) ຂອງສາທາລະນະລັດເກົາຫຼີ ເຊິ່ງປັດຈຸບັນກຳລັງສ້າງຕັ້ງໂຮງງານຢູ່ໃນເຂດນິຄົມອຸດສາຫະກຳ ຊີກາຣັງ (Cikarang) ທາງທິດຕາເວັນອອກຂອງນະຄອນຫຼວງຈາກາຕາ.
ລັດຖະມົນຕີກະຊວງອຸດສາຫະກຳອິນໂດເນເຊຍ ກ່າວອີກວ່າ: ການຜະລິດລົດໄຟຟ້າ ສະແດງໃຫ້ເຫັນວ່າ ອຸດສາຫະກຳຂອງອິນໂດເນເຊຍ ກຳລັງກ້າວໄປສູ່ອຸດສາຫະກຳທີ່ເປັນມິດກັບສິ່ງແວດລ້ອມ ໂດຍໂຄງການດັ່ງກ່າວໄດ້ຕັ້ງເປົ້າໄວ້ວ່າ ຈະຜະລິດລົດໄຟຟ້າໃຫ້ໄດ້ 600.000 ຄັນໃນປີ 2030 ໂດຍຄາດວ່າ ຈະຊ່ວຍຫຼຸດການປ່ອຍມົນລະພິດຂຶ້ນສູ່ອາກາດໄດ້ສູງເຖິງ 2,7 ລ້ານໂຕນ ເຊິ່ງເປັນໄປຕາມນະໂຍບາຍຂອງອິນໂດເນເຊຍທີ່ຈະຫຼຸດການປ່ອຍອາຍພິດເຮືອນແກ້ວລົງ 29% ໃນປີ 2030.
ສ່ວນໂຮງງານຜະລິດແບັດເຕີຣີລົດໄຟຟ້າ ໄດ້ເລີ່ມລົງມືກໍ່ສ້າງເມື່ອເດືອນກັນຍາຜ່ານມາ ດ້ວຍເງິນລົງທຶນ 1,1 ຕື້ໂດລາສະຫະລັດ ເຊິ່ງເປັນການຮ່ວມມືລະຫວ່າງອິນໂດເນເຊຍ ແລະ ສາທາລະນະລັດເກົາຫຼີ ແລະ ຄາດວ່າ ຈະເລີ່ມດຳເນີນການຜະລິດໃນປີ 2022 ເຊັ່ນດຽວກັນ.