ສຳນັກຂ່າວຕ່າງປະເທດລາຍງານໃນວັນທີ 27 ຕຸລາ 2021 ວ່າ ອົງການ ສະຫະປະຊາຊາດ (ສປຊ) ເປີດເຜີຍບົດລາຍງານລະບຸວ່າ: ຄວາມໝາຍໝັ້ນ ຂອງປະເທດຕ່າງໆ ໃນຂະນະນີ້ ເພື່ອຫຼຸດການປ່ອຍອາຍພິດເຮືອນແກ້ວ ແຕ່ກັບເຮັດໃຫ້ອຸນຫະພູມໂລກເພີ່ມຂຶ້ນໂດຍສະເລ່ຍ 2,7% ອົງສາ ໃນສັດຕະວັດນີ້ ໂດຍລາຍງານດັ່ງກ່າວ ມີຂຶ້ນກ່ອນ ເປີດກອງປະຊຸມສຸດຍອດດ້ານສະພາບອາກາດ ຂອງ ສປຊ (COP26) ໃນອາທິດໜ້ານີ້.
ໃນບົດລາຍງານ ປະຈຳປີ ວ່າດ້ວຍການປ່ອຍອາຍພິດເຮືອນແກ້ວ ຂອງໂຄງການສິ່ງແວດລ້ອມ ແຫ່ງສະຫະປະຊາຊາດ (UNEP) ໄດ້ປຽບທຽບການປ່ອຍມົນລະພິດ ຕາມທີ່ເຄີຍຄາດການໄວ້ ກັບການກຳຈັດອຸນຫະພູມທີ່ເພີ່ມຂຶ້ນ ຕາມທີ່ໄດ້ຕົກລົງໄວ້ ຕາມຂໍ້ຕົກລົງປາຣີ ທີ່ເປັນໄປຕາມຂອບອະນຸສັນຍາ ສະຫະປະຊາຊາດ ວ່າດ້ວຍການປ່ຽນແປງດິນຟ້າອາກາດ.
ໃນລາຍງານ ໄດ້ລະບຸວ່າ: ຄຳໝັ້ນສັນຍາໃໝ່ຂອງປະເທດຕ່າງໆ ຈຳເປັນຕ້ອງຫຼຸດການປ່ອຍອາຍພິດເຮືອນແກ້ວ ເພີ່ມຂຶ້ນ 30% ເພື່ອຈຳກັດໃຫ້ອຸນຫະພູມໂລກເພີ່ມຂຶ້ນ 2 ອົງສາ ແລະ ຕ້ອງຫຼຸດການປ່ອຍອາຍພິດເຮືອນແກ້ວລົງອີກ 55% ເພື່ອໃຫ້ອຸນຫະພູມໂລກ ເພີ່ມຂຶ້ນ 1,5 ອົງສາ. ຂະນະດຽວກັນ ທ່ານ ອັນໂຕນີໂອ ກູເຕີເຣສ ເລຂາທິການ ສປຊ ກ່າວວ່າ: ຖ້າປະເທດຕ່າງໆ ຍັງບໍ່ຫຼຸດການປ່ອຍອາຍພິດເຮືອນແກ້ວຢ່າງຈິງຈັງ ອາດຈະບໍ່ບັນລຸເປົ້າໝາຍ ທີ່ຈຳກັດອຸນຫະພູມໂລກ ເພີ່ມຂຶ້ນ 1,5 ອົງສາ ແລະ ກຸ່ມປະເທດ ເສດຖະກິດແຖວໜ້າຂອງໂລກ ຫລື ຈີ 20 ຄວນໃຫ້ຄວາມສຳຄັນ ກັບເລື້ອງນີ້ ແລະ ຄວນໃຫ້ຄຳໝັ້ນສັນຍາ ຈະຫຼຸດການປ່ອຍອາຍພິດເຮືອນແກ້ວ ທີ່ສອດຄ່ອງກັບເປົ້າໝາຍທີ່ຈຳກັດ ອຸນຫະພູມໂລກ ເພີ່ມຂຶ້ນ 1,5 ອົງສາເທົ່ານັ້ນ.