ທົ່ວແຂວງບໍ່ແກ້ວ ມີ 27 ບ້ານແດງໃນ 4 ຕົວເມືອງ

425

ການລະບາດຂອງພະຍາດໂຄວິດ19 ຢູ່ແຂວງບໍ່ແກ້ວ ຕອນນີ້ແມ່ນຍັງຢູ່ໃນສະຖານະການທີ່ໜ້າເປັນຫ່ວງ ເຊິ່ງສະແດງໃຫ້ເຫັນເຖິງຕົວເລກຂອງຜູ້ຕິດເຊື້ອໃນແຕ່ລະວັນ, ຄະນະສະເພາະກິດກໍ່ໄດ້ມີການກຳນົດພື້ນທີ່ສ່ຽງ ຫຼື ບ້ານແດງ ເຊິ່ງມີເຖິງ 27 ບ້ານ, ແລະເປັນເລື່ອງໜ້າເສົ້າບັນຫາພະຍາດເກີດຂື້ນບໍ່ຢຸດຍ້ອນປະຊາຊົນໃນພື້ນທີ່ຍັງຖືເບົາ ຕາມການປະເມີນຂອງເຈົ້າໜ້າທີ່.

ຕາມບົດຖະແຫຼງຂ່າວ ຂອງ ດຣ ບຸນຍະເວດ ວົງຄຳຊາວ ຫົວໜ້າພະແນກສາທາລະນະສຸກ ແຂວງບໍ່ແກ້ວ ຮອງຫົວໜ້າສະເພາະກິດຂັ້ນແຂວງ ປະຈຳວັນທີ 26 ຕຸລາ 2021 ທົ່ວແຂວງມີ ບ້ານທີ່ຖືກກຳນົດເປັນ ບ້ານເຂດແດງຄື: ເມືອງຫ້ວຍຊາຍ: ບ້ານປ່າອ້ອຍ, ບ້ານ ສີໂພໄຊ, ບ້ານນໍ້າປອງ, ບ້ານ ຂອນແກ້ວ, ບ້ານອຸດົມ, ບ້ານປາກຮາວເໜືອ, ບ້ານຫ້ວຍຊາຍເໜືອ, ບ້ານດອນພ້າວ, ບ້ານນໍ້າມ້າ, ບ້ານໂພນທອງ, ບ້ານໂພນໄຊ, ບ້ານຫ້ວຍມ່ອນ, ບ້ານພິບຸນທອງ, ບ້ານວຽງໃໝ່, ບ້ານໍ້າງາວ, ບ້ານໜອງຊາຍ; ເມືອງປາກທາ: ບ້ານໂພນທອງ, ບ້ານກ້ອນຕື່ນ, ບ້ານຫາດສະ; ເມືອງເມິງ: ບ້ານໄຊພັດທະນາ; ເມືອງຕົ້ນເຜີ້ງ: ບ້ານສາມຫຼ່ຽມຄຳ, ບ້ານພຽງງາມ, ບ້ານໂພນໂຮມ, ບ້ານດອນມູນ ແລະ ເຂດພິເສດສາມຫຼ່ຽມຄຳ ຈຸດກໍ່ສ້າງສະໜາມບິນ ແລະ ຈຸດຟາມລ້ຽງງົວ.

["]

ໃນໄລຍະ 2-3 ວັນທີ່ຜ່ານມານີ້ ແຂວງ ບໍ່ແກ້ວ ສະເພາະຢູ່ເມືອງຫ້ວຍຊາຍ ຕົວເລກຜູ້ຕິດເຊື້ອແມ່ນສູງ ແມ່ນການຕິດເຊື້ອໃນຊຸມຊົນ ແລະ ກໍແຜ່ລາມໄປຫລາຍບ້ານ ແລະ ສະຖານທີ່ສຳນັກງານຂອງລັດ ເຊິ່ງສະແດງໃຫ້ເຫັນວ່າ ການປະຕິບັດມາດຕະການຕ້ານ ແລະ ສະກັດກັ້ນພະຍາດໂຄວິດ-19 ຂອງແຂວງ ຍັງບໍ່ທັນເຂັ້ມງວດເທົ່າທີ່ຄວນເຊັ່ນ: ການເດີນທາງອອກມາຈາກບ່ອນທີ່ມີການລະບາດ ບາງຄົນມາແລ້ວຍັງບໍ່ໄດ້ກັກຕົວ ແລະ ກວດຫາເຊື້ອ, ສັງເກດເຫັນວ່າປະຫວັດການເຄື່ອນໄຫວຂອງຜູ້ຕິດເຊື້ອທີ່ໄດ້ລາຍງານໄປຍັງມີການໄປກີນເຂົ້າຮ່ວມກັນ

ພ້ອມນີ້ຍັງມີປະຊາຊົນຈຳນວນໜຶ່ງ ຍັງມີການຊຸມແຊວຢູ່ ການແນະນໍາຂອງຄະນະສະເພາະກິດກ່ຽວກັບການດໍາລົງຊີວິດແບບໃໝ່ ຍັງບໍ່ໄດ້ຈັດຕັ້ງປະຕິບັດຢ່າງທົ່ວເຖິງລົງຮອດຮາກຖານຂອງພໍ່ແມ່ປະຊາຊົນ ຈິ່ງເກີດມີການຕັ້ງວົງຊຸມແຊວກີນດື່ມ-ສ້າງສັນ ແລະ ຍັງມີການຫຼິ້ນກິລາປະເພດຕ່າງໆທີ່ທາງສະເພາະກິດຫ້າມຢູ່.

ທ່ານ ໄດ້ຮຽກຮ້ອງທຸກຊັ້ນຄົນໃນສັງຄົມ ໃຫ້ເອົາໃຈໃສ່ ປະຕິບັດຕາມຄຳສັ່ງການຂອງຄະນະສະເພາະກິດ ສະບັບເລກທີ 201 ລົງວັນທີ 25 ຕຸລາ ປີ 2021 ວາງອອກຢ່າງເຂັ້ມງວດ ເພີ່ມທະວີ ປະຕິບັດມາດຕະການປ້ອງກັນ ການແຜ່ລະບາດຂອງພະຍາດໂຄວິດ-19 ຢຸດການຊຸມແຊວເປັນກຸ່ມກ້ອນ, ຖ້າຜູ້ໃດຮູ້ວ່າຕົນເອງຢູ່ໃນກຸ່ມສ່ຽງ ແລະ ຜູ້ສໍາຜັດໃກ້ສິດກັບຜູ້ຕິດເຊື້ອ ໃຫ້ແຍກຕົວອອກຈາກຄົນອື່ນທັນທີ,ໃຫ້ຄວາມຮ່ວມມືກວດຊອກຫາເຊື້ອພະຍາດໂຄວິດ-19, ໃສ່ຜ້າປິດປາກ-ດັງ ແລະ ຮັກສາໄລຍະຫ່າງ, ໃຫ້ຂໍ້ມູນຄວາມຈິງ ແລະ ໃຫ້ຖືກຕ້ອງທັງໝົດກັບເຈົ້າໜ້າທີ່, ໃນລະຫ່ວາງລໍຖ້າຜົນກວດໃຫ້ກັກບໍລິເວນຢູ່ເຮືອນຕົນເອງຢ່າງເຂັ້ມງວດ.

ຈາກ:ໜັງສືພິມບໍ່ແກ້ວ