ໄຊບູລີ ແຕ່ງຕັ້ງພະນັກງານຫຼັກແຫຼ່ງລະດັບຄຸ້ມຄອງຫຼາຍຕໍາແໜ່ງ

920

ເພື່ອປັບປຸງລະບົບກົງຈັກການຈັດຕັ້ງ ພັກ-ລັດ ໃຫ້ມີຄວາມເຂັ້ມແຂງ ແທດເໝາະກັບສະພາບຄວາມເປັນຈິງໃນການສ້າງສາພັດທະນາປະເທດຊາດ ປະຕິບັດຕາມ ແນວທາງນະໂຍບາຍຂອງພັກ-ລັດ ຄຽງຄູ່ກັບການພັດທະນາເສດຖະກິດ-ສັງຄົມ ໃຫ້ມີຄວາມຮຸ່ງເຮືອງສີວິໄລ

ດັ່ງນັ້ນໃນ ວັນທີ 26 ຕຸລາ 2021 ນີ້ ຢູ່ທີ່ສະໂມສອນຫ້ອງວ່າການປົກຄອງເມືອງໄຊບູລີ ແຂວງສະຫວັນນະເຂດ ໄດ້ຈັດພິທີປະກາດການຈັດຕັ້ງເຄື່ອນຍ້າຍ ແລະ ສັບຊ້ອນພະນັກງານນໍາພາຄຸ້ມຄອງຢູ່ຂັ້ນເມືອງ ໂດຍການ ເປັນປະທານຂອງ ທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ ມີບັນດາທ່ານ ຫົວໜ້າຫ້ອງການ, ຄະນະຫ້ອງການ ຕະຫຼອດຮອດນາຍບ້ານ 54 ບ້ານ ໃນທົ່ວເມືອງເຂົ້າຮ່ວມຢ່າງພ້ອມພຽງ.

["]

ການປະກາດການຈັດຕັ້ງຄັ້ງນີ້ ທ່ານເຈົ້າເມືອງໄຊບູລີ ໄດ້ອອກຂໍ້ຕົກລົງ ດ້ວຍການແຕ່ງຕັ້ງ ຫົວໜ້າ ແລະ ຮອງຫົວໜ້າຫ້ອງການ ເຊິ່ງໄດ້ມີການຕົກລົງແຕ່ງຕັ້ງ ທ່ານ ແສງສະຫວັນ ພົມມະບຸດ ຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວລ້ອມເມືອງ ມາເປັນ ຫົວໜ້າຄະນະຈັດຕັ້ງເມືອງ, ແຕ່ງຕັ້ງທ່ານ ລໍາພອນ ສີວິໄລສຸກ ພະນັກງານຂະແໜງຈັດຕັ້ງ-ບໍລິຫານ ແລະ ການເງິນພະແນກໂຍທາທິການ ແລະຂົນສົ່ງ ແຂວງ ເປັນຮອງຫົວໜ້າຫ້ອງການ ຍທຂ ເມືອງ ໄຊບູລີ; ແຕ່ງຕັ້ງທ່ານ ທະນູໄຊ ນິນນະໂສພາ ໜ່ວຍງານຫ້ອງວ່າການເມືອງ ຂື້ນເປັນຮອງຫົວໜ້າຫ້ອງການ ຍທຂ ເມືອງ.

ຕົກລົງແຕ່ງຕັ້ງ ທ່ານ ສີດໍາ ຄໍາທະຈັນ ຮອງປະທານກວດກາພັກ-ລັດ ເມືອງ ຍ້າຍໄປເປັນຮອງຫົວໜ້າຫ້ອງການ ຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ, ແຕ່ງຕັ້ງທ່ານ ວົງເດືອນ ອ່ອນແກ້ວ ພະນັກງານພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ເປັນຫົວໜ້າຫ້ອງການຊັບພະຍາກອນ ແລະ ທໍາມະຊາດເມືອງໄຊບູລີ.

ນອກຈາກນີ້ແລ້ວຄະນະ ປະຈໍາພັກເມືອງໄຊບູລີ ກໍ່ຍັງໄດ້ມີມະຕິຕົກລົງແຕ່ງຕັ້ງ ສະຫາຍ ແສງສະຫວັນ ພົມມະບຸດ ຄະນະປະຈໍາພັກເມືອງເປັນຜູ້ຊີ້ນໍາ2ກຸ່ມບ້ານຄື: ກຸ່ມຍາງຄໍ້າ ແລະ ກຸ່ມສາລະພູມ. ແຕ່ງຕັ້ງສະຫາຍ ສຸວັນທອນ ທິບທິລາດ ກໍາມະການພັກເມືອງ ເປັນຜູ້ຊີ້ນໍາກຸ່ມແກ້ງກະເບົາ ພ້ອມທັງຊີ້ນໍາບ້ານຍາງຄໍ້າ ບ້ານໃຫ່ຍ ຄ້າຍຄືຕົວເມືອງນ້ອຍ, ແຕ່ງຕັ້ງສະຫາຍ ນາງ ພິດສະໄໝ ອິນທະວົງ ກໍາມະການພັກເມືອງຊີ້ນໍາກຸ່ມຍາງຄໍ້າ.
ຈາກ: ວິທະຍຸກະຈາຍສຽງ ແຂວງ ສະຫວັນນະເຂດ