ອົງການການຢາ ແຫ່ງ ສະຫະພາບເອີຣົບ (EMA) ໄດ້ເລີ່ມຕົ້ນຂະບວນການປະເມີນປະສິດທິພາບຂອງຢາໂມລນູພີຣາເວຍ ເຊິ່ງເປັນຢາປິ່ນປົວພະຍາດໂຄວິດ-19 ຢ່າງຮີບດ່ວນແລ້ວ.
ໃນໄລຍະຜ່ານມາ EMA ຈະໃຊ້ມາດຕະການ “rolling review” ໃນການເລັ່ງຂະບວນການປະເມີນຜົນຕໍ່ຢາທີ່ມີປະສິດທິພາບສູງໃນຊ່ວງທີ່ເກີດພາວະສຸກເສີນດ້ານສາທາລະນະສຸກ ໂດຍ ອົງການການຢາແຫ່ງອີຢູຈະປະເມີນຂໍ້ມູນປະສິດທິພາບຂອງຢາທັນທີທີ່ມີການເຜີຍແຜ່ອອກມາ ແທນທີ່ຈະລໍຖ້າໃຫ້ບໍລິສັດຜູ້ຜະລິດ ລວບລວມຂໍ້ມູນທີ່ຈຳເປັນທັງໝົດ ແລະ ຍື່ນເລື່ອງຢ່າງເປັນທາງການຕໍ່ EMA.
ການທີ່ EMA ໃຊ້ຂະບວນການປະເມີນປະສິດທິພາບຂອງຢາໂມລນູພີຣາເວຍຢ່າງເລັ່ງດ່ວນ ກໍມີທ່າອ່ຽງສູງທີ່ EMA ຈະອະນຸມັດນຳໃຊ້ຢາດັ່ງກ່າວກ່ອນສະຫະລັດອາເມຣິກາ ເນື່ອງຈາກຄາດການວ່າ ກວ່າສຳນັກງານອາຫານ ແລະ ຢາສະຫະລັດ (FDA) ອະນຸມັດນຳໃຊ້ຢາດັ່ງກ່າວກໍປະມານເດືອນທັນວາ 2021.
ກ່ອນໜ້ານີ້ ບໍລິສັດເມີກ ເຊິ່ງເປັນຜູ້ຜະລິດຢາໂມລນູພີຣາເວຍໄດ້ຍື່ນຂໍອະນຸມັດນຳໃຊ້ແບບສຸກເສີນນຳ FDA ໃນວັນທີ 11 ຕຸລາ 2021 ແຕ່ FDA ຈະຈັດກອງປະຊຸມເພື່ອພິຈາລະນາໃນວັນທີ 30 ພະຈິກ 2021 ເຊິ່ງຫາກເຫັນດີໃຫ້ນຳໃຊ້ ກໍຈະເປັນຕົ້ນເດືອນທັນວາ 2021 ຈຶ່ງສາມາດນຳໃຊ້ໄດ້.
ຖ້າຫາກວ່າ ທັງ EMA ແລະ FDA ອະນຸມັດນຳໃຊ້ ຢາໂມລນູພີຣາເວຍ ຈະເປັນຢາເມັດໃຊ້ຮັບປະທານເປັນຊະນິດທຳອິດໃນຕະຫຼາດທີ່ໄດ້ຮັບການອະນຸມັດເປັນຢາປິ່ນປົວພະຍາດໂຄວິດ-19 ຢ່າງເປັນທາງການ.