ຍອດຂາຍລົດໄຟຟ້າໃນອີຢູ ເພີ່ມຂຶ້ນຕໍ່ເນື່ອງ

564

ສຳ​ນັກ​ຂ່າວ​ຕ່າງ​ປະ​ເທດ​ລາຍ​ງານເມື່ອ​ທ້າຍ​ອາ​ທິດ​ຜ່ານ​ມາ​ວ່າ ເກືອບ 1 ໃນ 5 ຂອງຍອດ​ຈຳ​ໜ່າຍ​ລົດ​​ໃຫຍ່ໃນ​ສະ​ຫະ​ພາບ​ເອີ​ຣົບ​ໃນ​ໄຕ​ມາດ 3 ຂອງ​ປີ​ນີ້ ເປັນ​ລົດ​ໄຟ​ຟ້າ ແລະ ຍັງ​ເພີ່ມ​ຂຶ້ນ​ຢ່າງ​ຕໍ່​ເນື່ອງ, ຂະ​ນະ​ທີ່ຍອດ​ຂາຍ​ລົດ​ທີ່​ນຳ​ໃຊ້​ນ້ຳ​ມັນ​ເຊື້ອ​ໄຟ​ຕົກ​ຕ່ຳ​ລົງ​ໄປ​ເລື້ອຍໆ ເພາະ​ອີ​ຢູ ມີ​ແຜນ​ປັບຫຼຸດ​ການ​ປ່ອຍ​ມົນ​ລະ​ພິດ​ລົງ​ໃຫ້​ເຫຼືອ​ໜ້ອຍ​ທີ່​ສຸດ ກ່ອນ​ຈະ​ກ້າວ​ສູ່​ເປົ້າ​ໝາຍ​ໃຫ້​ເຫຼືອ​ສູນ.

ສະ​ມາ​ຄົມ​ຜູ້​ຜະ​ລິດ​ລົດ​ສະ​ຫະ​ພາບ​ເອີ​ຣົບ (ACEA) ເປີດ​ເຜີຍ​ວ່າ ຍອດ​ຂາຍ​ລົດ​ໄຟ​ຟ້າ​ທີ່​ໃຊ້​ແບັດ​ເຕີ​ຣີ (ໝໍ້​ໄຟ) ເພີ່ມ​ຂຶ້ນ 57% ຫຼື ຫຼາຍກວ່າ 212.000 ຄັນ, ຂະ​ນະ​ທີ່ຮຸ່ນ​ປັກ​ອິນ​ໄຮ​ບ​ຣິີດກໍ​ເພີ່ມ​ຂຶ້ນ 43% ຫຼື ຫຼາຍກວ່າ 197.000 ຄັນ ເຖິງ​ແມ່ນ​ວ່າ ເປັນ​ການ​ເຕີບ​ໂຕ​ຊ້າກວ່າ​ປີ 2020 ທີ່​ເພີ່ມ​ຂຶ້ນ​ 3 ເທົ່າກໍ​ຕາມ ແຕ່​​ເມື່ອ​ປຽບທຽບ​ໃສ່​ລົດ​ທີ່​ນຳ​ໃຊ້​ນ້ຳ​ມັນ ​ທີ່ຫຼຸດ​ລົງ​ເຖິງ 35% ຂອງ​ຜູ້​ຄ້າ​ລາຍ​ໃຫຍ່, 40% ຂອງຍອດ​ຂາຍ​ໂດຍ​ລວມ ແລະ 50% ສຳ​ລັບ​ໄຕ​ມາດດັ່ງ​ກ່າວ.

ເຫດ​ຜົນ​ສຳ​ຄັນ​ທີ່​ເຮັດ​ໃຫ້​ຍອດ​ຂາຍ​ລົດ​ໄຟ​ຟ້າ​ໃນ​ອີ​ຢູ​ເພີ່ມ​ຂຶ້ນ​ຕໍ່​ເນື່ອງ ເນື່ອງ​ຈາກ​ຜູ້​ຜະ​ລິດ ແລະ ຜູ້​ບໍ​ລິ​ໂພກ​ໄດ້​ຮັບ​ເງິນ​ສະ​ໜັບ​ສະ​ໜູນ​ຈາກ​ລັດ​ຖະ​ບານ​ຂອງ​ປະ​ເທດ​ຂອງ​ຕົນ​ເອງ​ໃນ​ການ​ຊື້​ລົດ​ໄຟ​ຟ້າ ເພື່ອ​ບັນ​ລຸ​ເປົ້າ​ໝາຍ​ການຫຼຸດ​ປ່ອຍ​ມົນ​ລະ​ພິດ​ທີ່​ໄດ້​ກຳ​ນົດ​ໄວ້.

["]

ນອກ​ຈາກ​ນີ້ ອີ​ຢູ ຍັງ​ມີ​ແຜນ​ປຸກ​ລະ​ດົມ ແລະ ອອກ​ລະ​ບຽບ​ຫ້າມ​ນຳ​ໃຊ້​ລົດ​ທີ່​ໃຊ້​ນ້ຳ​ມັນ​ເຊື້ອ​ໄຟ​ຟອດ​ຊີ​ລ ໃຫ້​ໄດ້​ໃນ​ປີ 2035 ໂດຍ​ມີ​ເປົ້າ​ໝາຍ​ເລັ່ງ​ປ່ຽນ​ແປງ​ຈາກ​ລົດ​ທີ່​ນຳ​ໃຊ້​ນ້ຳ​ມັນ​ເຊື້ອ​ໄຟ ມາ​ເປັນ​ລົດ​ໄຟ​ຟ້າ​ທັງ​ໝົດ ຕາມ​ມາດ​ຕະ​ການ ແລະ ເປົ້າ​ໝາຍຫຼຸດ​ຜ່ອນ​ການ​ປ່ອຍ​ອາຍ​ພິດ​ເຮືອນ​ແກ້ວ​ໃຫ້​ເປັນສູນ ເພື່ອ​ຕໍ່​ສູ້​ກັບ​ໂລກ​ຮ້ອນ ຫຼື ການ​ປ່ຽນ​ແປງ​ດິນ​ຟ້າ​ອາ​ກາດ ແລະ ເຂົ້າ​ຮ່ວມ​ມາດ​ຕະ​ການ​ຂອງ​ເວ​ທີ COP26 ນຳ​ອີກ.