ສະຫວັນນະເຂດ ແຕ່ງຕັ້ງຫຼາຍຕຳແໜ່ງໃນຂະແໜງການສຶກສາ ແລະ 1 ທ່ານອອກຮັບບຳນານ

605

ຖ້າຈະເວົ້າເຖິງຂະແໜງການສຶກສາທິການ ແລະ ກິລາ ແນ່ນອນແລ້ວແມ່ນຂົງເຂດທີ່ສຳຄັນ ອັນເປັນເບົ້າຫຼໍ່ຄົນໃຫ້ເຕີບໂຕມາເປັນຄົນທີ່ມີຄຸນນະພາບຂອງຊາດ ແລະສັງຄົມ ເມື່ອຢາກມີບຸກຄະລາກອນການສຶກສາທີ່ດີເພື່ອສົ່ງເສີມການສຶກສາໃຫ້ກ້າວໜ້າ ຕ້ອງໄດ້ມີການຈັດສັນ ແລະແຕ່ງຕັ້ງຜູ້ທີ່ເຫັນວ່າມີຄວາມສາມາດມາບໍລິຫານສືບທອດຕໍ່ໆໄປ, ໂດຍທາງພະແນກສຶກສາທິການ ແລະ ກິລາ ແຂວງສະຫວັນນະເຂດໄດ້ມີການແຕ່ງຕັ້ງໃໝ່ຈຳນວນ 10 ທ່ານຮັບໜ້າທີ່ໃໝ່, ຍົກຍ້າຍ 1 ທ່ານ ແລະ ປະກາດ 1 ທ່ານອອກຮັບອຸດໜູນບຳນານ.

ໃນວັນທີ 22 ຕຸລາ 2021 ນີ້, ພະແນກສຶກສາທິການ ແລະ ກິລາແຂວງສະຫວັນນະເຂດ ໄດ້ຈັດພິທີ ປະກາດຈັດສົ່ງພະນັກງານເຂົ້າຮັບອຸດໜູນບໍານານ ແລະ ປະກາດແຕ່ງຕັ້ງ-ຍົກຍ້າຍຂັ້ນຫົວໜ້າຂະແໜງ, ຫົວໜ້າສູນການສຶກສາ,ອໍານວຍການໂຮງຮຽນ-ຮອງອໍານວຍການໂຮງຮຽນທີ່ຂື້ນກັບພະແນກ ໂດຍການເປັນປະທານ ຂອງ ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະກິລາແຂວງ, ມີຫົວໜ້າຂະແໜງ-ຮອງຂະແໜງ, ຫົວໜ້າສູນ ແລະຮອງສູນການສຶກສາ ແລະຄະນະອຳນວຍການໂຮງຮຽນອ້ອມຂ້າງແຂວງ, ພະນັກງານບໍານານ,ຄູ-ອາຈານ ເຂົ້າຮ່ວມ

["]

ໃນພິທີທ່ານ ນາງ ພຸດສະດີ ສີຫາວົງ ຮອງຫົວໜ້າຂະແໜງຈັດຕັ້ງ-ພະນັກງານ ພະແນກສຶກສາທິການແລະ ກິລາ ແຂວງ ໄດ້ຂື້ນຜ່ານຂໍ້ຕົກລົງ ຂອງລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 3056/ສສກ ລົງວັນທີ 30 ກໍລະກົດ 2021,ວ່າດ້ວຍການອະນຸມັດໃຫ້ພະນັກງານ ອອກພັກການເພື່ອຮັບອຸດໜູນບໍານານ ໂດຍເຫັນດີໃຫ້ ທ່ານ ຄອນສະຫວັນ ນ້ອຍທະນຸວົງ ອະດີດຫົວໜ້າຂະແໜງກິລາມວນຊົນ ພັກການເພື່ອຮັບອຸດໜູນບໍານານນັບແຕ່ວັນທີ01 ຕຸລາ 2021 ເປັນຕົ້ນໄປ

ພ້ອມນີ້ ກໍ່ໄດ້ຜ່ານຂໍ້ຕົກລົງສະບັບເລກທີ 1591/ຈຂ.ສຂ,ລົງວັນທີ 22 ກັນຍາ 2021 ວ່າດ້ວຍການແຕ່ງຕັ້ງພະນັກງານດໍາລົງຕໍາແໜ່ງບໍລິຫານຂອງພະແນກສຶກສາທິການ ແລະ ກິລາ ແຂວງສະຫວັນນະເຂດ, ເຊິ່ງໄດ້ ແຕ່ງຕັ້ງ ທ່ານ ສະຫງວນຮັກ ທົງພັກດີ ເປັນຫົວໜ້າຫ້ອງການບໍລິຫານ ພະແນກສຶກສາທິການ ແລະ ກິລາແຂວງ, ທ່ານ ແກ່ນຕາ ແກ້ວສຸເດືອນ ເປັນຜູ້ອໍານວຍການໂຮງຮຽນ ມສ ສະຫວັນ,ທ່ານ ວິໄລສອນ ພົມມະລາດ ເປັນຜູ້ອໍານວຍການສູນການສຶກສານອກໂຮງຮຽນ ແລະ ອົບຮົມວິຊາຊີບຂັ້ນພື້ນຖານ.

ທ່ານ ສົມຫວັງ ສອນວິຊຽງ ເປັນຮອງຜູ້ອໍານວຍການໂຮງຮຽນ ມສ ໂພນສະຫວັນ,ທ່ານສົມພານ ແພງພະຈັນ ເປັນຮອງຜູ້ອໍານວຍການໂຮງຮຽນ ມສ ຊົນເຜົ່າ,ທ່ານ ນາງ ພູວົງ ລິດດາລາ ເປັນ ຫົວໜ້າໜ່ວຍງານບໍລິຫານໂຮງຮຽນ ມສ ຊົນເຜົ່າ,ທ່ານ ບຸນຕື່ມ ກາດພູນິນ ເປັນ ຫົວໜ້າໜ່ວຍງານວິຊາການໂຮງຮຽນ ມສ ຊົນເຜົ່າ,ທ່ານ ດາວອຸດອນ ແຫວນມີໄຊ ເປັນຮອງຫົວໜ້າໜ່ວຍງານບໍລິຫານໂຮງຮຽນ ມສ ຊົນເຜົ່າ,ທ່ານ ບຸນຮຽນ ສີວົງມຸກ ເປັນ ຮອງຫົວໜ້າໜ່ວຍງານ ວິຊາການໂຮງຮຽນ ມສ ຊົນເຜົ່າ, ແຕ່ງຕັ້ງ ທ່ານ ແກ້ວຕາ ຄໍາປີດົກ ເປັນ ຮັກສາການຜູ້ນວຍການໂຮງຮຽນມສ ໂພນສະຫວັນ ແລະ ໄດ້ຍົກຍ້າຍທ່ານ ບຸນຢືນ ພົນນວນສີ ວ່າການຫົວໜ້າສູນການສຶກສານອກໂຮງຮຽນ ແລະ ຝຶກອົບຮົມວິຊາຊີບ ຂັ້ນຟື້ນຖານ ມາປະຈໍາການຢູ່ຂະແໜງການສຶກສານອກໂຮງຮຽນ

ໂອກາດນີ້, ທ່ານ ຖາວອນ ອິນສີຊຽງໃໝ່ ຮອງພະແນກສຶກສາທິການ ແລະກິລາແຂວງ, ໄດ້ ໂອ້ລົມ ຕໍ່ກອງປະຊຸມເຊິ່ງໄດ້ເນັ້ນໜັກໃຫ້ ຜູ້ທີ່ໄດ້ຮັບການແຕ່ງຕັ້ງໃໝ່ແລະຍົກຍ້າຍໃນຄັ້ງນີ້ ເອົາໃຈໃສ່ເພີ່ມທະວີຄວາມຮັບຜິດຊອບໃຫ້ສູງຂຶ້ນ, ສຸມທຸກສະຕິປັນຍາເຂົ້າໃສ່ວຽກງານວິຊາສະເພາະຂອງຕົນທີ່ຂັ້ນເທິງມອບໝາຍໃຫ້ມີຜົນສຳເລັດ, ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ເປັນແບບຢ່າງນຳໜ້າໃຫ້ໝູ່ຄູ່ຄະນະໃນຂະແໜງການຂອງຕົນ ກໍຄືໃນພະແນກສຶກສາທິການແລະກິລາແຂວງສະຫວັນນະເຂດ