ເມືອງເສດຖະກິດໃໝ່ທັນສະໄໝກຳລັງຈະເກີດຢູ່ເຂດຊາຍແດນ CLV

920

ກະຊວງແຜນການ ແລະ ການລົງທຶນ ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ໃນການສຶກສາສໍາຫຼວດອອກແບບ ກໍ່ສ້າງພັດທະນາເຂດເສດຖະກິດຕົວເມືອງທັນສະໄໝຢູ່​ເຂດຊາຍແດນສາມຫຼ່ຽມເສດຖະກິດ ກຳປູເຈຍ-ລາວ-ຫວຽດນາມ (CLV) ທີ່ດ່ານສາກົນພູເກືອ ເມືອງພູວົງ ແຂວງອັດຕະປື

​ໃນ​ວັນ​ທີ 20 ຕຸ​ລາ​ຜ່ານ​ມາ ທີ່​ນະ​ຄອນຫຼວງວຽງ​ຈັນ ຊຶ່ງຕາງໜ້າລັດຖະບານເຊັນໂດຍ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງແຜນການ ແລະ ການລົງທຶນ ກັບ ບໍລິສັດພັດທະນາອັດຕະປື ຄົບວົງຈອນ ຈໍາກັດ ຕາງໜ້າເຊັນໂດຍ ທ່ານ ສີພອນ ທອງຊະນິດ ປະທານບໍລິສັດ ໂດຍມີບັນດາກະຊວງກ່ຽວຂ້ອງເຂົ້າຮ່ວມເປັນສັກຂີພິຍານ.

["]

ຈຸດປະສົງຂອງການເຊັນບົດບັນທຶກຄັ້ງນີ້, ກໍເພື່ອໃຫ້ສິດດໍາເນີນການສຶກສາ, ສໍາຫຼວດອອກແບບ ກໍ່ສ້າງພັດທະນາເຂດເສດຖະກິດຕົວ ເມືອງທັນສະໄໝ ຊາຍແດນສາມຫຼ່ຽມເສດຖະກິດ (CLV) ຢູ່ດ່ານສາກົນພູເກືອ ເມືອງພູວົງ ແຂວງອັດຕະປື ໂດຍເນັ້ນໃສ່ດ້ານການທ່ອງທ່ຽວ ແລະ ລະບົບການບໍລິການດ່ານ ເພື່ອສ້າງບົດວິພາກເສດຖະກິດ-ເຕັກນິກ (FS), ບົດປະເມີນຜົນກະທົບທາງດ້ານສິ່ງແວດລ້ອມ (ESIA) ແລະ ແຜນຄຸ້ມຄອງ ຕິດຕາມກວດກາ ສິ່ງແວດລ້ອມ (EMMP) ເພື່ອສະເໜີໃຫ້ຂະແໜງການກ່ຽວຂ້ອງຂອງລັດຖະບານ ພິຈາລະນາຮັບຮອງຕາມກົດໝາຍ ແລະ ລະບຽບການ.

ຖ້າໂຄງການດັ່ງກ່າວ ໄດ້ຮັບການພັດທະນາໃນອະນາຄົດ ເມືອງພູວົງ ຈະກາຍເປັນຈຸດຍຸດທະສາດອັນສໍາຄັນ ໃນການຂັບເຄື່ອນການຂະຫຍາຍຕົວຂອງເສດຖະກິດ ຂອງແຂວງອັດຕະປື, ເປັນເມືອງເສດຖະກິດໃໝ່ ມີ​ດ່ານການຄ້າສາກົນທີ່ທັນສະໄໝໃຫ້ເປັນປະຕູການຄ້າ ແລະ ທ່ອງທ່ຽວ ແບບປະສົມປະສານກັບວັດທະນາທໍາທ້ອງຖິ່ນ, ທໍາມະຊາດ ແລະ ກະສິກໍາ, ທັງເປັນການກໍານົດນະໂຍບາຍການພັດທະນາຂອງແຂວງ ກໍຄື ພັກ-ລັດຖະບານ ຕາມແນວທາງນະໂຍບາຍ ຂອງພັກ ແລະ ລັດຖະບານ.