ສຳນັກຂ່າວ BBC News ລາຍງານໃນວັນທີ 19 ຕຸລາ 2021 ວ່າ ບໍລິສັດວັລເນວາ ເຊິ່ງເປັນຜູ້ຜະລິດຢາລາຍໃຫຍ່ຈຂອງຝຣັ່ງ ໄດ້ເປີດເຜີຍຜົນການທົດລອງໄລຍະທີ 3 ເຊິ່ງເປັນໄລຍະສຸດທ້າຍຂອງການທົດລອງວັກແຊັງປ້ອງກັນໂຄວິດຍີ່ຫໍ້ “ວັລເນວາ” ໂດຍພົບວ່າ ສາມາດກໍ່ໃຫ້ເກີດພູມຄຸ້ມກັນສູງ ແລະ ເມື່ອທົດລອງປຽບທຽບກັບວັກແຊັງປ້ອງກັນໂຄວິດ-19 ຂອງ ບໍລິສັດແອັສຕຣາເຊເນກ້າ ພົບວ່າ ສັດສ່ວນການເກີດສານແອນຕີບໍດີມີປະສິດທິພາບສູງ ແລະ ການຢັບຢັ້ງເຊື້ອໂຄວິດ-19 ຂອງວັລເນວາ ສູງກວ່າ ແອັສຕຣາເຊເນກ້າ.
ວັກແຊັງ ວັລເນວາ ເປັນປະເພດວັກແຊັງເຊື້ອຕາຍ ເຊິ່ງນຳໃຊ້ເຕັກໂນໂລຊີເຂົ້າໃນການພັດທະນາແບບດຽວກັນກັບການພັດທະນາວັກແຊັງປ້ອງກັນໄຂ້ຫວັດໃຫຍ່ ແລະ ໂປລີໂອ.
ບໍລິສັດວັລເນວາ ຖະແຫຼງວ່າ: ວັກແຊັງຂອງບໍລິສັດກໍ່ໃຫ້ເກີດພູມຄຸ້ມກັນສູງເຖິງ 95% ພ້ອມລະບຸວ່າ ກຸ່ມຕົວຢ່າງທີ່ໄດ້ຮັບວັກແຊັງໃນໄລຍະການທົດລອງໄລຍະສຸດທ້າຍບໍ່ມີໃຜທີ່ເກີດຜົນຂ້າງຄຽງທີ່ຮຸນແຮງ ເຖິງວ່າ ເຊື້ອເດວຕ້າກຳລັງແຜ່ລະບາດຢູ່ໃນຂະນະນີ້ກໍຕາມ.
ສາດສະດາຈານ ອະດັມ ຟີນ ຈາກມະຫາວິທະຍາໄລບຣິສຕອລ ເຊິ່ງເຮັດໜ້າທີ່ເປັນຜູ້ວິໄຈຫຼັກໃນການທົດລອງຄັ້ງນີ້ ກ່າວວ່າ: ຜົນການທົດລອງ ປາກົດວ່າ ໄດ້ຮັບຜົນດີເປັນຢ່າງຍິ່ງ ເພາະວັກແຊັງດັ່ງກ່າວນີ້ ໜ້າຈະເອົາຊະນະການລະບາດໃຫຍ່ຄັ້ງນີ້ໄດ້. ທັງນີ້ ບໍລິສັດວັລເນວາ ໄດ້ຍື່ນເລື່ອງທັງໝົດເພື່ອຂໍອະນຸມັດນຳໃຊ້ສຸກເສີນກັບສຳນັກງານຢາ ແຫ່ງເອີຣົບແລ້ວ.
