ສຳນັກຂ່າວຣອຍເຕີລາຍງານໃນວັນທີ 20 ຕຸລາ 2021 ວ່າ ອົງການອະນາໄມໂລກ (WHO) ກຳລັງເຈລະຈາກັບບໍລິສັດເມີກ ຜູ້ຜະລິດຢາປິ່ນປົວພະຍາດໂຄວິດ-19 ຍີ່ຫໍ້ ໂມລນູພີຣາເວຍ ເພື່ອຊ່ວຍເຫຼືອປະເທດທຸກຍາກໃນລາຄາຄອສ ຫຼື ຊຸດລະ 10 ໂດລາເທົ່ານັ້ນ.
ລາຍງານລະບຸວ່າ: ໂຄງການ Access to COVID-19 Tools Accelerator (ACT-A) ມີແຜນຈະຈັດຊື້ຢາ ໂມລນູພີຣາເວຍ ເຊິ່ງເປັນຢາເມັດຊະນິດແຄັບຊູນປິ່ນປົວຜູ້ຕິດເຊື້ອພະຍາດໂຄວິດ-19 ທີ່ມີອາການບໍ່ຮຸນແຮງ ເຖິງປານກາງຈຳນວນ 28 ລ້ານຊຸດ (ຊຸດໜຶ່ງມີ 40 ແຄັບຊູນ) ໃນລາຄາຊດລະ 10 ໂດລາສະຫະລັດ.
ໂຄງການ ACT-A ກຳລັງເຈລະຈາກັບບໍລິສັດເມີກ ເຊິ່ງເປັນບໍລິສັດຜູ້ຜະລິດຢາໂມລນູພີຣາເວຍ ໃນລາຄາ 10 ໂດລາຕໍ່ຊຸດ ເຊິ່ງຫາກເຈລະຈາສຳເລັດ ຈະເຮັດໃຫ້ ອົງການອະນາໄມໂລກຊື້ຢາດັ່ງກ່າວຖືກລົງ ເມື່ອທຽບກັບການສັ່ງຊື້ຂອງລັດຖະບານສະຫະລັດອາເມຣິກາທີ່ໄດ້ສັ່ງຊື້ກ່ອນໜ້ານີ້ແລ້ວຈຳນວນ 1,7 ລ້ານຊຸດມູນຄ່າ 1.200 ລ້ານໂດລາ ເຊິ່ງຕົກຢູ່ຊຸດລະ 700 ໂດລາສະຫະລັດ.
ທັງນີ້ ຢາໂມລນູພີຣາເວຍ 1 ຊຸດຈະມີຢາ 200 ມີລີກຣາມ ຈຳນວນ 40 ເມັດ ຫຼື ແຄັບຊູນ ສຳລັບປິ່ນປົວຜູ້ຕິດເຊື້ອໂຄວິດ-19 ຈຳນວນ 1 ຄົນ ໂດຍກິນວັນລະ 2 ຄັ້ງ, ຄັ້ງລະ 4 ເມັດ ຕິດຕໍ່ກັນເປັນເວລາ 5 ວັນ.