ອີຢູ ສົ່ງອອກວັກແຊັງປ້ອງກັນໂຄວິດ ກວ່າ 1 ຕື້ໂດສ

465

ສຳ​ນັກ​ຂ່າວ​ເອ​ເອ​ຟ​ພີ​ລາຍ​ງານ​ໃນ​ວັນ​ທີ 18 ຕຸ​ລາ​ຜ່ານ​ມາ​ວ່າ ທ່ານ ນາງ ອົວ​ຊູ​ລາ ຟອນ ແດ ໄລ​ເ​ອິ້ນ ປະ​ທານ​ຄະ​ນະ​ກຳ​ມາ​ທິ​ການ​ເອີ​ຣົບ ຖະ​ແຫຼງວ່າ ສະ​ຫະ​ພາບ​ເອີ​ຣົບ (ອີ​ຢູ) ໄດ້​ສົ່ງ​ອອກວັກ​ແຊັງ​ປ້ອງ​ກັນ​ໂຄວິດ-19 ແລ້ວ ຫຼາຍກວ່າ 1 ພັນ​ລ້ານ​ໂດ​ສ​ໃນ​ຊ່ວງ 10 ເດືອນ​ທີ່​ຜ່ານ​ມາ. ໂດຍ​ວັກ​ແຊັງ​ຈຳ​ນວນ 87 ລ້ານ​ໂດ​ສ ໄດ້​ສົ່ງ​ອອກ​ຜ່ານ​ໂຄງ​ການ​ໂຄ​ແວັກ​ທີ່​ນຳ​ໂດຍ​ອົງ​ການ​ອະ​ນາ​ໄມ​ໂລກ ເພື່ອ​ນຳ​ໄປ​ຊ່ວຍ​ເຫຼືອ​ບັນ​ດາ​ປະ​ເທດ​ທີ່​ມີ​ລາຍ​ໄດ້​ຕ່ຳ ຫາ ປານ​ກາງ, ສ່ວນ​ທີ່​ເຫຼືອ​ແມ່ນ​ສົ່ງ​ອອກ​ຕາມ​ການ​ສັ່ງ​ຊື້​ຈາກ​ປະ​ເທດ​ຕ່າງໆ.

ທ່ານ ນາງ ຟອນ ແດ ໄລ​ເອິ້ນ ກ່າວ​ອີກວ່າ: ໃນ​ເດືອນ​ໜ້າ​ນີ້ ອີ​ຢູ ຈະ​ບໍ​ລິ​ຈາກວັກ​ແຊັງ​ປ້ອງ​ກັນ​ໂຄວິດ-19 ຈຳ​ນວນ 500 ລ້ານ​ໂດ​ສ ໃຫ້​ແກ່​ປະ​ເທດ​ທຸກ​ຍາກ ແລະ ມີ​ຄວາມ​ຕ້ອງ​ການ​ວັກ​ແຊັງ​ ເພື່ອ​ໄປ​ສັກ​ໃຫ້​ປະ​ຊາ​ຊົນ. ພ້ອມ​ທັງ​ຮຽກ​ຮ້ອງ​ໃຫ້​ປະ​ເທດ​ທີ່​ຮັ່ງ​ມີ​ຊ່ວຍ​ກັນ​ບໍ​ລິ​ຈາກວັກ​ແຊັງ​ໃຫ້​ແກ່​ປະ​ເທດ​ທຸກ​ຍາກ ເພື່ອ​ຢຸດ​ຢັ້ງ​ການ​ແຜ່​ລະ​ບາດ.

["]

ສຽງ​ຮຽກ​ຮ້ອງ​ຂອງ​ປະ​ທານ​ກຳ​ມາ​ທິ​ການ ອີ​ຢູ ມີ​ຂຶ້ນ ຫຼັງ​ຈາກ​ທີ່​ອັດ​ຕາ​ການ​ສັກ​ວັກ​ແຊັງ​ປ້ອງ​ກັນ​ໂຄວິດ ລະ​ຫວ່າງ​ປະ​ເທດ​ທີ່​ຮັ່ງ​ມີ ແລະ ປະ​ເທດ​ທຸກ​ຍາກ​ຍັງ​ແຕກ​ໂຕນ​ກັນຫຼາຍ ໂດຍ​ຂະ​ນະ​ນີ້ ກຸ່ມ​ປະ​ເທດ​ສະ​ມາ​ຊິກ​ອີ​ຢູ, ສະ​ຫະ​ລັດ, ການ​າດາ, ຍີ່​ປຸ່ນ, ສິງ​ກະ​ໂປ ແລະ ປະ​ເທດ​ຮັ່ງ​ມີ​ອື່ນໆ ໄດ້​ສັກ​ວັກ​ແຊັງ​ໃຫ້​ປະ​ຊາ​ຊົນ​ຄວບ​ຄຸມ​ປະ​ຊາ​ກອນ​ສ່ວນຫຼາຍ​ແລ້ວ, ໃນ​ຂະ​ນະ​ທີ່ ປະ​ເທດ​ໃນ​ພູ​ມີ​ພາກ​ອາ​ຟ​ຣິກ​ກາ​ ແລະ ປະ​ເທ​ດ​ອື່ນໆ ເປັນ​ຕົ້ນ ມຽນ​ມາ, ຊີ​ເຣຍ, ອັ​ຟ​ກາ​ນິ​ສ​ຖານ, ເອ​ຢິບ ມີ​ອັດ​ຕາ​ການ​ສັກ​ວັກ​ແຊັງ​ບໍ່​ເຖິງ 10% ຂອງ​ຈຳ​ນວນ​ປະ​ຊາ​ກອນ.