ສຳນັກຂ່າວຕ່າງປະເທດລາຍງານວ່າ: ທ່ານ ອັນໂຕນີໂອ ກູເຕເຣສ ເລຂາທິການໃຫຍ່ອົງການສະຫະປະຊາຊາດ (ສປຊ) ກ່າວເນື່ອງໃນໂອກາດວັນສາກົນເພື່ອລຶບລ້າງຄວາມທຸກຍາກ ໃນວັນທີ 17 ຕຸລາ ໂດຍໄດ້ຮຽກຮ້ອງການຟື້ນຕົວຈາກຜົນກະທົບຂອງພະຍາດໂຄວິດ-19 ຢ່າງເທົ່າທຽມ ແລະ ຍືນຍົງ ເພື່ອຢຸດຕິຄວາມທຸກຍາກ ແລະ ສ້າງໂລກທີ່ມີຄວາມຍຸຕິທຳ, ມີກຽດ ແລະ ໂອກາດສຳລັບທຸກຄົນ.
ເລຂາທິການໃຫຍ່ ສປຊ ກ່າວອີກວ່າ: ເປັນຄັ້ງທຳອິດໃນຮອບ 20 ປີທີ່ຄວາມທຸກຍາກຂັ້ນຮຸນແຮງກຳລັງພີ່ມຂຶ້ນ, ເມື່ອປີຜ່ານມາ ມີຜູ້ຄົນທົ່ວໂລກປະມານ 120 ລ້ານຄົນຕ້ອງຕົກຢູ່ໃນຄວາມທຸກຍາກຂັ້ນຮຸນແຮງ ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ສ້າງຄວາມເສຍຫາຍໃຫ້ແກ່ເສດຖະກິດ ແລະ ສັງຄົມ, ພ້ອມຢ້ຳວ່າ: ການຟື້ນຕົວທີ່ບໍ່ສົມດຸນ ກຳລັງເຮັດໃຫ້ໂລກຂອງພວກເຮົາຍິ່ງແຕກໂຕນກັນຫຼາຍຂຶ້ນ, ຄວາມເປັນນ້ຳໜຶ່ງໃຈດຽວ ຄວາມເອື້ອເຟື້ອເຜື່ອແຜ່ກຳລັງຂາດຫາຍໄປໃນຍາມທີ່ພວກເຮົາຕ້ອງການສິ່ງນັ້ນຫຼາຍທີ່ສຸດ.
ຄວາມບໍ່ເທົ່າທຽມໃນການເຂົ້າເຖິງວັກແຊັງ ເຮັດໃຫ້ພະຍາດໂຄວິດ-19 ພັດທະນາສາຍພັນຕ່າງໆ ແລະ ລະບາດໄປທົ່ວໂລກ, ເຮັດໃຫ້ມີຜູ້ເສຍຊີວິດຫຼາຍລ້ານຄົນໃນທົ່ວໂລກ ແລະ ເຮັດໃຫ້ເສດຖະກິດຟື້ນຕົວຊ້າລົງ ເຊິ່ງສ້າງຄວາມເສຍຫາຍຫຼາຍພັນຕື້ໂດລາສະຫະລັດ, ພວກເຮົາຕ້ອງຢຸດຄວາມຮຸນແຮງ, ຮັບມືກັບໜີ້ສິນ ແລະ ລົງທຶນທີ່ຍືນຍົງໃນປະເທດຕ່າງໆທີ່ມີຄວາມຕ້ອງການສູງສຸດ ເລຂາທິການໃຫຍ່ອົງການ ສປຊ ກ່າວ.
