ຈືນໄຂ່ ເມນູສຸຂະພາບ ເຮັດງ່າຍມີຄຸນຄ່າ ພ້ອມວິທີຫຸງເຂົ້າແບບຖືກວິທີ

722

ມື້ນີ້ຜູ້ຂຽນຈະນຳເອົາເມນູທີ່ຫຼາຍຄົນເຮັດກິນປະຈຳໃຫ້ມີຄຸນປະໂຫຍດຫຼາຍຂຶ້ນກວ່າເກົ່າ ແລະ ດີຕໍ່ສຸຂະພາບນຳອີກ ເມນູນີ້ກໍຄືຈືນໄຂ່ສະໝຸນໄພ ແລະ ມາພ້ອມກັບເຂົ້າສະໝຸນໄພທີ່ກິນຄູ່ກັນແລ້ວດີຍົກກຳລັງສອງໄປເລີຍ.

ສ່ວນປະສົມຈືນໄຂ່ສະໝຸນໄພ ປະກອບມີ: ໄຂ່ໄກ່ 2-3 ໜ່ວຍ, ສະອິວຂາວ 1 ບ່ວງຊາ, ນ້ຳປາ 1 ບ່ວງຊາ, ໝາກເຫຼັ່ນ, ຫອມບົ່ວແດງ, ຫອມບົ່ວໃຫຍ່ ແລະ ຫອມບົ່ວໃບ.

+ວິທີການເຮັດຈືນໄຂ່ສະໝຸນໄພ

["]

– ຂັ້ນຕອນທຳອິດເຮົາມາກຽມໄຂ່, ຕີລົງໃສ່ພາຊະນະສ່ວນປະສົມ ແລ້ວກໍປຸງລົດຊາດ ຕາມດ້ວຍໃສ່ຜັກສະໝຸນໄພຕ່າງໆ ທີ່ໄດ້ກ່າວມາຂ້າງຕົ້ນລົງໄປ.

– ຈາກນັ້ນເຮົາກໍຕີສ່ວນປະສົມຕ່າງໆ ໃຫ້ເຂົ້າກັນດີ.

– ວິທີການຈືນໄຂ່ໃຫ້ຟູນຸ່ມແຊບ ເຮົາຈະເລີ່ມດ້ວຍການໃຊ້ໄຟປານກາງ ຖ້າໃຫ້ນ້ຳມັນຮ້ອນແຮງ ສັງເກດໄດ້ວ່າຈະມີຄວັນຂຶ້ນເລັກໜ້ອຍ.

– ແລ້ວເຮົາກໍຄ່ອຍໆ ເທໄຂ່ລົງໄປ ໄຂ່ຂອງເຮົາກໍຈະຟູທັນທີ ຈາກນັ້ນເຮົາກໍຈືນຈົນມັນເຫຼືອງສຸກກໍຕັກອອກມາໃສ່ຈານໄດ້.

– ພຽງເທົ່ານີ້ກໍພ້ອມຮັບປະທານໄດ້ເລີຍ ຮັບຮອງວ່າແຊບ ໄດ້ປະໂຫຍດພ້ອມອີກ.

ຫຼັງຈາກທີ່ເຮົາໄດ້ຈືນໄຂ່ແຊບໆ ໄປແລ້ວເຮົາກໍຕ້ອງມີເຂົ້າຫອມໆ ຮ້ອນໆ ແລະ ມີປະໂຫຍດເສີມຕື່ມອີກ ບອກໄດ້ເລີຍວ່າດີຍົກກຳລັງສອງກັນໄປເລີຍ. ບໍ່ລໍຊ້າ ເຮົາໄປຫຸງເຂົ້າສະໝຸນໄປກິນຄູ່ກັບຈືນໄຂ່ກັນເທາະ.

ສ່ວນປະສົມຂອງເຂົ້າສະໝຸນໄພ ປະກອບມີ: ເຂົ້າສານຈ້າວປະລິມານຕາມຄວາມຕ້ອງການ ຫຼື ປະມານ 1 ຖ້ວຍນ້ອຍ, ຂີງ 5 ປ່ຽງ, ຂ່າ 5 ປ່ຽງ, ກະຊາຍ 5 ອັນ, ໃບຂີ້ຫູດ 5 ໃບ ແລະ ນ້ຳດື່ມສະອາດ.

+ວິທີຫຸງເຂົ້າສະໝຸນໄພ

• ລ້າງເຂົ້າໃຫ້ສະອາດດີ ແລ້ວກໍນຳເອົາສະໝຸນໄພທີ່ຊອຍກຽມໄວ້ນັ້ນ ລົງໄປໃສ່ໃນໝໍ້ຫຸງເຂົ້າ.

• ໃສ່ນ້ຳແລ້ວກໍນຳໄປຫຸງໄດ້ເລີຍ.

• ແລ້ວກໍລໍຖ້າໃຫ້ເຂົ້າສຸກ ພຽງເທົ່ານີ້ເຮົາກໍໄດ້ເຂົ້າສະໝຸນໄພເອົາໄປກິນກັບອາຫານທີ່ເຮົາຕ້ອງການໄດ້ເລີຍ.

ຫວັງວ່າເມນູອາຫານມື້ນີ້ຈະເຮັດໃຫ້ທຸກຄົນກິນແລ້ວມີຄວາມສຸກ ແລະ ມີສຸຂະພາບທີ່ແຂງແຮງດີ ເຮັດໃຫ້ທຸກຄົນມີພູມຄຸ້ມກັນຈາກພະຍາດຮ້າຍຕ່າງໆໄດ້ອີກດ້ວຍ.