ສຳນັກຂ່າວຕ່າງປະເທດລາຍງານໃນວັນທີ 13 ຕຸລາ 2021 ວ່າ ບັນດາຜູ້ນຳກຸ່ມ G20 ເຊິ່ງເປັນການລວມຕົວກັນຂອງລັດຖະມົນຕີການເງິນ ແລະ ຜູ້ບໍລິຫານທະນາຄານກາງຈາກປະເທດທີ່ມີເສດຖະກິດຂະໜາດໃຫຍ່ 19 ປະເທດ ແລະ ສະຫະພາບເອີຣົບ (ອີຢູ) ໄດ້ໃຫ້ຄຳໝັ້ນສັນຍາວ່າ ຈະຊ່ວຍອັຟການິສຖານບໍ່ໃຫ້ປະເຊີນກັບຫາຍະນະທາງເສດຖະກິດ.
ກອງປະຊຸມຂອງກຸ່ມຈີ 20 ຈັດຂຶ້ນແບບທາງໄກ ໂດຍການເປັນເຈົ້າພາບຂອງ ອິຕາລີ ໄດ້ຮຽກຮ້ອງໃຫ້ບັນດາປະເທດສະມາຊິກ ຊ່ວຍເຫຼືອອັຟການິສຖານ.
ທ່ານ ນາງ ແອັງເກລາ ແມເຄິລ ນາຍົກລັດຖະມົນຕີເຢຍລະມັນ ກ່າວວ່າ: ຊາວໂລກບໍ່ຄວນປ່ອຍໃຫ້ອັຟການິສຖານຕ້ອງຫຼົ້ມສະຫຼາຍຈົນນຳໄປສູ່ຄວາມວຸ້ນວາຍ ເພາະບໍ່ມີປະເທດໃດຈະໄດ້ປະໂຫຍດຫຍັງ ຫາກລະບົບການເງິນຂອງອັຟການິສຖານຫຼົ້ມສະຫຼາຍລົງ ພ້ອມຢືນຢັນວ່າ ເຢຍລະມັນຈະບໍລິຈາກເງິນ 600 ລ້ານເອີໂຣ ໃຫ້ແກ່ອັຟການິສຖານ. ແນວໃດກໍຕາມ ນາຍົກລັດຖະມົນຕີເຢຍລະມັນໄດ້ຮຽກຮ້ອງໃຫ້ຕາລີບັນເປີດທາງໃຫ້ໜ່ວຍງານຂອງ ສປຊ ສາມາດສົ່ງມອບຄວາມຊ່ວຍເຫຼືອດ້ານຕ່າງໆໃຫ້ແກ່ອັຟການິສຖານ ແລະ ຢ້ຳເຖິງສິດທິຂອງເດັກ ແລະ ຜູ້ຍິງ.
ໃນຂະນະທີ່ ປະທານາທິບໍດີ ໂຈ ໄບເດັນ ຂອງສະຫະລັດອາເມຣິກາ ກ່າວວ່າ: ການຊ່ວຍເຫຼືອໃດໆຈະສົ່ງຜ່ານໜ່ວຍງານຂອງ ສປຊ ແລະ ອົງການຈັດຕັ້ງສາກົນ ແຕ່ຈະບໍ່ມີການສົ່ງມອບເງິນໃດໆໃຫ້ຕາລີບັນໂດຍກົງ.
ທັງນີ້ ຜູ້ນຳກຸ່ມຈີ 20 ຍັງໄດ້ປຶກສາຫາລືເພື່ອປ້ອງກັນບໍ່ໃຫ້ອັຟການິສຖານ ກາຍເປັນດິນແດນຂອງກຸ່ມຕິດອາວຸດ, ກຸ່ມກໍ່ການຮ້າຍຕ່າງໆ ກໍ່ຕັ້ງຂຶ້ນໃນອັຟການິສຖານ ລວມທັງຄວາມຈຳເປັນຕ້ອງເຮັດໃຫ້ຊາວຕ່າງປະເທດ ແລະ ຊາວອັຟການິສຖານເດີນທາງເຂົ້າ-ອອກອັຟການິສຖານໄດ້ຢ່າງປອດໄພ.