ເວັບໄຊ Financial Time ລາຍງານໃນວັນທີ 10 ຕຸລາ 2021 ວ່າ: ອົງການສະຫະປະຊາຊາດ (ສປຊ) ຍັງຕ້ອງການເງິນຊ່ວຍເຫຼືອ ເພື່ອນຳໄປຊ່ວຍເຫຼືອດ້ານມະນຸດສະທຳໃນມຽນມາ, ໃນຂະນະທີ່ມຽນມາກຳລັງປະເຊີນກັບວິກິດ 3 ດ້ານ ໄດ້ແກ່ ຄວາມຂັດແຍ່ງພາຍໃນປະເທດ, ບັນຫາເສດຖະກິດ ແລະ ການລະບາດຂອງພະຍາດໂຄວິດ-19 ເຮັດໃຫ້ປະຊາຊົນທີ່ຕ້ອງການຄວາມຊ່ວຍເຫຼືອສຸກເສີນເພີ່ມຂຶ້ນ 3 ເທົ່າ ຈາກ 1 ລ້ານຄົນ ມາເປັນ 3 ລ້ານຄົນໃນປີນີ້.
ທ່ານ ແອນດຣູ ເຄີກ ວູດ ຜູ້ປະສານງານດ້ານມະນຸດສະທຳຂອງສະຫະປະຊາຊາດປະຈຳມຽນມາ ກ່າວວ່າ: ມຽນມາກຳລັງປະເຊີນກັບຄວາມຂັດແຍ່ງຢ່າງໜັກໜ່ວງ ແຕ່ເມື່ອເກີດສະຖານະການໃນອັຟການິສຖານ, ມຽນມາກໍຖືກບົດບັງຄວາມທຸກຮ້ອນທີ່ຕ້ອງການຄວາມຊ່ວຍເຫຼືອຢ່າງເລັ່ງດ່ວນ. ຂະນະທີ່ການລະດົມທຶນຂອງ ສປຊ ເພື່ອຊ່ວຍເຫຼືອດ້ານມະນຸດສະທຳສຸກເສີນໃຫ້ແກ່ມຽນມາໄດ້ບໍ່ຮອດເຄິ່ງໜຶ່ງຂອງຄວາມຕ້ອງການ (ຄວາມຕ້ອງການ 385 ລ້ານໂດລາສະຫະລັດ).
ລາຍງານລະບຸວ່າ: ຂະນະນີ້ ຊາວມຽນມາປະມານ 215.000 ຄົນບໍ່ມີທີ່ຢູ່ອາໄສນັບຕັ້ງແຕ່ເກີດເຫດການຢຶດອຳນາດຂອງກອງທັບເມື່ອວັນທີ 1 ກຸມພາເປັນຕົ້ນມາ ແລະ ມີປະຊາຊົນຫຼາຍລ້ານຄົນມີຊີວິດການເປັນຢູ່ດ້ວຍຄວາມທຸກຍາກລຳບາກ ເນື່ອງຈາກບໍ່ມີວຽກເຮັດງານທຳ ບວກກັບລາຄາສິນຄ້າ ເຄື່ອງໃຊ້ສອຍໃນຊີວິດປະຈຳວັນ, ລາຄາອາຫານ ແລະ ເຊື້ອເພີງທີ່ເພີ່ມສູງຂຶ້ນ ໃນເມືອງໃຫຍ່ຫຼາຍເມືອງ.