ລັດຖະບານສະຫະລັດອາເມຣິກາ ນຳໂດຍ ປະທານາທິບໍດີ ໂຈ ໄບເດັນ ຈະຕ້ອງຜ່ານຜ່າ 3 ບັນຫາໃຫຍ່ໄປໃຫ້ໄດ້ພາຍໃນປີນີ້ ເຊິ່ງຕ້ອງໄດ້ອາໄສການຮ່ວມມື ທັງຝ່າຍລັດຖະບານ ແລະ ຝ່າຍຄ້ານ ຫາກບໍ່ດັ່ງນັ້ນ ອາດສົ່ງຜົນກະທົບຕໍ່ເສດຖະກິດຂອງສະຫະລັດ ແລະ ເສດຖະກິດໂລກ.
ບັນຫາທີ 1 ກໍຄື ສະພາຄອງເກຣສ ຕ້ອງມີມະຕິເຫັນດີໃຫ້ຂະຫຍາຍເພດານໜີ້ຊ້າສຸດບໍ່ໃຫ້ເກີນວັນທີ 18 ຕຸລານີ້ ຫາກບໍ່ດັ່ງນັ້ນ ອາເມຣິກາອາດຜິດນັດຊຳລະໜີ້ເປັນຄັ້ງທຳອິດໃນປະຫວັດສາດ ເຊິ່ງຈະສົ່ງຜົນກະທົບຕໍ່ລະບົບເສດຖະກິດຂອງອາເມຣິກາ ແລະ ເສດຖະກິດໂລກນຳອີກ.
ບັນຫາທີ 2 ແຜນເສດຖະກິດ ຫຼື ແຜນລົງທຶນໃສ່ໂຄງສ້າງພື້ນຖານ ຂອງລັດຖະບານ ເຊິ່ງພັກເດໂມແຄຣັດມີເປົ້າໝາຍຈະຜ່ານຮ່າງກົດໝາຍແຜນເສດຖະກິດຂອງລັດຖະບານມູນຄ່າ 3,5 ພັນຕື້ໂດລາສະຫະລັດພາຍໃນວັນທີ 31 ຕຸລານີ້ ເຊິ່ງຮ່າງກົດໝາຍດັ່ງກ່າວນີ້ ບໍ່ພຽງແຕ່ເກີດສຽງຄັດຄ້ານຈາກພັກຝ່າຍຄ້ານເທົ່ານນັ້ນ ແຕ່ສະມາຊິກສະພາບາງຄົນຂອງພັກເດໂມແຄຣັດເອງກໍບໍ່ເຫັນດີນຳ ຫາກແຜນດັ່ງກ່າວນີ້ມີວົງເງິນເກີນ 1,5 ພັນຕື້ໂດລາສະຫະລັດ, ດັ່ງນັ້ນ ລັດຖະບານອາດປັບລົງ ເພື່ອປານີປະນອມໃຫ້ແຜນດັ່ງກ່າວຜ່ານສະພາຄອງເກຣສໄປດ້ວຍດີ.
ແຜນເສດຖະກິດຂອງປະທານາທິບໍດີ ໂຈ ໄບເດັນ ມີເປົ້າໝາຍຍົກເຄື່ອງເສດຖະກິດຂອງສະຫະລັດ ທັງການລົງທຶນໃສ່ໂຄງສ້າງພື້ນຖານ ປະກອບມີ ຂົວ-ທາງ, ສະໜາມບິນ, ໄຟຟ້າ, ເຄືອຂ່າຍບຣອດແບນ, ພັດທະນາຊັບພະຍາກອນມະນຸດ, ສະຫວັດດີການສັງຄົມ ແລະ ອື່ນໆອີກ ເຊິ່ງເປັນການລົງທຶນຄັ້ງໃຫຍ່ທີ່ສຸດໃນຮອບຫຼາຍສິບປີ.
ບັນຫາທີ 3 ງົບປະມານລາຍຈ່າຍ: ໃນເດືອນກັນຍາຜ່ານມາ ສະພາຄອງເກຣສມີມະຕິໃຫ້ຂະຫຍາຍເວລາການໃຊ້ຈ່າຍງົບປະມານປະຈຳປີໄປຈົນຮອດວັນທີ 3 ທັນວາ 2021 ເປັນການຊົ່ວຄາວ ເຮັດໃຫ້ລັດຖະບານຍັງສາມາດນຳໃຊ້ງົບປະມານໃນການບໍລິຫານປະເທດ, ໜ່ວຍງານທາງລັດຖະການສາມາດເປີດບໍລິການໄດ້ຕາມປົກະຕິ ເພື່ອຫຼີກລ່ຽງການຊັດດາວ ເໝືອນກັບທີ່ເຄີຍເກີດຂຶ້ນກັບລັດຖະບານ ໂດ ນັລທຣຳ ທີ່ແກ່ຍາວເປັນເວລາ 22 ວັນ.
ແນວໃດກໍຕາມ ນັບແຕ່ເດືອນທັນວາເປັນຕົ້ນໄປ ຕ້ອງໄດ້ຮັບການເຫັນດີຈາກສະພາຄອງເກຣສໃນການຜ່ານຮ່າງກົດໝາຍງົບປະມານລາຍຈ່າຍໄລຍະຍາວ ເຊິ່ງຍັງບໍ່ແນ່ນນອນວ່າ ຈະຜ່ານໄປດ້ວຍດີຫຼືບໍ່.
ທັງ 3 ບັນຫາທີ່ຍົກມານັ້ນ ລ້ວນແຕ່ມີຄວາມສຳຄັນຕໍ່ລັດຖະບານສະຫະລັດ, ໂດຍສະເພາະການຂະຫຍາຍເພດ້ານໜີ້ ເຊິ່ງຖ້າຫາກສະພາຄອງເກຣສບໍ່ອະນຸມັດ ຈະສົ່ງຜົນກະທົບຕໍ່ເສດຖະກິດຂອງສະຫະລັດ ແລະ ເສດຖະກິດໂລກຢ່າງແນ່ນອນ.
