ລັດຖະມົນຕີກະຊວງ ອຸດສາຫະກຳ ແລະ ການຄ້າ ເຂົ້າຮ່ວມ ກອງປະຊຸມສຸດຍອດທຸລະກິດ ອິນເດຍ-ອາຊຽນ ແບບທາງໄກ

389

ວັນທີ 8 ຕຸລາ ນີ້, ທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະ ການຄ້າ (ອຄ) ທັງເປັນລັດຖະມົນຕີເສດຖະກິດອາຊຽນຂອງ ສປປ ລາວ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມສຸດຍອດທຸລະກິດ ອິນໂດ-ອາຊຽນ ແລະ ງານວາງສະແດງ (Indo-ASEAN Business Summit and Expo) ຜ່ານກອງປະຊຸມທາງໄກ ພາຍໃຕ້ຫົວຂໍ້ “ການສ້າງຕ່ອງໂສ້ການສະໜອງທີ່ເຂັ້ມແຂງ ໂດຍຜ່ານການຮ່ວມມືດ້ານການຄ້າ ແລະ ການລົງທຶນ ຢ່າງເລິກເຊິ່ງ”.

ກອງປະຊຸມຄັ້ງນີ້, ຈັດຂຶ້ນໂດຍ ສະຫະພັນອຸດສະຫາກໍາ ອິນເດຍ ຮ່ວມກັບ ກະຊວງການຕ່າງປະເທດ ແລະ ກະຊວງການຄ້າ-ອຸດສາຫະກໍາ, ແຜ່ນແພ-ຜູ້ຊົມໃຊ້ ແລະ ອາຫານ-ຈໍາໜ່າຍ ອິນເດຍ ພາຍໃຕ້ການເປັນປະທານຂອງ ທ່ານ ປີຢາສ ໂກເຢລ (PiyushGoyal) ລັດຖະມົນຕີກະຊວງການຄ້າ-ອຸດສາຫະກໍາ, ແຜ່ນແພ-ຜູ້ຊົມໃຊ້ ແລະ ອາຫານ-ຈໍາໜ່າຍ ຂອງປະເທດອິນເດຍ ໂດຍມີບັນດາລັດຖະມົນຕີເສດຖະກິດອາຊຽນ ແລະ ຜູ້ຕາງໜ້າຈາກປະເທດອາຊຽນເຂົ້າຮ່ວມ.

["]

ກອງປະຊຸມໄດ້ແລກປ່ຽນທັດສະນະຄຳເຫັນກ່ຽວກັບ ການເສີມຂະຫຍາຍການພົວພັນດ້ານການຄ້າ ແລະ ການລົງທຶນ ລະຫວ່າງ ອາຊຽນ ແລະ ອິນເດຍ ເຂົ້າສູ່ລວງເລິກ ເພື່ອເຮັດໃຫ້ຕ່ອງໂສ້ການສະໜອງຂອງພາກພື້ນໄດ້ຮັບການຟື້ນຟູ ພາຍຫຼັງຜົນກະທົບຈາກການລະບາດຂອງພະຍາດໂຄວິດ-19, ແລະ ເປັນໂອກາດທີ່ດີ ສຳລັບອິນເດຍ ແລະ ອາຊຽນ ໃນການສົ່ງເສີມການຮ່ວມມືທາງດ້ານເສດຖະກິດດ້ວຍການສ້າງຕ່ອງໂສ້ການສະໜອງທີ່ເຂັ້ມແຂງ.


ໃນກອງປະຊຸມຄັ້ງນີ້ ທ່ານ ຄຳແພງ ໄຊສົມແພງ ລັດຖະມົນຕີກະຊວງ ອຄ ສປປ ລາວ ໄດ້ເນັ້ນເຖິງຄວາມສຳຄັນໃນການຮ່ວມມືລະຫວ່າງອາຊຽນ ແລະ ອິນເດຍ ໃນການຟື້ນຟູເສດຖະກິດພາຍຫຼັງທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ເພື່ອພ້ອມກັນກ້າວໄປສູ່ການແກ້ໄຂບັນດາສິ່ງທ້າທາຍ ເພື່ອໃຫ້ກັບຄືນສູ່ສະພາບປົກກະຕິໂດຍໄວ, ການຄ່ອງຕົວຂອງລະບົບຕ່ອງໂສ້ການສະໜອງ ຈະຊ່ວຍຫຼຸດຜ່ອນຄວາມສ່ຽງ, ຫຼຸດຜ່ອນຄວາມບໍ່ແນ່ນອນທາງດ້ານລະບຽບການ ແລະ ຂໍ້ກຳນົດຕ່າງໆ, ຫຼຸດຜ່ອນຜົນກະທົບຈາກການຢຸດສະງັກຂອງການຈໍລະຈອນສິນຄ້າ ແລະ ບໍລິການ, ຫຼຸດຕົ້ນທຶນການຂົນສົ່ງສິນຄ້າ ແລະ ເພີ່ມຂີດຄວາມສາມາດດ້ານການແຂ່ງຂັນໃນລະດັບພາກພື້ນ, ອິນເດຍ ເປັນຄູ່ຄ້າ ແລະ ເປັນແຫຼ່ງການລົງທຶນໃຫຍ່ອັນດັບທີ 7 ຂອງບັນດາປະເທດຄູ່ເຈລະຈາອາຊຽນ ໃນປີ 2020 ແລະ ສປປ ລາວ ເປັນປະເທດໜຶ່ງ ທີ່ມີທ່າແຮງອັນໃຫຍ່ຫຼວງ ສຳລັບນັກລົງທຶນ ແລະ ຜູ້ປະກອບການ ລວມທັງນັກລົງທຶນ ຈາກປະເທດອິນເດຍ.

ພ້ອມກັນນັ້ນ, ກໍ່ໄດ້ເນັ້ນເຖິງຄວາມສໍາຄັນ ເພື່ອສົ່ງເສີມການສ້າງຕ່ອງໂສ້ການສະໜອງທີ່ເຂັ້ມແຂງ ໂດຍສະເພາະການນຳໃຊ້ລະບົບດິຈິຕອນ ແລະ ເຕັກໂນໂລຊີຂໍ້ມູນຂ່າວສານ ເຂົ້າໃນຕ່ອງໂສ້ການສະໜອງຂອງພາກພື້ນ ເພື່ອຫຼຸດຜ່ອນຜົນກະທົບຈາກການຢຸດຊະງັກຂອງລະບົບເສດຖະກິດ ແນໃສ່ຮັບປະກັນການຈໍລະຈອນສິນຄ້າ ແລະ ການບໍລິການທີ່ຈຳເປັນໃຫ້ມີຄວາມຕໍ່ເນື່ອງ; ການຮັບປະກັນໃນການຫຼຸດຜ່ອນການສ້າງສິ່ງກີດຂວາງຕໍ່ການຄ້າ, ການຊຸກຍູ້ສົ່ງເສີມໃຫ້ຜູ້ປະກອບການ ແລະ ພາກທຸລະກິດ ນຳໃຊ້ຜົນປະໂຫຍດຈາກ ສັນຍາການຄ້າເສລີອາຊຽນ-ອິນເດຍ ຢ່າງເຕັມສ່ວນ; ການເປີດຕະຫຼາດຊຶ່ງກັນ ແລະ ກັນໃຫ້ມີຄວາມສະດວກ, ການເພີ່ມທະວີການມີສ່ວນຮ່ວມຂອງພາກທຸລະກິດອາຊຽນ ແລະ ອິນເດຍ ໂດຍສະເພາະໃນຂົງເຂດວິສາຫະກິດຂະໜາດນ້ອຍ ແລະ ກາງ, ການພັດທະນາ ຢາປົວພະຍາດໂຄວິດ-19 ທີ່ ທຸກຄົນສາມາດເຂົ້າເຖິງ, ໄດ້ຮູ້ ແລະ ຄວາມສຳຄັນ ຂອງລະບົບການຄ້າຫຼາຍຝ່າຍ ໃນການຂັບເຄື່ອນເສດຖະກິດ ພາຍຫຼັງການແຜ່ລະບາດຂອງພະຍາດໂຄວິດ-19.

ຂ່າວ-ພາບ: ສັນຕິ