ໂຮງງານໂກລິງ ລາວ ມອບເງິນສົດ ແລະ ເຄື່ອງປ້ອງກັນໂຄວິດ-19 ໃຫ້ກະຊວງກະຊວງອຸດສາຫະກຳ ແລະ ການຄ້າ

399

ກະຊວງອຸດສາຫະກຳ ແລະ ການຄ້າ(ອຄ) ໄດ້ຮັບເງິນ ແລະ ເຄື່ອງຊ່ວຍເຫຼືອເພື່ອຕ້ານແລະສະກັດກັ້ນການແຜ່ລະບາດຂອງພະຍາດໂຄວິດ-19 ຈາກ ໂຮງງານ ໂກລິງລາວ ລວມມູນຄ່າ 320 ລ້ານກີບ. ພິທີມອບ-ຮັບມີຂຶ້ນວັນທີ 8 ຕຸລາ 2021 ທີ່ກະຊວງ ອຄ ໂດຍການເຂົ້າຮ່ວມຂອງທ່ານ ຄໍາແພງ ໄຊສົມແພງ ລັດຖະມົນຕີກະຊວງກະຊວງອຸດສາຫະກຳ ແລະ ການຄ້າ ພ້ອມຄະນະ ມີທ່ານ ໂຮຊິງຮົ້ງ ປະທານ ໂຮງງານ ໂກລິງລາວ ພ້ອມພະນັກງານເຂົ້າຮ່ວມ


ທ່ານ ໂຮຊິງຮົ້ງ ໄດ້ກ່າວວ່າ ເຫັນໄດ້ຄວາມສໍາຄັນໃນການຕ້ານການແຜ່ລະບາດຂອງພະຍາດໂຄວິດ-19 ໃນປະເທດລາວ ເພື່ອເປັນການປະກອບສ່ວນ ແລະ ສະໜັບສະໜູນ ນະໂຍບາຍຂອງລັດຖະບານ, ຄະນະສະເພາະກິດຕ້ານການແຜ່ລະບາດຂອງພະຍາດໂຄວິດ-19; ສະນັ້ນ ທາງໂຮງງານ ກໍໄດ້ມີງົບປະມານ ແລະ ເຄື່ອງຊ່ວຍເຫຼືອ ຈໍານວນໜຶ່ງມາ ປະກອບສ່ວນໂດຍມອບໃຫ້ກະຊວງ ອຄ ເພື່ອນໍາໃຊ້ເຂົ້າໃນວຽກງານ ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19.


ທ່ານ ຄໍາແພງ ໄຊສົມແພງ ໄດ້ກ່າວສະແດງຄວາມຂອບໃຈມາຍັງປະທານບໍລິສັດ ທີ່ໄດ້ປະກອບສ່ວນເງິນ ແລະ ອຸປະກອນປ້ອງກັນພະຍາດໂຄວິດ 19. ພ້ອມທັງໄດ້ແຈ້ງສະພາບການ ຂອງການເຮັດວຽກເຄື່ອນໄຫວປ້ອງກັນພະຍາດໂຄວິດ-19 ຂອງກະຊວງ ອຄ ກໍຄືຂະແໜງການ ອຸດສາຫະກຳ ແລະ ຫັດຖະກໍາ ເພື່ອເຮັດໃຫ້ ບັນດາບໍລິສັດ, ໂຮງງານອຸດສາຫະກຳ ມີຄວາມເຂົ້າໃຈ ແລະ ມີມາດຕະການເພື່ອປ້ອງກັນການແຜ່ລະບາດຂອງພະຍາດໂຄວິດ-19 ໃນໂຮງຈັກໂຮງງານ.ເຄື່ອງດັ່ງກ່າວ ກະຊວງ ອຄ ຈະໄດ້ນຳໃຊ້ເຂົ້າໃນການປ້ອງກັນ, ຄວບຄຸມ ແລະ ສະກັດກັ້ນ ຕ້ານການລະບາດຂອງພະຍາດໂຄວິດ 19 ຢູ່ຂະແໜງການອຸດສາຫະກໍາ ແລະ ການຄ້າ ແລະ ຈໍານວນໜຶ່ງຈະນໍາໄປມອບຕໍ່ໃຫ້ໂຮງໝໍ ແລະ ສູນກັກກັນ ທີ່ຂາດແຄນ ແລະ ທີ່ມີຄວາມຕ້ອງການນຳໃຊ້ ເຄື່ອງດັ່ງກ່າວ.

["]

ໂຮງງານໂກລິງລາວ ຢູ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນຫຼວງວຽງຈັນ ເປັນການລົງທຶນ ຂອງຕ່າງປະເທດ (ໂດຍທ່ານ ໂຮຊິງຮົ້ງ ນັກລົງທຶນ ຈີນໄຕ້ຫວັນ) ມີພະນັກງານ-ກຳມະກອນ 1.825 ຄົນ (ຍິງ 1.304ຄົນ) ກິດຈະການຜະລິດ: ເກີບໜັງ, ເກີບຜ້າໄບ ແລະ ເກີບກິລາ ເພື່ອຈຳໜ່າຍຢູ່ພາຍໃນ ແລະ ສົ່ງອອກຕ່າງປະເທດ ເຊັ່ນ: ເອີລົບ, ສ.ເກົາຫຼີ, ຍີປຸ່ນ, ຈີນ ແລະ ປະເທດອື່ນໆ.


ລາຍລະອຽດເຄື່ອງທີ່ໂຮງງານນຳມາມອບ ປະກອບມີ: ເປັນວັດຖຸລວມມູນຄ່າ 120ລ້ານ ກີບ ເຊັ່ນ: ຜ້າອັດປາກ-ດັງ 60 ແກັດ, ສະບູ 206 ແພັກ, ເຈວລ້າງມື 180 ຕຸກ, ເຄື່ອງວັດແທກອຸນຫະພູມ 17 ເຄື່ອງ, ຈັກພົ່ນທາດເຫຼົ້າ 4 ເຄື່ອງ, ຊຸດ PPE (ເສື້ອກາວ, ໝວກ) 800 ຊຸດ; ເປັນເງິນສົດ 200ລ້ານ ກີບ ລວມມູນຄ່າທັງໝົດ320ລ້ານກີບ.