ນາຍົກຍີ່ປຸ່ນ ກຽມປະກາດຍຸບສະພາ ເລືອກຕັ້ງໃໝ່ທ້າຍເດືອນນີ້

116

ສຳ​ນັກ​ຂ່າວ​ຕ່າງ​ປະ​ເທດ​ລາຍ​ງານໃນ​ວັນ​ທີ 5 ຕຸ​ລາ 2021 ​ວ່າ ທ່ານ ຟູ​ມີ​ໂອະ ຄີ​ຊີ​ດະ ນາ​ຍົກ​ລັດ​ຖະ​ມົນ​ຕີ​ຄົນໃໝ່​ຂອງ​ຍີ່​ປຸ່ນ ຖະ​ແຫຼງ​ເມື່ອ​ຕອນ​ຄ່ຳ​ຂອງວັນ​ທີ 4 ຕຸ​ລາ​ຜ່ານ​ມາ ຫຼັງ​ຈາກ​ທີ່​ເຂົ້າ​ເຝົ້າ​ສົມ​ເດັດ​ພະ​ຈັກ​ກະ​ພັດ ນາ​ຣຸ​ຮິ​ໂຕະ ເພື່ອ​ຖວາຍ​ປະ​ຕິ​ຍານ ກ່ອນ​ປະ​ຕິ​ບັດ​ໜ້າ​ທີ່ ນາ​ຍົກ​ລັດ​ຖະ​ມົນ​ຕີ​ຍີ່​ປຸ່ນ​ວ່າ: ການ​ຍຸບ​ສະ​ພາ​ຈະ​ເກີດ​ຂຶ້ນ​ໃນ​ວັນ​ທີ 14 ຕຸ​ລານີ້ ຫຼັງ​ຈາກ​ນັ້ນ​ຈະ​ຈັດ​ການ​ເລືອກ​ຕັ້ງ​ທົ່ວ​ໄປ​ໃນ​ວັນ​ທີ 31 ຕຸ​ລາ 2021 ເຊິ່ງ​ໄວ​ກວ່າ​ກຳ​ນົດ.

ລາຍ​ງານ​ລະ​ບຸ​ວ່າ: ທ່ານ ຄີ​​ຊີ​ດະ ຕ້ອງ​ການ​ເດີນ​ໜ້າ​ໃຊ້​ມາດ​ຕະ​ການ ເພື່ອ​ຈັດ​ການ​ກັບ​ພະ​ຍາດ​ໂຄວິດ-19 ແລະ ເລັ່ງ​ຟື້ນ​ຟູ​ເສດ​ຖະ​ກິດ​ຂອງ​ຍີ່​ປຸ່ນ ແຕ່​ເພື່ອ​ໃຫ້​ແຜນ​ການ​ນັ້ນ​ຂັບ​ເຄື່ອນ​ຢ່າງ​ມີ​ປະ​ສິດ​ທິ​ພາບ ປະ​ຊາ​ຊົນ​ຕ້ອງ​ເປັນ​ຜູ້​ຕັດ​ສິນ​ໃຈ​ກ່ອນ​ວ່າ ຕ້ອງ​ການ​ໃຫ້​ລາວ ເປັນ​ຜູ້​ນຳຫຼື​ບໍ່?.

ທັງ​ນີ້ ການ​ກ້າວ​ເຂົ້າ​ສູ່​ຕຳ​ແໜ່ງ​ສູງ​ສຸດ​ທາງ​ການ​ເມືອງ​ຂອງ ທ່ານ ຄີ​ຊີ​ດະ ດ້ວຍ​ການ​ລົງ​ມະ​ຕິ​ຂອງ​ສະ​ພາ​ຍີ່​ປຸ່ນ ເຊິ່ງ​ມີ​ພັກ ເສ​ລີ​ປະ​ຊາ​ທິ​ປະ​ໄຕ (LDP) ຄອງ​ສຽງ​ສ່ວນຫຼາຍ​ໃນ​ສະ​ພາ ໂດຍ​ການ​ເລືອກ​ນາ​ຍົກ​ລັດ​ຖະ​ມົນ​ຕີ​ຄົນ​ໃໝ່​ເປັນ​ຜົນ​ມາ​ຈາກ ທ່ານ ໂຢ​ຊີ​ຮີ​ເດະ ຊູ​ງະ ລາ​ອອກ​ຈາກ​ຕຳ​ແໜ່ງ, ກ່ອນ​ພັກ LDP ຈະ​ຄັດເລືອກເອົາ ທ່ານ ຄີ​ຊີ​ດະ ເປັນ​ຫົວ​ໜ້າ​ພັກ ແລະ ກ້າວ​ຂຶ້ນ​ເປັນ​ນາ​ຍົກ​ລັດ​ຖະ​ມົນ​ຕີ​ຄົນ​ທີ 100 ຂອງ​ຍີ່​ປຸ່ນ.

["]

ລາຍ​ງານ​ລຸ​ບຸ​ວ່າ: ​ຕາມ​ປົກກະ​ຕິ​ແລ້ວ ການ​ເລືອກ​ຕັ້ງ​ທົ່ວ​ໄປ​ຄັ້ງ​ໃໝ່​ຂອງ​ຍີ່​ປຸ່ນຈ​ະ​ມີ​ຂຶ້ນ​ໃນ​ຊ່ວງ​ທ້າຍ​ເດືອ​ນ​ພະ​ຈິກ ຈະ​ເຖິງ​ນີ້​ຢູ່​ແລ້ວ ແຕ່ ທ່ານ ຄີ​ຊີ​ດະ ກໍ​ຕັດ​ສິນ​ໃຈ​ເລື່ອນ​ການ​ເລືອກ​ຕັ້ງ​ມາ​ໃສ່​ວັນ​ທີ 31 ຕຸ​ລາ 2021 ອັນ​ໄດ້​ສ້າງ​ຄວາມ​ປະຫຼາດ​ໃຈ​ໃຫ້​ແກ່​ຊາວ​ຍີ່​ປຸ່ນ​ບໍ່​ໜ້ອຍ, ໃນ​ຂະ​ນະ​ທີ່​ນັກ​ວິ​ເຄາະ​ຄາດ​ວ່າ ທ່ານ ຄີ​ຊີ​ດະ ອາດ​ຈະ​ຕ້ອງ​ການ​ຮີບ​ຟ້າວ​ຈັດ​ການ​ກັບ​ບັນ​ຫາ​ຕ່າງໆ​ທີ່​ຍີ່​ປຸ່ນ​ກຳ​ລັງ​ປະ​ເຊີນ​ຂະ​ນະ​ນີ້ ນັ້ນ​ກໍ​ຄື ໂຄວິດ-19 ແລະ ບັນ​ຫາ​ເສດ​ຖະ​ກິດ ແລະ ເຊື່ອ​ວ່າ​ການ​ເລືອກ​ຕັ້ງ​ຄັ້ງ​ນີ້ ພັກ LDP ຍັງ​ຈະ​ຊະ​ນະ​ແບບ​ຂາດ​ຂັ້ນ​ອີກ ໂດຍ​ຜູ້​ນຳ​ຍີ່​ປຸ່ນ​ຄາດ​ວ່າ ຍິ່ງ​ເລືອກ​ຕັ້ງ​ໄວ​ເທົ່າ​ໃດ ຍິ່ງ​ສ້າງ​ຄວາມ​ສະ​ຖຽນ​ລະ​ພາບ​ໃຫ້​ແກ່​ລັດ​ຖະ​ບານ.