ຄາດ ລາຍໄດ້ຂອງບໍລິສັດເມີກ ຈະເພີ່ມຂຶ້ນຢ່າງຫຼວງຫຼາຍ

946

ສຳ​ນັກ​ຂ່າວ​ຕ່າງ​ປະ​ເທດ​ລາຍ​ງານ​ວ່າ ຜູ້​ຊ່ຽວ​ຊານ​ຄາດ​ການ​ວ່າ ​ປີ 2021 ນີ້ ​ບໍ​ລິ​ສັດ​ເມີກ ແອນ​ໂຄ ເຊິ່ງ​ເປັນ​ບໍ​ລິ​ສັດ​ຜະ​ລິດ​ຢາ​ລາຍ​ໃຫຍ່​ຂອງ​ສະ​ຫະ​ລັດ ຈະ​ມີ​ລາຍ​ໄດ້ຈຳ​ນວນ​ມະ​ຫາ​ສານ ຈາກ​ການ​ຈຳ​ໜ່າຍ​ຢາ ໂມ​ນູ​ພີ​ຣາ​ເວຍ (molnupiravir) ທີ່ກຳ​ລັງ​ໄດ້​ຮັບ​ຄວາມ​ສົນ​ໃຈ​ຈາກ​ທົ່ວ​ໂລກ​ໃນ​ຂະ​ນະ​ນີ້.

ທັງ​ນີ້ ຢາ molnupiravir ເປັນ​ຢາ​ປິ່ນ​ປົວ​ຜູ້​ຕິດ​ເຊື້ອ​ພະ​ຍາດ​ໂຄວິດ-19 ເຊິ່ງ​ບໍ​ລິ​ສັດ​ເມີກ ລະ​ບຸ​ວ່າ ຢາ​ດັ່ງ​ກ່າວ​ມີ​ປະ​ສິດ​ທິ​ພາບ​ໃນ​ການ​ຕ້ານ​ໄວ​ຣັ​ສ​ໂຄວິດ-19 ທຸກ​ສາຍ​ພັນ ລວມ​ທັງ​ສາຍ​ພັນ​ເດວ​ຕ້າ ແລະ ສາ​ມາດຫຼຸດ​ຄວາມ​ສ່ຽງ​ຂອງ​ຜູ້​ຕິດ​ເຊື້ອ​ໃນ​ການ​ເຂົ້າ​ປິ່ນ​ປົວ​ຢູ່​ໂຮງ​ໝໍ ຫຼື ຫຼຸດ​ຄວາມ​ສ່ຽງ​ການ​ເສຍ​ຊີ​ວິດ​ລົງ​ເຖິງ 50%. ເຖິງ​ແມ່ນ​ວ່າ ຂະ​ນະ​ນີ້ ຢາ​ດັ່ງ​ກ່າວ​ຍັງ​ບໍ່​ໄດ້​ຮັບ​ຮອງ​ຈາກ​ອົງ​ການ​ອາ​ຫານ ແລະ ຢາ ຂອງ​ສະ​ຫະ​ລັດ (FDA) ແຕ່ຫຼາຍ​ປະ​ເທດ​ທົ່ວ​ໂລກ​ໄດ້​ເລີ່ມ​ເຈ​ລະ​ຈາ ແລະ ສັ່ງ​ຊື້​ຢາ​ດັ່ງ​ກ່າວ​ມາ​ໄວ້​ນຳ​ໃຊ້​ແລ້ວ ເປັນ​ຕົ້ນ​ແມ່ນ ຍີ່​ປຸ່ນ, ໄທ, ມາ​ເລ​ເຊຍ, ຟີ​ລິບ​ປິນ, ສ ເກົາຫຼີ ແລະ ອີກຫຼາຍ​ປະ​ເທດ.

ສ່ວນ​ສະ​ຫະ​ລັດ​ອາ​ເມ​ຣິ​ກາ ໄດ້​ສັ່ງ​ຊື້​ຢາ​ດັ່ງ​ກ່າວ​ຈຳ​ນວນ 1,7 ລ້ານ​ຄອ​ສ ຫຼື ປະ​ມານ 68 ລ້ານ​ເມັດ ໃນ​ວົງ​ເງິນ 1.200 ລ້ານ​ໂດ​ລາ​ສະ​ຫະ​ລັດ, ສະ​ເລ່ຍ​ລາ​ຄາ​ຄອ​ສ​ລະ 700 ໂດ​ລາ​ສະ​ຫະ​ລັດ. ທັງ​ນີ້ ຢາ 1 ຄອ​ສ ປະ​ກອບ​ດ້ວຍ​ຢາ molnupiravir ຈຳ​ນວນ 40 ເມັດ​ ສຳ​ລັບ​ຜູ້​ປ່ວຍ 1 ຄົນ ໂດຍ​ຄົນ​ເຈັບ​ຈະ​ກິນ​ຢາ​ວັນ​ລະ 2 ຄັ້ງ ຄັ້ງ​ລະ 4 ເມັດ ເປັນ​ເວ​ລາ 5 ວັນ.

["]

ບໍ​ລິ​ສັດ​ເມີກ ໄດ້​ເລີ່ມ​ຜະ​ລິດ​ຢາ molnupiravir ເພື່ອ​ຈຳ​ໜ່າຍ​ແລ້ວ ໂດຍ​ຄາດ​ວ່າ ຈະ​ສາ​ມາດ​ຜະ​ລິດ​ໄດ້ 10 ຄອ​ສ ພາຍ​ໃນ​ທ້າຍ​ປີ​ນີ້ ເຊິ່ງ​ຈະ​ເຮັດ​ໃຫ້​ບໍ​ລິ​ສັດ​ມີ​ລາຍ​ໄດ້​ຈາກ​ການ​ຈຳ​ໜ່າຍ​ຢາ​ດັ່ງ​ກ່າວ​ສູງ​ເຖິງ 7 ຕື້​ໂດ​ລາ​ສະ​ຫະ​ລັດ. ປັດ​ຈຸ​ບັນ​ບໍ​ລິ​ສັດ​ເມີກ ກຳ​ລັງ​ຍື່ນ​ເອ​ກະ​ສານ ເພື່ອ​ຂໍ​ອະ​ນຸ​ມັດ​ນຳ​ໃຊ້​ຢາ​ແບບ​ສຸກ​ເສີນ​ຈາກ FDA.