ສຳນັກຂ່າວຕ່າງປະເທດລາຍງານຈາກປະເທດຍີ່ປຸ່ນເມື່ອວັນທີ 4 ຕຸລາ 2021 ວ່າ: ໃນກອງປະຊຸມສະໄໝພິເສດຂອງລັດຖະສະພາຍີ່ປຸ່ນ ໄດ້ມີມະຕິຮັບຮອງເອົາ ທ່ານ ຟູມີໂອະ ຄີຊີດະ ຫົວໜ້າພັກເສລີປະຊາທິປະໄຕ (LDP) ໃຫ້ດຳລົງຕຳແໜ່ງເປັນນາຍົກລັດຖະມົນຕີຍີ່ປຸ່ນຄົນໃໝ່ ແທນ ທ່ານ ໂຢຊີຮິເດະ ຊູງະ ທີ່ຂໍລາອອກຈາກຕຳແໜ່ງ ໂດຍ ທ່ານ ຄີຊີດະ ເປັນນາຍົກລັດຖະມົນຕີ ຄົນທີ 100 ຂອງຍີ່ປຸ່ນ.
ຂະນະທີ່ສື່ມວນຊົນຍີ່ປຸ່ນຫຼາຍສຳນັກ ລວມທັງສະຖານີໂທລະພາບ NHK ຄາດການວ່າ ທ່ານ ຄີຊີດະ ອາດຈະຍຸບສະພາໃນວັນທີ 14 ຕຸລາຈະເຖິງນີ້ ແລະ ປະກາດຈັດການເລືອກຕັ້ງກ່ອນກຳນົດຄັ້ງໃໝ່ໃນວັນທີ 31 ຕຸລາ 2021 ນີ້ ໂດຍຜູ້ນຳຍີ່ປຸ່ນຄົນໃໝ່ບໍ່ຕ້ອງການເສຍເວລາແມ່ນແຕ່ວິນາທີດຽວ, ການເລືອກຕັ້ງທົ່ວໄປ ເປັນຂະບວນການດຽວທີ່ຈະຊ່ວຍເພີ່ມຄວາມຊອບທຳໃຫ້ແກ່ ທ່ານ ຟູມີໂອະ ຄີຊີດະ ໃນການດຳລົງຕຳແໜ່ງນາຍົກລັດຖະມົນຕີໃຫ້ຢູ່ຄົບວາລະ ເນື່ອງຈາກຄາດວ່າ ພັກ LDP ຈະໄດ້ຮັບຊະນະໃນການເລືອກຕັ້ງອີກຄັ້ງ.