ສຳນັກຂ່າວຕ່າງປະເທດ ລາຍງານວ່າ ທາງການນະຄອນໂຮຈີ່ມິນ ເຊິ່ງເປັນສູນກາງເສດຖະກິດ-ການຄ້າຂອງຫວຽດນາມ ໄດ້ປະກາດຜ່ອນຜັນມາດຕະການຄວບຄຸມການແຜ່ລະບາດຂອງພະຍາດໂຄວິດ-19 ມີຜົນຕັ້ງແຕ່ທ່ຽງຄືນຂອງວັນທີ 30 ກັນຍາຜ່ານມາ ເຊິ່ງຈະເຮັດໃຫ້ກິດຈະກຳທາງເສດຖະກິດ-ສັງໃນນະຄອນແຫ່ງນີ້ເລີ່ມກັບມາຄຶກຄັກອີກຄັ້ງ ຫຼັງມີມາດຕະການຄວບຄຸມມາຫຼາຍເດືອນ.
ໃນຄວາມພະຍາຍາມຟື້ນຟູເສດຖະກິດ ແລະ ນຳສູນກາງເສດຖະກິດແຫ່ງນີ້ ກັບຄືນສູ່ສະພາບປົກກະຕິ ໂດຍການຢູ່ຮ່ວມກັນກັບໂຄວິດ ຫຼັງຈາກທີ່ຫວຽດນາມຕ້ອງປະເຊີນກັບການລະບາດຢ່າງຮຸນແຮງໃນຊ່ວງຫຼາຍເດືອນຜ່ານມາ ຈາກທີ່ມີຍອດຜູ້ເສຍຊີວິດສະສົມພຽງ 36 ຄົນໃນກາງເດືອນພຶດສະພາ ເພີ່ມຂຶ້ນເປັນຫຼາຍກວ່າ 19.098 ຄົນໃນທ້າຍເດືອນກັນຍາ 2021.
ຮອງປະທານຄະນະກຳມະການປະຊາຊົນນະຄອນໂຮຈີ່ມິນ ກ່າວວ່າ: ດ່ານກວດທຸກຈຸດຕາມທ້ອງຖະໜົນໄດ້ຖືກຍົກເລີກ ແລະ ພວກເຮົາຈະຄ່ອຍໆເປີດເມືອງ ແຕ່ຄວາມປອດໄພຂອງປະຊາຊົນຕ້ອງມາກ່ອນ, ນັບແຕ່ວັນທີ 1 ຕຸລາ ເປັນຕົ້ນໄປ ນິຄົມອຸດສາຫະກຳ, ໂຄງການກໍ່ສ້າງ, ຮ້ານຊັບພະສິນຄ້າ, ຮ້ານອາຫານ ແລະ ພາກບໍລິການ ຈະເລີ່ມເປີດໃຫ້ບໍລິການ ແຕ່ຕ້ອງມີມາດຕະການປ້ອງກັນຢ່າງເຂັ້ມງວດ.
ນະຄອນໂຮຈີ່ມິນ ມີປະຊາກອນປະມານ 9 ລ້ານກວ່າຄົນ ໄດ້ປະເຊີນກັບການລະບາດຂອງພະຍາດໂຄວິດ-19 ຢ່າງໜັກໜ່ວງ ເຮັດໃຫ້ມີຜູ້ຕິດເຊື້ອເກີນເຄິ່ງໜຶ່ງຂອງຍອດຜູ້ຕິດເຊື້ອສະສົມໃນຫວຽດນາມ ແລະ ມີຜູ້ເສຍຊີວິດກວມເອົາ 80% ຂອງຈຳນວນຜູ້ເສຍຊີວິດສະສົມໃນຫວຽດນາມ.