ສຳນັກຂ່າວເອເອຟພີລາຍງານເມື່ອວັນທີ 30 ກັນຍາຜ່ານມາວ່າ ກະຊວງການວາງແຜນເສດຖະກິດຂອງຟີລິບປິນ ຄາດການວ່າ: ຟີລິບປິນອາດຈະໃຊ້ເວລາປະມານ 10 ປີ ໃນການຟື້ນຟູເສດຖະກິດໃຫ້ກັບມາສູ່ລະດັບກ່ອນເກີດການລະບາດຂອງພະຍາດໂຄວິດ-19.
ທ່ານ ຄາຣ໌ລ ເຄນດຣິກ ຊົວ ລັດຖະມົນຕີກະຊວງການວາງແຜນເສດຖະກິດຂອງຟິລິບປິນກ່າວວ່າ: ການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ລັດຖະບານອອກມາດຕະການຄວບຄຸມຢ່າງເຂັ້ມງວດ ສົ່ງຜົນກະທົບ ແລະ ສ້າງຄວາມເສຍຫາຍໄລຍະຍາວຕໍ່ລະບົບເສດຖະກິດຂອງຟີລິບປິນ ເຊິ່ງຄາດວ່າ ມີມູນຄ່າສູງເຖິງ 41,4 ພັນຕື້ເປໂຊ ຫຼື ປະມານ 700 ກວ່າຕື້ໂດລາສະຫະລັດ ໂດຍມູນຄ່າຄວາມເສຍຫາຍດັ່ງກ່າວສູງກວ່າລວມຍອດຜະລິດຕະພັນພາຍໃນຂອງຟີລິບປິນໃນປີ 2020 ເຖິງ 2 ເທົ່າ ເຊິ່ງທະນາຄານໂລກປະເມີນວ່າ ຈີດີພີ ຂອງຟີລິບປິນຈະຢູ່ໃນລະດັບ 361,5 ຕື້ໂດລາສະຫະລັດ ແລະ ຄວາມເສຍຫາຍດ້ານເສດຖະກິດນີ້ ຈະຮູ້ສຶກໃນອີກ 10-40 ປີຂ້າງໜ້າ.
ລັດຖະມົນຕີກະຊວງການວາງແຜນເສດຖະກິດຟີລິບປິນ ກ່າວອີກວ່າ: ລາຍໄດ້ຈາກການບໍລິໂພກ, ການລົງທຶນ ແລະ ພາສີຈະຟື້ນຄືນໄດ້ຍາກ ເນື່ອງຈາກການເວັ້ນໄລຍະຫ່າງທາງສັງຄົມ ເຮັດໃຫ້ພາກບໍລິການ ເປັນຕົ້ນແມ່ນການທ່ອງທ່ຽວ, ຮ້ານອາຫານບໍ່ສາມາດກັບມາເປີດບໍລິການຢ່າງສົມບູນໄດ້, ສ່ວນຜະລິດຕະພາບທີ່ຫຼຸດລົງ ເຊິ່ງເກີດຈາການເສຍຊີວິດ, ການເຈັບປ່ວຍ ຫຼື ການຂາດການສຶກສາ ໃນຊ່ວງການລະບາດຂອງພະຍາດໂຄວິດ-19 ມີທ່າອ່ຽງວ່າ ຈະຍັງຄົງຢູ່ຢ່າງຖາວອນ.
ລັດຖະມົນຕີກະຊວງການວາງແຜນເສດຖະກິດຂອງຟີລິບປິນ ກ່າວອີກວ່າ: ເສດຖະກິດຟີລິບປິນປີນີ້ຄາດວ່າ ຈະຂະຫຍາຍຕົວ 4-5% ເຊິ່ງດີກວ່າປີ 2020 ທີ່ຫົດຕົວ 9,6% ເຊິ່ງເປັນການຫົດຕົວຮຸນແຮງທີ່ສຸດໃນປະຫວັດການເຖິງ ແລະ ຈະໃຊ້ເວລາປະມານ 10 ປີ ກວ່າເສດຖະກິດຂອງປະເທດຈະກັບມາຂະຫຍາຍຕົວໃນລະດັບກ່ອນເກີດການລະບາດຂອງພະຍາດໂຄວິດ ໂດຍໃນຊ່ວງ 10 ປີກ່ອນເກີດການລະບາດ ເສດຖະກິດຂະຫຍາຍຕົວສະເລ່ຍ 6,4% ຕໍ່ປີ.
ນອກຈາກນີ້ ເກືອບ 70% ຂອງລະບົບເສດຖະກິດ ລວມທັງແຮງງານປະມານ 23,3 ລ້ານຄົນ ຍັງຢູ່ພາຍໃຕ້ຂໍ້ຈຳກັດທີ່ເຂັ້ມງວດ ພ້ອມເຕືອນວ່າ ການລັອກດາວ ຈະເຮັດໃຫ້ຜູ້ຄົນອົດຢາກຫຼາຍຂຶ້ນ.