ສຳນັກຂ່າວຕ່າງປະເທດລາຍງານວ່າ ທ່ານນາງ ເຈເນັດ ເຢລເລັນ ລັດຖະມົນຕີກະຊວງການເງິນສະຫະລັດອາເມຣິກາ ກ່າວວ່າ: ສະຫະລັດອາດຜິດນັດຊຳລະໜີ້ ເປັນຄັ້ງທຳອິດໃນປະຫວັດສາດ ແລະ ສະພາຄອງເກຣສມີເວລາເຖິງວັນທີ 18 ຕຸລານີ້ ເພື່ອພິຈາລະນາເພີ່ມເພດານໜີ້, ຫາກບໍ່ດັ່ງນັ້ນ ຫາຍະນະຈະເກີດຂຶ້ນກັບເສດຖະກິດຂອງປະເທດ.
ລັດຖະມົນຕີກະຊວງການເງິນໄດ້ຊີ້ແຈງຕໍ່ປະທານລັດຖະສະພາອາເມຣິກາວ່າ ສະພາຄອງເກຣສມີເວລາເຖິງວັນທີ 18 ຕຸລາ 2021 ໃນການພິຈາລະນາຂະຫຍາຍເພດານໜີ້ ເນື່ອງຈາກເມັດເງິນໃນມາດຕະການພິເສດຂອງກະຊວງການເງິນ ຈະໝົດລົງ ຫາກສະພາຄອງເກຣສບໍ່ປັບເພີ່ມເພດານໜີ້ພາຍໃນວັນທີ 18 ຕຸລາ 2021 ເຊິ່ງເມື່ອເຖິງເວລານັ້ນ ກະຊວງການເງິນຈະມີຊັບພະຍາກອນທີ່ຈຳກັດ ແລະ ຈະໝົດລົງໃນໄວໆນີ້.
ລັດຖະມົນຕີກະຊວງການເງິນສະຫະລັດ ຍັງກ່າວເຕືອນໃນຂະນະທີ່ຖະແຫຼງຕໍ່ຄະນະກຳມາທິການການເງິນປະຈຳວຸດທິສະພາເມື່ອວັນທີ 28 ກັນຍາຜ່ານມາ ໂດຍລະບຸວ່າ: ຫາກສະພາຄອງເກຣສບໍ່ສາມາດປັບເພີ່ມເພດານໜີ້ ກໍຈະເຮັດໃຫ້ສະຫະລັດຜິດນັດຊຳລະໜີ້ເປັນຄັ້ງທຳອິດໃນປະຫວັດສາດ ແລະ ຈະສົ່ງຜົນກະທົບຢ່າງຮຸນແຮງຕໍ່ລະບົບເສດຖະກິດຂອງປະເທດ.
ເຖິງແມ່ນວ່າ ເສດຖະກິສະຫະລັດຍັງຂະຫຍາຍຕົວ ແລະ ການຈ້າງງານກໍເພີ່ມຂຶ້ນ ເມື່ອທຽບໃສ່ປີຜ່ານມາ ແຕ່ພວກເຮົາຍັງປະເຊີນກັບການລະບາດຂອງເອໄວຣັສສາຍພັນເດວຕ້າ ເຊິ່ງຍັງກົດດັນຕໍ່ການຟື້ນຕົວຂອງເສດຖະກິດ ແລະ ເປັນອຸປະສັກຕໍ່ການຂະຫຍາຍຕົວຂອງເສດຖະກິດຢ່າງແຂງແກ່ນ ແຕ່ເຊື່ອວ່າ ສະຫະລັດຈະມີອັດຕາການຈ້າງງານເຕັມສັກະຍະພາບໃນປີໜ້າ. ແຕ່ຂະນະນີ້ ມີຄວາມຈຳເປັນເປັນຢ່າງຍິ່ງທີ່ສະພາຄອງເກຣສຕ້ອງແກ້ໄຂບັນຫາເພດານໜີ້ ເນື່ອງຈາກຄວາມເຊື່ອໝັ້ນ ແລະ ອັນດັບຄວາມໜ້າເຊື່ອຖືຂອງສະຫະລັດຈະໄດ້ຮັບຜົນກະທົບ, ໃນຂະນະດຽວກັນສະຫະລັດຈະປະເຊີນກັບວິກິດການດ້ານການເງິນ ແລະ ເສດຖະກິດຈະທົດຖອຍ ທ່ານລັດຖະມົນຕີກະຊວງການເງິນສະຫະລັດ ກ່າວ.
ທັງນີ້ ນັກວິເຄາະຄາດການວ່າ ຖ້າຫາກວ່າ ສະຫະລັດຜິດຊຳລະໜີ້ ຈະສົ່ງຜົນໃຫ້ເກີດຫາຍະນະທາງການເງິນຕາມມາ ເຊິ່ງຈະກົດດັນໃຫ້ເກີດແຮງເທຂາຍໃນຕະຫຼາດຕ່າງໆເປັນວົງກວ້າງ ແລະ ຈະເຮັດໃຫ້ເສດຖະກິດສະລໍຕົວ ທ່າມກາງອັດຕາດອກເບ້ຍທີ່ສູງຂຶ້ນ ໂດຍ ທ່ານ ນາງ ເຈເນັດ ເຢລເລັນ ກ່າວວ່າຫາກສະພາຄອງເກຣສບໍ່ປັບເພດານໜີ້ຂຶ້ນ ຈະສົ່ງຜົນໃຫ້ເກີດວິກິດການ ແລະ ຫາຍຍະນະທາງການເງິນ ແນ່ນອນການຊຳລະດອກເບ້ຍພັນທະບັດຂອງລັດຖະບານຈະສູງຂຶ້ນ.
ທັງນີ້ ເພດານໜີ້ ຄືຈຳນວນເງິນທັງໝົດທີ່ລັດຖະບານສະຫະລັດໄດ້ຮັບອະນຸຍາດກູ້ຢືມມາ ເພື່ອໃຫ້ລັດຖະບານສາມາດຊຳລະໜີ້ຕາມກົດໝາຍ ເຊິ່ງລວມທັງສະຫວັດດີການປະກັນສັງຄົມ, ສຸຂະພາບ, ດອກເບ້ຍກາສານໜີ້ຂອງລັດຖະບານ ແລະ ການໃຊ້ຈ່າຍອື່ນໆ.