ສຳນັກຂ່າວເອພີລາຍງານວ່າ ຜົນການນັບຄະແນນຍັງບໍ່ເປັນທາງການໃນການເລືອກຕັ້ງທົ່ວໄປຂອງເຢຍລະມັນເມື່ອວັນທີ 26 ກັນຍາ ຜ່ານມາ ໂດຍຄາດວ່າ ພັກສັງຄົມປະຊາທິປະໄຕຂອງເຢຍລະມັນ (SPD) ອາດຈະໄດ້ຮັບໄຊຊະນະ ແຕ່ກໍສູສີ ເຊິ່ງອາດຈະເຮັດໃຫ້ພັກ SPD ເປັນແກນນຳໃນການຈັດຕັ້ງລັດຖະບານ ໃນຮອບ 16 ປີ.
ຫາກພັກ SPD ໄດ້ຮັບໄຊຊະນະ ກໍໝາຍເຖິງການສິ້ນສຸດຂອງການບໍລິຫານປະເທດໂດຍຝ່າຍອະນຸລັກນິຍົມຢ່າງພັກສະຫະພາບປະຊາທິປະໄຕຄຣິສຕຽນ (CDU)/ພັກສະຫະພາບສັງຄົມ ຄຣິສຕຽນ (CSU) ຂອງທ່ານ ນາງ ແອັງເກີລາ ແມເຄິນ ນາຍົກລັດຖະມົນຕີເຢຍລະມັນທີ່ປະກາດວາງມືທາງການເມືອງແລ້ວ.
ກ່ອນໜ້ານີ້ ທ່ານ ນາງ ແອັງເກີລາ ແມເຄິນ ປະກາດວ່າ ຈະລາອອກຈາກຕຳແໜ່ງນາຍົກລັດຖະມົນຕີ ຫຼັງການເລືອກຕັ້ງ ເຊິ່ງເຮັດໃຫ້ການເລືອກຕັ້ງຄັ້ງນີ້ ກາຍເປັນການກຳນົດແນວທາງອະນາຄົດຂອງເຢຍລະມັນ ເຊິ່ງເປັນປະເທດທີ່ມີຂະໜາດເສດຖະກິດໃຫຍ່ທີ່ສຸດຂອງເອີຣົບ.
ສະຖານີໂທລະພາບ ZDF ຂອງເຢຍລະມັນ ໄດ້ຄາດການຜົນການເລືອກຕັ້ງ ໂດຍລະບຸວ່າ: ຄາດວ່າ ພັກ SPD ຈະໄດ້ສຽງສະໜັບສະໜູນປະມານ 26%, ໃນຂະນະທີ່ ພັກ UDC/CSU ຄາດວ່າ ຈະໄດ້ 24,5%.
ທັງສອງພັກເຊື່ອວ່າ ຕົນສາມາດເປັນແກນນຳຈັດຕັ້ງລັດຖະບານໄດ້ ແຕ່ເນື່ອງຈາກວ່າ ບໍ່ມີຝ່າຍໃດໄດ້ຮັບໄຊຊະນະແບບຖະຫຼົ່ມທະລາຍ ຈຶ່ງຄາດການວ່າ ລັດຖະບານເຢຍລະມັນທີ່ກຳລັງຈະຈັດຕັ້ງຂຶ້ນໃໝ່ນີ້ ໜ້າຈະເປັນການຈັບມືກັນລະຫວ່າງພັກ SPD ແລະ ພັກ UDC/CSU ແທນທີ່ຈະເປັນຮູບແບບລັດຖະບານປະສົມຫຼາຍພັກເໝືອນກັບ 4 ປີຜ່ານມາ. ດັ່ງນັ້ນ ຄາດວ່າ ອາດຈະຕ້ອງໃຊ້ເວລານານ ອາດແກ່ຍາວໄປເຖິງທ້າຍປີກໍເປັນໄດ້, ດັ່ງນັ້ນ ລັດຖະບານພາຍໃຕ້ການນຳຂອງທ່ານ ນາງ ແອັງເກີລາ ແມເຄິນ ຈຶ່ງຍັງຮັກສາການຕໍ່ໄປ ຈົນກວ່າຈະສາມາດຈັດຕັ້ງລັດຖະບານໄດ້.
ທ່ານ ໂອລາຟ ໂຊລ ຜູ້ລົງສະມັກຊີງຕຳແໜ່ງນາຍົກລັດຖະມົນຕີເຢຍລະມັນ ພັກ SPD ກ່າວວ່າ: ພັກຂອງລາວ ມີຄະແນນນຳທຸກຜົນໂພລ (ຜົນສຳຫຼວດ), ໄຊຊະນະຂອງພັກ ແມ່ນຄວາມຕ້ອງການທີ່ຊັດເຈນຂອງປະຊາຊົນໃນການຈັດຕັ້ງລັດຖະບານທີ່ສາມາດບໍລິຫານງານໄດ້ຢ່າງມີປະສິດທິພາບ.
ທັງນີ້ ທ່ານ ໂຊລ ເຄີຍດຳລົງຕຳແໜ່ງເປັນລັດຖະມົນຕີກະຊວງການເງິນເຢຍລະມັນ ໃນລັດຖະບານພາຍໃຕ້ການນຳຂອງ ທ່ານ ນາງ ແອັງເກີລາ ແມເຄິນ ແລະ ເຄີຍເປັນເຈົ້າຄອງນະຄອນຮຳບວກ.