ມິເກລ ອາເຕຕ້າ ຜູ້ຈັດການທີມຂອງ ອາເຊນອລ ເປີດໃຈຫຼັງຈາກທີ່ພາທີມເອົາຊະນະ ທ໊ອດແນມ ຮ໊ອດສະເປີ 3-1 ໃນການແຂ່ງຂັນພຣີເມຍລີກ ອັງກິດ ເມື່ອວັນທີ 26 ກັນຍາ 2021 ເກັບໄຊຊະນະ 3 ນັດລວດ ຫຼັງຈາກທີ່ເສຍມາ 3 ນັດລວດໃນລະດູນີ້ວ່າ: ສິ່ງທີ່ພະຍາຍາມສ້າງກັບ ອາເຊນອລ ເລີ່ມເປັນຮູບເປັນຮ່າງແລ້ວ
ນັດດັ່ງກ່າວ ອາເຊນອລ ສ້າງຜົນງານໄດ້ໂດດເດັ່ນ ແລະ ໄດ້ 3 ປະຕູລວດຈາກການຍິງຂອງ ສະມິດ ໂຣວ໌ ນາທີໆ 12, ປີແອ-ເອເມຣິກ ໂອບາເມຢອງ ນາທີໆ 27 ແລະ ບູກາໂຢ ຊາກາ ນາທີໆ 34 ກ່ອນທີ່ ສະເປີ ຈະໄລ່ມາເປັນ 1-3 ຈາກການຍິງຂອງ ຊອນ ເຮືອງມິນ ນາທີໆ 79 ຈົບເກມ ອາເຊນອລ ເອົາຊະນະໄປ 3-1.
ຫຼັງຈົບການແຂ່ງຂັນ ອາເຕຕ້າ ໃຫ້ສໍາພາດວ່າ: ການສ້າງທີມໃໝ້ນັ້ນ ສິ່ງສໍາຄັນຄືການເຮັດສິ່ງທີ່ຖືກຕ້ອງ ແລະ ຢຶດມັ້ນໃນຄຸນຄ່າຂອງຕົວເອງ ເຊິ່ງຕອນນີ້ ສະໂມສອນກໍາລັງສ້າງສາຍສໍາພັນກັບແຟນບານ, ທຸກຄົນມີຄວາມມຸ່ງໝັ້ນ, ຕັ້ງໃຈ, ມີພະລັງເຫຼືອລົ້ນ ແລະ ຕ່າງຢູ່ໃນຟອມການຫຼິ້ນທີ່ດີ ແນ່ນອນຮູ້ສຶກມ່ວນທີ່ໄດ້ເຫັນທຸກຄົນຊ້ອມຢ່າງໜັກ, ຕັ້ງໃຈ ແລະ ຕ່າງຊ່ວຍເຫຼືອກັນແລະກັນ ເພື່ອພັດທະນາຕົວເອງ, ຍົກລະດັບທີມ ແລະ ມັນກໍສະແດງໃຫ້ເຫັນຜ່ານການຫຼິ້ນໃນແບບນີ້ ຕໍ່ຈາກນີ້ຄືການຮັກສາມາດຕະຖານການຫຼິ້ນໃຫ້ສະໝໍ່າສະເໝີ.