ຄວາມມຸ້ງໝັ້ນຕັ້ງໃຈ, ບວກພອນສະຫວັນທີ່ມີ ຕ້ອງປະສົບຄວາມສໍາເລັດ ຄິດຕີ້ ປາຖະໜາ

641

ແນະນໍາສາວງາມ ແຟນໆເຊຍຫນັກແຮງ ໃນເວທີປະກວດ Miss Universe Laos 2021  ປາຖະໜາ ອຸດທະຍອດ ຫຼຶ ຄິດຕີ້ ຫມາຍເລກ001 ປັດຈຸບັນ ອາຍຸ 20ປີ ສ່ວນສູງ 170 ຊັງຕີແມັດ, ກໍາລັງສຶກສາຢູ່ ມະຫາວິທະຍາໄລ ເເພດສາດ, ສາຂາ ເເພດທົ່ວໄປທີ່ ສປ ຈີນ.

ທີ່ຜ່ານມາຄິດຕີ້ເຄີຍລົງປະກວດນາງສາວລາວ ໄດ້ເຂົ້າຮອບ 40ຄົນ ເພາະຍັງບໍ່ປະສົບຜົນສໍາເລັດໄດ້ທີ່ຫວັງໄວ້ ຈຶ່ງເຮັດໃຫ້ຕັດສິນໃຈລົງປະກວດອີກຄັ້ງ  ຄວາມໄຝ່ຝັນສຳລັບການປະກວດເວທີນີ້ກໍຄື ຢາກເປັນຕົວເເທນແມ່ຍິງລາວນຳເອົາຄວາມເປັນລາວໄປເຜີຍແຜ່ໃຫ້ຕ່າງຊາດໄດ້ຮູ້, ນ້ອງຢາກໃຫ້ປະເທດເຮົາເປັນທີ່ຮູ້ຈັກໃນລະດັບສາກົນ ໃຫ້ຫລາຍຂຶ້ນ ແລະ ນ້ອງກໍຢາກເປັນແຮງບັນດານໃຫ້ໄວຫນຸ່ມຍິງ ກ້າກ້າວຕາມຄວາມຝັນຂອງຕົນເອງ ໃຫ້ເຊື່ອຫມັ້ນໃນຕົນເອງ ແລະ ເປັນຕົວເອງໃນແບບທີ່ເຈົ້າຕ້ອງການ.

["]

ຄະຕິປະຈຳໃຈຂອງຄິດຕີ້ແມ່ນ: ‘’ບໍ່ມີສີ່ງໃດທີ່ເຮັດບໍ່ໄດ້ ຂໍພຽງແຕ່ເຮົາຕັ້ງໃຈ ແລະ ມີເປົ້າໝາຍທຸກຢ່າງສາມາດປະສົບຜົນສຳເລັດຢ່າງແນ່ນອນ’’

ຖ້າຫາກວ່າຜ່ານເຂົ້າຮອບເລິກໆໄດ້ ສິ່ງທີ່ຄິດຕີ້ຈະສະແດງໃຫ້ທຸກຄົນໄດ້ເຫັນກໍຄືຄວາມຄວາມສາມາດດ້ານສິລະປະກໍຄື: ການຟ້ອນລຳ ແລະ ຄວາມສາມາດດ້ານກິລາ ທີ່ເປັນຄວາມມັກຮັກ ແລະ ຄິດຕີ້ກໍໄດ້ຝຶກຝົນຕົນເອງມາໂດຍຕະຫລອດ.

ຄິດຕີ້ ຄິດວ່າຕົນເອງມີຈຸດເດັ່ນທີ່ຈະສາມາດເອົາຊະນະໃຈກຳມະການໄດ້ນັ້ນຄື: ຄວາມຕັ້ງໃຈ, ມຸ້ງໝັ້ນ, ບວກກັບພອນສະຫວັນທີ່ນ້ອງມີ ເຫນືອສິ່ງອື່ນໃດຄືການທີ່ນ້ອງເປັນຕົວຂອງຕົວເອງ, ກ້າຄິດ ແລະ ກ້າສະແດງອອກ ນ້ອງຄິດວ່າສິ່ງນີ້ແຫລະຄືສິ່ງທີ່ຈະສະແດງໃຫ້ເຫັນວ່ານ້ອງມີຄວາມພ້ອມກັບການປະກວດໃນຄັ້ງນີ້

ກ່ອນການປະກວດແມ່ນ ໄດ້ມີການກຽມຕົວທັງດ້ານຮ່າງກາຍ ແລະ ຈິດໃຈ ເພາະນອກຈາກຮູບຮ່າງຫນ້າຕາທີດີ ຫຸ່ນທີ່ດີແລ້ວ ສິ່ງທີ່ສຳຄັນທີ່ສຸດກໍຄື ຈິດໃຈ, ການມີຄວາມຄິດບວກ ແລະ ໃຫ້ກຳລັງໃຈຕົນເອງຢູ່ສະເຫມີ.

ທີ່ຜ່ານມາໄດ້ມີການປະກອບສ່ວນຊ່ວຍເຫຼືອສັງຄົມຄື ຮັບບໍລິຈາກເຄື່ອງອຸປະກອນການຮຽນໃຫ້ກັບນ້ອງໆ ທີ່ຫ່າງໄກສອກຫຼີກຢູ່ແຂວງຫຼວງນ້ຳທາ ແລະ ຖ້າມີໂອກາດກໍຢາກຈະປະກອບສ່ວນໃນການຊ່ວຍເຫລືອສັງຄົມໃນຫລາຍດ້ານເລີຍຕາມກໍາລັງແຮງ.

ກິດຈະກຳຍາມວ່າງມັກຈະອອກກຳລັງກາຍ ແລະ ໃຊ້ເວລາຢູ່ນຳຄອບຄົວ ພໍ່ ແມ່ ແລະ ອ້າຍ ມັກຟັງເພງ ແລະ ອ່ານບົດຄວາມຕ່າງໆຕາມສື່ອອນລາຍ ເພື່ອຜ່ອນຄາຍ ແລະ ເພີ່ມພູນຄວາມຮູ້ໃຫມ່ໆໃຫ້ຕົນເອງ

ສຸດທ້າຍນີ້ ຝາກທຸກຄົນຊ່ວຍເຊຍ ແລະ ເປັນກໍາລັງໃຈໃຫ້ຄິດຕີ້ແດ່ເດີ້ ສາມາດຕິດຕາມຜົນງານ ແລະ ການເຄື່ອນໄຫວຕ່າງໆ ຂອງຄິດຕີ້ໄດ້ຜ່ານທາງ ເຟສບຸກສ່ວນຕົວ Pathana Outthayoth.

 

ຮູບ: Pathana Outthayoth.