ສຳນັກຂ່າວຣອຍເຕີ ລາຍງານວ່າ ຫວຽດນາມໄດ້ເລື່ອນການເປີດເກາະຟູກວັກ (Phu Quoc) ເຊິ່ງເປັນເກາະໃຫຍ່ທີ່ສຸດຂອງປະເທດ ເພື່ອຕ້ອນຮັບນັກທ່ອງທ່ຽວອອກໄປ ເປັນເດືອນພະຈິກ ຈາກເດີມຈະເປີດໃນເດືອນຕຸລານີ້, ເນື່ອງຈາກອັດຕາການສັກວັກຊີນປ້ອງກັນໂຄວິດ-19 ໃຫ້ປະຊາຊົນໃນເຂດພື້ນທີ່ຍັງຕ່ຳ.
ຄະນະກຳມະການປະຊາຊົນເມືອງຟູກວັກ ໄດ້ອອກແຈ້ງການວ່າ ຍັງບໍ່ສາມາດເປີດເກາະຕ້ອນຮັບນັກທ່ອງທ່ຽວທີ່ສັກວັກຊີນຄົບໂດສແລ້ວ ໃຫ້ມາທ່ອງທ່ຽວເກາະດັ່ງກ່າວໄດ້ ຕາມນະໂຍບາຍຂອງລັດຖະບານໄດ້ເທື່ອ ເນື່ອງຈາກວ່າ ການສັກວັກຊີນປ້ອງກັນໂຄວິດ-19 ໃຫປະຊາຊົນທ້ອງຖິ່ນຍັງບໍ່ບັນລຸເປົ້າໝາຍ, ນອກຈາກນີ້ ຍັງກວດພົບຜູ້ຕິດເຊື້ອໃໝ່ຢ່າງຕໍ່ເນື່ອງ, ດັ່ງນັ້ນ ຈຶ່ງຂໍເລື່ອນອອກໄປເປັນເດືອນພະຈິກ 2021.
ທັງນີ້ ກະຊວງການທ່ອງທ່ຽວຫວຽດນາມປະກາດໃນຕົ້ນເດືອນກັນຍາວ່າ ກຽມໃຫ້ເກາະຟູກວັກຕ້ອນຮັບນັກທ່ອງທຽວຕ່າງປະເທດ ເພື່ອເປັນຕົ້ນແບບ ໂດຍມີເງື່ອໄຂວ່າ ນັກທ່ອງທ່ຽວທີ່ຈະເດີນທາງມາທ່ອງທ່ຽວເກາະແຫ່ງນີ້ ຕ້ອງສັກວັກແຊັງຄົບໂດສ ແລະ ມີຜົນກວດໂຄວິດເປັນລົບພາຍໃນ 72 ຊົ່ວໂມງ ກ່ອນການເດີນທາງ.
