ເກີດນ້ຳຖ້ວມຊຸ ບ້ານຫ້ວຍແສງ​ ເມືອງເລົ່າງາມ ແຂວງສາລະວັນ, ຂະນະທີ່ກົມອຸຕຸ ແຈ້ງເຕືອນຝົນຕົກໜັກຈາກພາຍຸເຂດຮ້ອນດຽນມູ​

453

ອີງຕາມການລາຍງານຂອງກົມອຸຕຸນິຍົມ ແລະ​ ອຸທົກກະສາດ​ ໃນຕອນ​ເຊົ້າວັນທີ​ 24​ ກັນຍາ​ 2021​ ຈຸດສູນກາງຂອງພາຍຸເຂດຮ້ອນດຽນມູ​ ຢູ່ເມືອງຕຸ້ມລານ ແຂວງ​ສາລະວັນ​ ແລະ​ ໃນເຊົ້າວັນດຽວກັນທີ່ເມືອງ​ເລົ່າ​ງາມ​ ໄດ້ເກີດນ້ຳປ່າໄຫຼຊຸຖ້ວມ​ ບ້ານຫ້ວຍແສງ​ ເນື່ອງຈາກຝົນຕົກໜັກ.

ຈາກການສຳພາດ​ ທ້າວ​ ສຸລິສັກ​ ປະຊາຊົນ​ ບ້ານຫ້ວຍແສງ​ ເມືອງເລົ່າງາມ​ ຜ່ານທາງໂລສັບໃຫ້ຮູ້ວ່າ: ນ້ຳໄຫຼຊຸຖ້ວມບ້ານ ແມ່ນເວລາປະມານ 8-9​ ໂມງເຊົ້າ​ຂອງວັນທີ​ 24​ ກັນຍາ​ນີ້​ ເນື່ອງຈາກຝົນຕົກໜັກ,​ ເປັນນ້ຳປ່າ ແລະ​ ມາຮອດປັດຈຸບັນຝົນໄດ້ຢຸດຕົກ​ ແລະ ໄດ້ມີການນຳເມືອງລົງມາຕິດຕາມສະຖານະການ,​ ສ່ວນຄວາມເສຍຫາຍແມ່ນຍັງບໍ່ທັນຮູ້.​ ພ້ອມດຽວກັນນີ້,​ ຜູ້ໃຊ້ເຟສບຸກຊື່​: LarNoy VLc ກໍ່ໄດ້ໂພສພາບນ້ຳຖ້ວມ ພ້ອມບັນຍາຍວ່າ ບ້ານຫ້ວຍແສງ ນ້ຳໄຫຼຊຸເຂົ້າຮ້ານເອົາຫຍັງກະບໍ່ທັນ​ ເນື່ອງຈາກຝົນຕົກຄືນດຽວ.

["]

ນອກຈາກນີ້,​ ກົມ​ອຸຕຸນິຍົມ​ ແລະ​ ອຸທົກກະສາດ​ ຄາດວ່າ: ໄລຍະວັນທີ 24 ກັນຍາ 2021 ຈະມີຝົນຕົກປານກາງ ຫາ ໜັກ ແລະ ລົມພັດແຮງ ຢູ່ບາງທ້ອງຖິ່ນເຂດພາກໃຕ້ ເຊັ່ນ: ແຂວງອັດຕະປື, ຈໍາປາສັກ, ເຊກອງ ແລະ ສາລະວັນ ຊຶ່ງຈະເຮັດໃຫ້ເກີດມີຕົ້ນໄມ້ຫັກລົ້ມ, ຫຼັງຄາເຮືອນເປ່ເພ, ນ້ຳຖ້ວມອັ່ງ ແລະ ນໍ້າຖ້ວມຍື່ງ ຢູ່ບາງທ້ອງຖິ່ນ.

ໄລຍະວັນທີ 24 – 26 ກັນຍາ 2021​ ຈະມີຝົນຕົກໃນລະດັບປານກາງ ຫາ ໜັກ ແລະ ລົມພັດແຮງ ຢູ່ເຂດພາກກາງ ແລະ ພາກເໜືອດ້ານຕາເວັນຕົກເຊັ່ນ: ແຂວງ ສະຫວັນນະເຂດ, ຄໍາມ່ວນ, ບໍລິຄໍາໄຊ, ວຽງຈັນ, ໄຊສົມບູນ, ນະຄອນຫຼວງວຽງຈັນ, ຫຼວງພະບາງ, ໄຊຍະບູລີ ແລະ ບໍ່ແກ້ວ ຊຶ່ງຈະເຮັດໃຫ້ເກີດມີນ້ໍາຖ້ວມກະທັນຫັນ, ນໍ້າຖ້ວມຊ ແລະ ດິນເຈື່ອນ ຢູ່ບາງທ້ອງຖິ່ນ