ທະນາຄານພັດທະນາອາຊີ (ADB) ໄດ້ເຜີຍແຜ່ບົດລາຍງານຄາດການຂະຫຍາຍຕົວເສດຖະກິດພູມີພາກອາຊີປະຈຳປີ 2021 ໂດຍຄາດວ່າ ເສດຖະກິດອາຊີຈະຂະຫຍາຍຕົວຊ້າລົງ ຫຼັງຈາກຫຼາຍປະເທດຍັງປະເຊີນກັບການແຜ່ລະບາດຂອງພະຍາດໂຄວິດ-19 ຢ່າງໜັກ, ໃນຂະນະດຽວກັນການຈັດຫາວັກແຊັງກໍຍັງບໍ່ພຽງພໍ ເຮັດໃຫ້ອັດຕາການສັກວັກແຊັງປ້ອງກັນໂຄວິດ-19 ຢູ່ໃນລະດັບຕ່ຳ ຈຶ່ງຈຳເປັນຕ້ອງໃຊ້ມາດຕະການລັອກດາວ ທີ່ສົ່ງຜົນກະທົບຕໍ່ເສດຖະກິດໂດຍກົງ.
ເອດີບີຄາດການວ່າ ເສດຖະກິດອາຊີຈະຂະຫຍາຍຕົວ 7,1% ເຊິ່ງຫຼຸດລົງຈາກການຄາດການຄັ້ງຜ່ານມາທີ່ຄາດວ່າ ຈະຂະຫຍາຍຕົວ 7,3% ແນວໃດກໍຕາມເສດຖະກິດຂອງອາຊີຍັງມີຄວາມທ້າທາຍຫຼາຍຢ່າງ ແລະ ມີຄວາມແຕກຕ່າງກັນຫຼາຍລະຫວ່າງປະເທດຕ່າງໆໃນພູມີພາກ.
ເອດີບີລະບຸວ່າ ອັດຕາການສັກວັກແຊັງປ້ອງກັນໂຄວິດ-19 ໃນພູມີພາກອາຊີຍັງຕ່ຳກວມປະມານ 30% ຂອງປະຊາກອນ ເຊິ່ງຖືວ່າຕ່ຳຫຼາຍ ເມື່ອທຽບກັບສະຫະລັດອາເມຣິກາ 50% ແລະ ເອີຣົບ 60%. ພ້ອມເຕືອນວ່າ ຄວາມຫຼ້າຊ້າຂອງການສັກວັກແຊັງ ເມື່ອປະເຊີນກັບການລະບາດຂອງເຊື້ອພະຍາດກາຍພັນໃໝ່ໆ ໂດຍສະເພາະສາຍພັນເດວຕ້າ ຖືວ່າ ເປັນຄວາມສ່ຽງອັນໃຫຍ່ຫຼວງທີ່ສຸດຕໍ່ພາບລວມທາງເສດຖະກິດຂອງອາຊີ ແລະ ອາດສ້າງຄວາມເສຍຫາຍໄລຍະຍາວຕໍ່ພູມີພາກໂດຍຈະກໍ່ໃຫ້ເກີດການສູນເສຍລາຍໄດ້ ແລະ ກໍ່ໃຫ້ເກີດຜົນກະທົບຕໍ່ເສດຖະກິດຂອງພູມີພາກໃນຫຼາຍມິຕິໄດ້.
ເອດີບີຍັງລະບຸວ່າ ຜົນກະທົບຄັ້ງນີ້ ເຮັດໃຫ້ຄວາມກ້າວໜ້າໃນການຫຼຸດຜ່ອນຄວາມທຸກຍາກຂອງປະຊາຊົນໃນບັນດາປະເທດກຳລັງພັດທະນາຕ້ອງຖອຍຫຼັງອອກໄປອີກຢ່າງໜ້ອຍ 2 ປີ, ໃນຂະນະທີ່ການປິດການຮຽນ-ການສອນຈະສົ່ງຜົນໃຫ້ເກີດການສູນເສຍທາງດ້ານການສຶກສາ ແລະ ສູນເສຍລາຍໄດ້ສູງກວ່າທີ່ຄາດໄວ້.
ສ່ວນພູມີພາກອາຊີຕາເວັນອອກ ເຊິ່ງມີອັດຕາການສັກວັກແຊັງສູງສຸດໃນອາຊີ ແລະ ລັດຖະບານສາມາດຄວບຄຸມການແຜ່ລະບາດໄດ້ໄວ ຄາດວ່າ ເສດຖະກິດຈະຂະຫຍາຍຕົວ 7,6% ໃນປີນີ້ ເຊິ່ງເພີ່ມຂຶ້ນຈາກການຄາດການຄັ້ງຜ່ານມາທີ່ຄາດວ່າ ຈະຂະຫຍາຍຕົວ 7,4%.
ສ່ວນພູມມີພາກອາຊີຕາເວັນອອກສຽງໃຕ້ ເຊິ່ງກຳລັງປະເຊີນກັບການແຜ່ລະບາດຢ່າງໜັກ ຄາດວ່າຈະຂະຫຍາຍຕົວ 3,1% ຫຼຸດລົງຈາກ 4,4% ຈາກການຄາດການຄັ້ງຜ່ານມາ ໂດຍໄດ້ປັບຫຼຸດທັງອິນໂດເນເຊຍ, ມາເລເຊຍ, ໄທ ແລະ ຫວຽດນາມ, ສ່ວນພາກພື້ນປາຊີຟິກຈາກເດີມຄາດວ່າ ຈະຂະຫຍາຍຕົວ 1,4% ຫຼຸດລົງເຫຼືອ 0,6% ເທົ່ານັ້ນ.