ເປົ້າຫມາຍສູງສຸດຄືການຢາກເປັນຕົວແທນນາງງາມລາວໃນເວທີສາກົນ ນີ ນີວັນ ຫມາຍເລກ004

622

ເວທີ Miss Universe Laos ຈະກັບມາສ້າງຄວາມຕື່ນຕາຕື່ນໃຈໃຫ້ກັບແຟນໆນາງງາມ ເຊິ່ງປັດຈຸບັນເວທີນີ້ໄດ້ເປີດໂອກາດໃຫ້ກັບສາວໆ ຜູ້ທີ່ມີຄວາມຝັນ ແລະ ມັກຮັກໃນວົງການນາງງາມໄດ້ໂຊສັກກະຍາພາບ ສະແດງຄວາມສາມາດ ເປີດຮັບສະຫມັກ ຕັ້ງແຕ່ມື້ນີ້ ຈົນເຖິງວັນທີ 29 ກັນຍາ 2021ນີ້.

ມື້ນີ້ຂ່າວບັນເທີງ ຈະແນະນໍາໃຫ້ທຸກຄົນໄດ້ຮູ້ຈັກກັບສາວງາມຜູ້ເຂົ້າປະກວດ ນີວັນ ຕູ່ວີກື້ ຫລື ນີ ຫມາຍເລກ 004 ສ່ວນສູງ 165 cm ປັດຈຸບັນ ອາຍຸ 25ປີ, ຈາກແຂວງຫົວພັນ , ຈົບການສຶກສາຈາກ ສສ ຫວຽດນາມ ເຊິ່ງຜ່ານມານີເຄີຍຮ່ວມການປະກວດເວທີ Miss World Laos 2021 ແຕ່ໄປບໍ່ເຖິງຝັນ ແລະ ເປົ້າຫມາຍທີ່ຕັ້ງໄວ້ ສະນັ້ນຈຶ່ງເຮັດໃຫ້ ນີຕັດສິນໃຈກັບມາປະກວດອີກຄັ້ງ ແລະ ເຖິງວ່າໃນເວທີຜ່ານມານີບໍ່ໄດ້ເຂົ້າຮອບເລິກໆແຕ່ຢ່າງໜ້ອຍນີກໍໄດ້ປະສົບການໃຫ້ຕົນເອງ, ຮຽນຮູ້ອີກຫຼາຍຢ່າງ ໄດ້ມິດຕະພາບຈາກຫມູ່ເພື່ອທີ່ຮ່ວມປະກວດນໍາກັນ ເຊິ່ງຈາກຈຸດເລີ່ມຕົ້ນນັ້ນແລະ ທີ່ເຮັດໃຫ້ມັກຮັກໃນດ້ານນີ້ ແລະ ຢາກເຮັດວຽກໃນວົງການບັນເທິງ.

["]

ສໍາລັບ ຄະຕິ ປະຈຳໃຈແມ່ນ: ‘’ ແຂງແກ່ງ ແຕ່ບໍ່ແຂງກະດ້າງ ອ່ອນໂຍນ ແຕ່ບໍ່ອ່ອນແອ” ໃຫ້ສົມກັບເປັນແມ່ຍິງລາວທີ່ທັນສະໄຫມ ຄືການມີກິລິຍາມາລະຍາດທີ່ອ່ອນໂຍນ, ອ່ອນນ້ອມ ແຕ່ໃນຂະນະດຽວກັນກໍ່ມີຄວາມເຂັ້ມແຂງ ແລະ ພ້ອມຈະຜ່ານຜ່າທຸກອຸປະສັກບັນຫາທີ່ເຂົ້າມາ.

ແລະ ການທີ່ນີເລືອກປະກວດເວທີນີ້ ເພາະນີມີຄວາມຝັນສູງສຸດກໍຄືວ່າ: ນີຢາກເປັນຕົວແທນຂອງສາວລາວໃນເວທີສາກົນ ໃນການເປັນກະບອກສຽງຫນຶ່ງເພື່ອເຜີຍແຜ່ວັດທະນະທໍາ ແລະ ສະຖານທີ່ທ່ອງທ່ຽວຂອງລາວໃຫ້ຊາວໂລກໄດ້ຮັບຮູ້ເຖິງຄວາມເປັນລາວ.

ສໍາລັບນີເອງຄິດວ່າຕົນເອງມີຈຸດເດັ່ນແມ່ນ ງາມຢ່າງໝັ້ນໃຈ ບໍ່ວ່າຈະໜ້າຕາແບບໃດ, ຜິວສີໃດ, ຄົນຊົນເຜົ່າໃດກໍຕາມ ກໍມີຄວາມຮູ້, ຄວາມສາມາດ ແລະ ໄຫວພິບປະຕິພານບໍ່ແພ້ກັນ ສິ່ງນີ້ແລະທີ່ສາມາດເອົາຊະນະໃຈຄະນະກຳມະການ ແລະ ເປັນ Miss Universe Laos 2021 ຫຼຶ ຈັກກະວານໄດ້.

ກ່ອນການປະກວດນີໄດ້ມີການກຽມຕົວຫລາຍຢ່າງເລີຍບໍ່ວ່າຈະເປັນການຝຶກຊ້ອມຍ່າງ, ຝຶກຕອບຄໍາຖາມ ແລະ ປັບທັດສະນະຄະຕິອື່ນໆອີກຫຼາຍຢ່າງ ຖ້າໄດ້ຕຳແຫນ່ງອັນຊົງກຽດຈາກເວທີນີ້ ນີຢາກປະກອບສ່ວນເພື່ອຊ່ວຍເຫລືອສັງຄົມ ໂດຍສະເພາະແມ່ນເດັກນ້ອຍທີ່ດ້ອຍໂອກາດຢູ່ເຂດຫ່າງໄກສອກຫຼີກ, ບໍ່ມີໂອກາດໄດ້ຮ່ຳຮຽນຕາມຈຸດປະສົງ ໃຫ້ໄດ້ຮັບໂອກາດຄືກັບຄົນທົ່ວໄປໃນສັງຄົມ.

ເວລາວ່າງນີກອອກກຳລັງກາຍ, ອ່ານຂ່າວນາງງາມ ແລະ ອີກຫຼາຍທີ່ຢ່າງທີ່ກ່ຽວກັບວົງການນາງງາມ ສຸດທ້າຍນີ້ຂໍຝາກທຸກຄົນຊ່ວຍເຊຍໃຫ້ເຂົ້າຮອບເລິກໆແດ່ເດີ ສາມາດຕິດຕາມຜົນງານການເຄື່ອນໄຫວຕ່າງໆຂອງນີໄດ້ຜ່ານທາງ ເຟສບຸກສ່ວນຕົວ NI Ny.

ຮູບ: NI Ny