ເຈົ້າແຂວງບໍ່ແກ້ວ ພົບປະຢ້ຽມຢາມ ກອງພັນໃຫຍ່ 302 ຢູ່ເມືອງຜາອຸດົມ

356

ໃນວັນທີ 22 ກັນຍານີ້ ທ່ານ ບົວຄົງ ນາມມະວົງ  ເຈົ້າແຂວງບໍ່ແກ້ວ ພ້ອມຄະນະນຳຂອງແຂວງ, ເມືອງ ໄດ້ລົງພົບປະຢ້ຽມຢາມກອງພັນໃຫຍ່ 302 ຢູ່ເມືອງຜາອຸດົມ, ມີຄະນະພັກ, ຄະນະບັນຊາໃຫ້ການຕ້ອນຮັບ.


ພັນໂທ ຈອມໃຈ ໄຊພະວົງ ຫົວໜ້າການເມືອງກອງພັນໃຫຍ່ 302 ໄດ້ລາຍງານສະພາບການພັດທະນາປັບປຸງພື້ນຖານໂຄງລ່າງ ປັດຈຸບັນແມ່ນມີການຂະຫາຍຕົວພໍສົມຄວນ ເປັນຕົ້ນອາຄານສະຖານທີ່ບ່ອນເຮັດວຽກມີຫຼາຍຫຼັງແໜ້ນໜ້າຖາວອນ ແລະ ຢູ່ໃນໄລຍະກໍ່ສ້າງ ເປັນຕົ້ນແມ່ນ ສະໂມສອນ, ບ່ອນຈອດລົດ, ບ່ອນພັກເຊົາ ແລະ ບ່ອນເຮັດວຽກແຕ່ລະກອງຮ້ອຍຈຳນວນໜຶ່ງ.

ນອກນີ້ ຍັງປັບປຸງຊີວິດການເປັນຢູ່ຂອງພະນັກງານອ້າຍນ້ອງທະຫານໂດຍການຖືເອົາການເພີ່ມພູນຜະລິດຜົນດ້ວຍການປູກການລ້ຽງເພື່ອໄດ້ແກ້ດ້ານວິກິດທາງເສດຖະກິດໃນປັດຈຸບັນ ແລະ ໄດ້ເປັນເຈົ້າການປະກອບສ່ວນເຄື່ອນໄຫວໃນການປ້ອງກັນ,ສະກັດກັ້ນ ແລະ ຕ້ານ ການລະບາດຂອງພະຍາດໂຄວິດ -19 ,ວຽກງານປ້ອງກັນຊາດ ແລະ ການປະສານສົມທົບພາກສ່ວນທີ່ກ່ຽວຂ້ອງ ແກ້ໄຂປະກົດການຫຍໍ້ທໍ້ຕ່າງໆໃນສັງຄົມຢ່າງຕັ້ງໜ້າ ແລະ ໄດ້ສະເໝີບາງດ້ານທີ່ຍັງເປັນຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານ ກໍ່ຄື: ດ້ານພາຫະນະຮັບໃຊ້ ແລະ ງົບປະມານ.

["]

ທ່ານ  ບົວຄົງ ນາມມະວົງ  ໄດ້ສະແດງຄວາມຍ້ອງຍໍຊົມເຊີຍທີ່ຄະນະພັກ ຄະນະບັນຊາ ໄດ້ເອົາໃຈໃສ່ໃນທຸກວຽກງານໃຫ້ດຳເນີນໄປຢ່າງປົກກະຕິ ແລະ ມີຄຳເຫັນແນະນຳໃນການຈັດຕັ້ງປະຕິບັດໃຫ້ສອດຄ່ອງກັບສະພາບຄວາມເປັນຈິງໃນສະພາບ ແລະ ໃຫ້ການຊ່ວຍເຫຼືອຕາມທ່າແຮງທີ່ມີຂອງແຂວງໃນປັດຈຸບັນ. ນອກນີ້ ທາງແຂວງຈະໄດ້ຊ່ວຍເຫຼືອນໍ້າມັນກາຊວນ 500 ລິດ ແກ່ກອງພັນໃຫຍ່ 302 ເພື່ອປະກອບສ່ວນຮັບໃຊ້ເຂົ້າໃນການບຸກເບີກສະໜານເຝິກແອບຍິ່ງປືນ ໃຫ້ໄດ້ຮັບການບຸກເບີກຢ່າງເປັນຮູບປະທຳ.


ຂ່າວ: ສາຍສະໝອນ