ສຳນັກຂ່າວຕ່າງປະເທດລາຍງານໃນວັນທີ 22 ກັນຍາ 2021 ວ່າ ປະທານາທິບໍດີ ໂຈ ໄບເດັນຂອງສະຫະລັດອາເມຣິກາໄດ້ຂຶ້ນກ່າວຄຳປາໃສໃນກອງປະຊຸມສະມັດຊາໃຫຍ່ ສະຫະປະຊາຊາດ (UNGA) ຄັ້ງທີ 76 ໂດຍຢືນຢັນວ່າ ສະຫະລັດບໍ່ໄດ້ສະແຫວງຫາສົງຄາມເຢັນຄັ້ງໃໝ່ກັບ ສປ ຈີນ ແລະ ເນັ້ນຢ້ຳເຖິງຄວາມຈຳເປັນທີ່ທຸກຝ່າຍຕ້ອງເຮັດວຽກຮ່ວມກັນ ເນື່ອງຈາກມີຫຼາຍບັນຫາຕ້ອງຮ່ວມກັນແກ້ໄຂ ນັບແຕ່ການລະບາດຂອງພະຍາດໂຄວິດ-19 ຕະຫຼອດຮອດການແກ້ໄຂການປ່ຽນແປງດິນຟ້າອາກາດ ແລະ ບັນຫາສິດທິມະນຸດ.
ນອກຈາກນີ້ ປະທານາທິບໍດີໂຈ ໄບເດນ ຍັງໄດ້ຮຽກຮ້ອງໃຫ້ມີຄວາມເປັນເອກະພາບ ທ່າມກາງຄວາມເຄັ່ງຕຶງລະຫວ່າງສະຫະລັດກັບຊາດພັນທະມິດ ໂດຍສະເພາະບັນຫາການຖອນທະຫານອອກຈາກອັຟການິສຖານ ຕະຫຼອດຮອດການປະເຊີນໜ້າທາງການທູດກັບຝຣັ່ງກ່ຽວກັບການຮ່ວມມືດ້ານຄວາມໝັ້ນຄົງ ໂອຄຸສ (AUKUS) ທີ່ນຳໂດຍສະຫະລັດ, ອັງກິດ ແລະ ອົດສະຕຣາລີ ເຊິ່ງເຮັດໃຫ້ຍົກເລີກສັນຍາຊື້ເຮືອດຳນ້ຳຈາກຝຣັ່ງຕາມມາ. ແນວໃດກໍຕາມ ຜູ້ນຳສະຫະລັດບໍ່ໄດ້ກ່າວເຖິງສຽງວິພາກວິຈານຂອງຊາດພັນທະມິດຕໍ່ກໍລະນີການຖອນທະຫານອອກຈາກອັຟການິສຖານ ລວມທັງຄວາມເຄັ່ງຕຶງທາງການທູດກັບຝຣັ່ງ ແຕ່ຢ່າງໃດ.
ຜູ້ນຳສະຫະລັດ ກ່າວຢ້ຳວ່າ: ລັດຖະບານສະຫະລັດອາເມຣິກາ ຈະສະໜັບສະໜູນທາງການເງິນໃຫ້ແກ່ປະເທດທີ່ທຸກຍາກໃນການກໍຫັນປ່ຽນໄປນຳໃຊ້ພະລັງງານທີ່ສະອາດ ແລະ ຄວາມພະຍາຍາມໃນການຮັບມືກັບການປ່ຽນແປງສະພາບດິນຟ້າອາກາດໂລກເພີ່ມຂຶ້ນເປັນ 2 ເທົ່າ ເປັນເງິນ 11,4 ຕື້ໂດລາສະຫະລັດຕໍ່ປີ.