ສຳນັກຂ່າວເອພີລາຍງານວ່າ ທ່ານ ອັນໂຕນີໂອ ກູເຕເຣສ ເລຂາທິການ ສະຫະປະຊາຊາດ (ສປຊ) ອອກມາເຕືອນວ່າ ມີຄວາມເປັນໄປໄດ້ທີ່ອາດຈະເກີດສົງຄາມເຢັນຄັ້ງໃໝ່ ພ້ອມທັງຮຽກຮ້ອງໃຫ້ສະຫະລັດອາເມຣິກາ ແລະ ຈີນ ຈົ່ງຟື້ນຟູສາຍພົວພັນຄືນໃໝ່ ກ່ອນບັນຫາຄວາມຂັດແຍ່ງລະຫວ່າງສອງຊາດມະຫາອຳນາດຂອງໂລກຈະເລິກລົງ ແລະ ຂະຫຍາຍອອກສູ່ວົງກວ້າງທົ່ວໂລກ.
ຄຳເຕືອນຂອງເລຂາທິການ ສປຊ ມີຂຶ້ນກ່ອນກອງປະຊຸມສະມັດຊາໃຫຍ່ ແຫ່ງສະຫະປະຊາຊາດ (UNGA) ປະຈຳປີ 2021 ທີ່ນະຄອນນິວຢອກ ສະຫະລັດອາເມຣິກາ.
ເລຂາທິການ ສປຊ ກ່າວວ່າ: ສອງຊາດມະຫາອຳນາດດ້ານເສດຖະກິດທີ່ໃຫຍ່ທີ່ສຸດຂອງໂລກຄວນຮ່ວມມືກັນ ເພື່ອແກ້ໄຂບັນຫາໂລກຮ້ອນ ຫຼື ການປ່ຽນແປງດິນຟ້າອາກາດໂລກ ແລະ ເຈລະຈາແລກປ່ຽນກັນ ທັງທາງດ້ານເສດຖະກິດ, ເຕັກໂນໂລຊີ, ສິດທິມະນຸດ, ຄວາມປອດໄພທາງໄຊເບີ ແລະ ຮ່ວມກັນແກ້ໄຂຂໍ້ພິພາດອະທິປະໄຕຕ່າງໆ ແຕ່ເປັນໜ້າເສຍດາຍທີ່ທັງສອງປະເທດມີແຕ່ຈະປະເຊີນໜ້າກັນ.
ພວກເຮົາຈຳເປັນຕ້ອງສົ່ງເສີມໃຫ້ສອງຊາດມະຫາອຳນາດຟື້ນຟູການພົວພັນຄືນໃໝ່ ເພື່ອໃຫ້ສາມາດເຮັດວຽກຮ່ວມກັນໄດ້ ເພາະມີຄວາມສຳຄັນເປັນຢ່າງຍິ່ງໃນການແກ້ໄຂບັນຫາການເຂົ້າເຖິງວັກແຊັງປ້ອງກັນໂຄວິດ-19 ຢ່າງເທົ່າທຽມ, ການແກ້ໄຂບັນຫາໂລກຮ້ອນ ແລະ ບັນຫາອື່ນໆ ເພາະການພົວພັນຂອງປະຊາຄົມໂລກ ໂດຍສະເພາະແມ່ນສອງມະຫາອຳນາດໂລກ ຖືວ່າ ມີຄວາມສຳຄັນເປັນຢ່າງຍິ່ງ, ເລຂາທິການ ສປຊ ກ່າວ.